เมนู

5. อนุตปฺปิยสุตฺตวณฺณนา

[15] ปญฺจเม อนุตปฺปาติ อนุโสจิตพฺพา อนุตาปการีฯ อิเมสุ ทฺวีสุปิ สุตฺเตสุ คาถาสุ จ วฏฺฏวิวฏฺฏํ กถิตํฯ

6. นกุลปิตุสุตฺตวณฺณนา

[16] ฉฏฺเฐ พาฬฺหคิลาโนติ อธิมตฺตคิลาโนฯ เอตทโวจาติ สามิกสฺส เภสชฺชํ กตฺวา พฺยาธิํ วูปสเมตุํ อสกฺโกนฺตี อิทานิ สีหนาทํ นทิตฺวา สจฺจกิริยาย พฺยาธิํ วูปสเมตุํ สนฺติเก นิสีทิตฺวา เอตํ ‘‘มา โข ตฺว’’นฺติอาทิวจนํ อโวจฯ สาเปกฺโขติ สตณฺโหฯ น นกุลมาตาติ เอตฺถ น-กาโร น สกฺขตีติ เอวํ ปรปเทน โยเชตพฺโพฯ สนฺถริตุนฺติ นิจฺฉิทฺทํ กาตุํ, สณฺฐเปตุนฺติ อตฺโถฯ เวณิํ โอลิขิตุนฺติ เอฬกโลมานิ กปฺเปตฺวา วิชเฏตฺวา เวณิํ กาตุํฯ

อญฺญํ ฆรํ คมิสฺสตีติ อญฺญํ สามิกํ คณฺหิสฺสติฯ โสฬส วสฺสานิ คหฏฺฐกํ พฺรหฺมจริยํ สมาจิณฺณนฺติ อิโต โสฬสวสฺสมตฺถเก คหฏฺฐพฺรหฺมจริยวาโส สมาจิณฺโณฯ ทสฺสนกามตราติ อติเรเกน ทสฺสนกามาฯ อิเมหิ ตีหิ องฺเคหิ สีหนาทํ นทิตฺวา ‘‘อิมินา สจฺเจน ตว สรีเร พฺยาธิ ผาสุ โหตู’’ติ สจฺจกิริยํ อกาสิฯ

อิทานิ ภควนฺตํ สกฺขิํ กตฺวา อตฺตโน สีลาทิคุเณหิปิ สจฺจกิริยํ กาตุํ สิยา โข ปน เตติอาทิมาหฯ ตตฺถ ปริปูรการินีติ สมตฺตการินีฯ เจโตสมถสฺสาติ สมาธิกมฺมฏฺฐานสฺสฯ โอคาธปฺปตฺตาติ โอคาธํ อนุปฺปเวสํ ปตฺตาฯ ปติคาธปฺปตฺตาติ ปติคาธํ ปติฏฺฐํ ปตฺตาฯ อสฺสาสปฺปตฺตาติ อสฺสาสํ อวสฺสยํ ปตฺตาฯ เวสารชฺชปฺปตฺตาติ โสมนสฺสญาณํ ปตฺตาฯ อปรปฺปจฺจยาติ ปรปฺปจฺจโย วุจฺจติ ปรสทฺธา ปรปตฺติยายนา, ตาย วิรหิตาติ อตฺโถฯ อิเมหิ ตีหิ องฺเคหิ อตฺตโน คุเณ อารพฺภ สจฺจกิริยํ อกาสิฯ คิลานา วุฏฺฐิโตติ คิลาโน หุตฺวา วุฏฺฐิโตฯ ยาวตาติ ยตฺติกาโยฯ ตาสํ อญฺญตราติ ตาสํ อนฺตเร เอกาฯ อนุกมฺปิกาติ หิตานุกมฺปิกาฯ โอวาทิกาติ โอวาททายิกาฯ อนุสาสิกาติ อนุสิฏฺฐิทายิกาฯ

7. โสปฺปสุตฺตวณฺณนา

[17] สตฺตเม ปฏิสลฺลานา วุฏฺฐิโตติ เอกีภาวาย ธมฺมนิชฺฌานกฺขนฺติโต ผลสมาปตฺติวิหารโต วุฏฺฐิโตฯ ยถาวิหารนฺติ อตฺตโน อตฺตโน วสนวิหารํฯ นวาติ ปพฺพชฺชาย นวกาฯ เต ปญฺจสตมตฺตา อเหสุํฯ กากจฺฉมานาติ กากสทฺทํ กโรนฺตา ทนฺเต ขาทนฺตาฯ เถราติ ถิรภาวํ ปตฺตาฯ เตน โนติ เตน นุฯ เสยฺยสุขาทีนิ เหฏฺฐา วุตฺตตฺถาเนวฯ รฏฺฐิโกติ โย รฏฺฐํ ภุญฺชติฯ เปตฺตณิโกติ โย ปิตรา ภุตฺตานุภุตฺตํ ภุญฺชติฯ เสนาปติโกติ เสนาย เชฏฺฐโกฯ คามคามณิโกติ คามโภชโกฯ ปูคคามณิโกติ คณเชฏฺฐโกฯ อวิปสฺสโก กุสลานํ ธมฺมานนฺติ กุสลานํ ธมฺมานํ อเนสโก อคเวสโก หุตฺวาฯ โพธิปกฺขิยานํ ธมฺมานนฺติ สตฺตติํสาย โพธิปกฺขิยธมฺมานํฯ

8. มจฺฉพนฺธสุตฺตวณฺณนา

[18] อฏฺฐเม มจฺฉิกนฺติ มจฺฉฆาตกํฯ หตฺถินา ยาตีติ หตฺถิยายีฯ ปรโตปิ เอเสว นโยฯ วชฺเฌติ วธิตพฺเพฯ วธายนีเตติ วธาย อุปนีเตฯ ปาปเกน มนสาติ ลามเกน วธกจิตฺเตนฯ ปาฬิยํ ปน วธายุปนีเตติ ลิขนฺติฯ มาควิโกติ มิคฆาตโกฯ โก ปน วาโท มนุสฺสภูตนฺติ โย มนุสฺสภูตํ ปาปเกน มนสา อนุเปกฺขติ, ตสฺส สมฺปตฺติยา อภาเว กิเมว วตฺตพฺพํฯ อิทํ ปาปกสฺส กมฺมุโน อนิฏฺฐผลภาวํ ทสฺเสตุํ วุตฺตํฯ เยสํ ปน ตาทิสํ กมฺมํ กโรนฺตานมฺปิ ยสปฏิลาโภ โหติ, เตสํ ตํ อกุสลํ นิสฺสาย กุสลํ วิปจฺจตีติ เวทิตพฺพํ ฯ เตน ปนสฺส อกุสลกมฺเมน อุปหตตฺตา วิปาโก น จิรฏฺฐิติโก โหติฯ อิมสฺมิํ สุตฺเต อกุสลปกฺโขว กถิโตฯ