เมนู

(26) 6. อุปสมฺปทาวคฺโค

1-3. อุปสมฺปาเทตพฺพสุตฺตาทิวณฺณนา

[251-253] ฉฏฺฐสฺส ปฐเม อุปสมฺปาเทตพฺพนฺติ อุปชฺฌาเยน หุตฺวา อุปสมฺปาเทตพฺพํฯ ทุติเย นิสฺสโย ทาตพฺโพติ อาจริเยน หุตฺวา นิสฺสโย ทาตพฺโพฯ ตติเย สามเณโร อุปฏฺฐาเปตพฺโพติ อุปชฺฌาเยน หุตฺวา สามเณโร คเหตพฺโพฯ อิติ อิมานิ ตีณิปิ สุตฺตานิ ปฐมโพธิยํ ขีณาสววเสน วุตฺตานิฯ จตุตฺถาทีนิ อนุปทวณฺณนาโต อุตฺตานตฺถาเนวฯ

1. สมฺมุติเปยฺยาลาทิวณฺณนา

[272] ภตฺตุทฺเทสกาทีนํ วินิจฺฉยกถา สมนฺตปาสาทิกาย วินยฏฺฐกถายํ (จูฬว. อฏฺฐ. 325) วุตฺตนเยน เวทิตพฺพาติฯ สมฺมโต น เปเสตพฺโพติ ปกติยา สมฺมโต ‘‘คจฺฉ ภตฺตานิ อุทฺทิสาหี’’ติ น เปเสตพฺโพฯ

[273-285] สาฏิยคฺคาหาปโกติ วสฺสิกสาฏิกาย คาหาปโกฯ ปตฺตคฺคาหาปโกติ ‘‘โย จ ตสฺสา ภิกฺขุปริสาย ปตฺตปริยนฺโต, โส ตสฺส ภิกฺขุโน ปทาตพฺโพ’’ติ เอตฺถ วุตฺตปตฺตคฺคาหาปโกฯ

[293-302] อาชีวโกติ นคฺคปริพฺพาชโกฯ นิคณฺโฐติ ปุริมภาคปฺปฏิจฺฉนฺโนฯ มุณฺฑสาวโกติ นิคณฺฐสาวโกฯ ชฏิลโกติ ตาปโสฯ ปริพฺพาชโกติ ฉนฺนปริพฺพาชโกฯ มาคณฺฑิกาทโยปิ ติตฺถิยา เอวฯ เอเตสํ ปน สีเลสุ ปริปูรการิตาย อภาเวน สุกฺกปกฺโข น คหิโตฯ เสสเมตฺถ อุตฺตานเมวาติฯ

มโนรถปูรณิยา องฺคุตฺตรนิกาย-อฏฺฐกถาย

ปญฺจกนิปาตสฺส สํวณฺณนา นิฏฺฐิตาฯ

ฯ นโม ตสฺส ภควโต อรหโต สมฺมาสมฺพุทฺธสฺสฯ

องฺคุตฺตรนิกาเย

ฉกฺกนิปาต-อฏฺฐกถา

1. ปฐมปณฺณาสกํ

1. อาหุเนยฺยวคฺโค

1. ปฐมอาหุเนยฺยสุตฺตวณฺณนา

[1] ฉกฺกนิปาตสฺส ปฐเม อิธ, ภิกฺขเว, ภิกฺขูติ, ภิกฺขเว, อิมสฺมิํ สาสเน ภิกฺขุฯ เนว สุมโน โหติ น ทุมฺมโนติ อิฏฺฐารมฺมเณ ราคสหคเตน โสมนสฺเสน สุมโน วา อนิฏฺฐารมฺมเณ โทสสหคเตน โทมนสฺเสน ทุมฺมโน วา น โหติฯ อุเปกฺขโก วิหรติ สโต สมฺปชาโนติ มชฺฌตฺตารมฺมเณ อสมเปกฺขเนน อญฺญาณุเปกฺขาย อุเปกฺขกภาวํ อนาปชฺชิตฺวา สโต สมฺปชาโน หุตฺวา อารมฺมเณ มชฺฌตฺโต วิหรติฯ อิมสฺมิํ สุตฺเต ขีณาสวสฺส สตตวิหาโร กถิโตฯ

2. ทุติยอาหุเนยฺยสุตฺตวณฺณนา

[2-4] ทุติเย อเนกวิหิตํ อิทฺธิวิธนฺติอาทีนิ วิสุทฺธิมคฺเค วุตฺตาเนวฯ อาสวานํ ขยา อนาสวนฺติ อาสวานํ ขเยน อนาสวํ, น จกฺขุวิญฺญาณาทีนํ วิย อภาเวนาติฯ อิมสฺมิํ สุตฺเต ขีณาสวสฺส อภิญฺญา ปฏิปาฏิยา กถิตาฯ ตติยจตุตฺเถสุ ขีณาสโว กถิโตฯ

5-7. อาชานียสุตฺตตฺตยวณฺณนา

[5-7] ปญฺจเม องฺเคหีติ คุณงฺเคหิฯ ขโมติ อธิวาสโกฯ รูปานนฺติ รูปารมฺมณานํฯ วณฺณสมฺปนฺโนติ สรีรวณฺเณน สมฺปนฺโนฯ ฉฏฺเฐ พลสมฺปนฺโนติ กายพเลน สมฺปนฺโนฯ สตฺตเม ชวสมฺปนฺโนติ ปทชเวน สมฺปนฺโนฯ