7. ทุติยอวณฺณารหสุตฺตวณฺณนา

[237] สตฺตเม อาวาสปลิเคธีติ อาวาสํ พลวคิทฺธิวเสน คิลิตฺวา วิย ฐิโตฯ เสสํ สพฺพํ อุตฺตานเมวาติฯ

อาวาสิกวคฺโค จตุตฺโถฯ

(25) 5. ทุจฺจริตวคฺโค

1. ปฐมทุจฺจริตสุตฺตวณฺณนา

[241] ปญฺจมสฺส ปฐเม ทุจฺจริเต สุจริเตติ อิทํ อเภทโต วุตฺตํ, กายทุจฺจริเตติอาทิ กายทฺวาราทีนํ วเสน เภทโตฯ สทฺธมฺมาติ ทสกุสลกมฺมปถธมฺมโตฯ อสทฺธมฺเมติ อกุสลกมฺมปถสงฺขาเต อสฺสทฺธมฺเมฯ

9. สิวถิกสุตฺตวณฺณนา

[249] นวเม สิวถิกายาติ สุสาเนฯ อาโรทนาติ อาโรทนฏฺฐานํฯ อสุจินาติ ชิคุจฺฉนีเยนฯ

10. ปุคฺคลปฺปสาทสุตฺตวณฺณนา

[250] ทสเม ปุคฺคลปฺปสาเทติ เอกปุคฺคลสฺมิํ อุปฺปนฺนปฺปสาเทฯ อนฺเต นิสีทาเปตีติ ภิกฺขูนํ อาสนปริยนฺเต นิสีทาเปติฯ เสสํ สพฺพตฺถ อุตฺตานตฺถเมวาติฯ

ทุจฺจริตวคฺโค ปญฺจโมฯ

ปญฺจมปณฺณาสกํ นิฏฺฐิตํฯ

(26) 6. อุปสมฺปทาวคฺโค

1-3. อุปสมฺปาเทตพฺพสุตฺตาทิวณฺณนา

[251-253] ฉฏฺฐสฺส ปฐเม อุปสมฺปาเทตพฺพนฺติ อุปชฺฌาเยน หุตฺวา อุปสมฺปาเทตพฺพํฯ ทุติเย นิสฺสโย ทาตพฺโพติ อาจริเยน หุตฺวา นิสฺสโย ทาตพฺโพฯ ตติเย สามเณโร อุปฏฺฐาเปตพฺโพติ อุปชฺฌาเยน หุตฺวา สามเณโร คเหตพฺโพฯ อิติ อิมานิ ตีณิปิ สุตฺตานิ ปฐมโพธิยํ ขีณาสววเสน วุตฺตานิฯ จตุตฺถาทีนิ อนุปทวณฺณนาโต อุตฺตานตฺถาเนวฯ

1. สมฺมุติเปยฺยาลาทิวณฺณนา

[272] ภตฺตุทฺเทสกาทีนํ วินิจฺฉยกถา สมนฺตปาสาทิกาย วินยฏฺฐกถายํ (จูฬว. อฏฺฐ. 325) วุตฺตนเยน เวทิตพฺพาติฯ สมฺมโต น เปเสตพฺโพติ ปกติยา สมฺมโต ‘‘คจฺฉ ภตฺตานิ อุทฺทิสาหี’’ติ น เปเสตพฺโพฯ

[273-285] สาฏิยคฺคาหาปโกติ วสฺสิกสาฏิกาย คาหาปโกฯ ปตฺตคฺคาหาปโกติ ‘‘โย จ ตสฺสา ภิกฺขุปริสาย ปตฺตปริยนฺโต, โส ตสฺส ภิกฺขุโน ปทาตพฺโพ’’ติ เอตฺถ วุตฺตปตฺตคฺคาหาปโกฯ

[293-302] อาชีวโกติ นคฺคปริพฺพาชโกฯ นิคณฺโฐติ ปุริมภาคปฺปฏิจฺฉนฺโนฯ มุณฺฑสาวโกติ นิคณฺฐสาวโกฯ ชฏิลโกติ ตาปโสฯ ปริพฺพาชโกติ ฉนฺนปริพฺพาชโกฯ มาคณฺฑิกาทโยปิ ติตฺถิยา เอวฯ เอเตสํ ปน สีเลสุ ปริปูรการิตาย อภาเวน สุกฺกปกฺโข น คหิโตฯ เสสเมตฺถ อุตฺตานเมวาติฯ

มโนรถปูรณิยา องฺคุตฺตรนิกาย-อฏฺฐกถาย

ปญฺจกนิปาตสฺส สํวณฺณนา นิฏฺฐิตาฯ

ฯ นโม ตสฺส ภควโต อรหโต สมฺมาสมฺพุทฺธสฺสฯ

องฺคุตฺตรนิกาเย

ฉกฺกนิปาต-อฏฺฐกถา

1. ปฐมปณฺณาสกํ