5-6. กุลูปกสุตฺตาทิวณฺณนา

[225-226] ปญฺจเม อนามนฺตจาเร อาปชฺชตีติ ‘‘นิมนฺติโต สภตฺโต สมาโน สนฺตํ ภิกฺขุํ อนาปุจฺฉา ปุเรภตฺตํ วา ปจฺฉาภตฺตํ วา กุเลสุ จาริตฺตํ อาปชฺเชยฺยา’’ติ สิกฺขาปเท (ปารา. 294) วุตฺตํ อาปตฺติํ อาปชฺชติฯ รโห นิสชฺชายาติอาทีนิปิ เตสํ เตสํ สิกฺขาปทานํ วเสน เวทิตพฺพานิฯ ฉฏฺเฐ อติเวลนฺติ อติกฺกนฺตปมาณกาลํฯ สตฺตมํ อุตฺตานเมวฯ

8. อุสฺสูรภตฺตสุตฺตวณฺณนา

[228] อฏฺฐเม อุสฺสูรภตฺเตติ อติทิวาปจนภตฺเตฯ น กาเลน ปฏิปูเชนฺตีติ ยาคุกาเล ยาคุํ, ขชฺชกกาเล ขชฺชกํ , โภชนกาเล โภชนํ อปจนฺตา ยุตฺตปฺปยุตฺตกาลสฺส อตินามิตตฺตา น กาเลน ปฏิปูเชนฺติ, อตฺตโน จิตฺเตเนว เทนฺติ นามฯ ตโต เตปิ เตสุ อตฺตโน เคหํ อาคเตสุ ตเถว กโรนฺติฯ กุลปเวณิยา อาคตา พลิปฏิคฺคาหิกา เทวตาปิ ยุตฺตปฺปยุตฺตกาเลน ลาภํ ลภมานาเยว รกฺขนฺติ โคปยนฺติ ปีฬํ อกตฺวาฯ อกาเล ลภมานา ปน ‘‘อิเม อมฺเหสุ อนาทรา’’ติ อารกฺขํ น กโรนฺติฯ

สมณพฺราหฺมณาปิ ‘‘เอเตสํ เคเห โภชนเวลาย โภชนํ น โหติ, ฐิตมชฺฌนฺหิเก เทนฺตี’’ติ มงฺคลามงฺคเลสุ กาตพฺพํ น กโรนฺติฯ วิมุขา กมฺมํ กโรนฺตีติ ‘‘ปาโต กิญฺจิ น ลภาม, ขุทาย ปฏิปีฬิตา กมฺมํ กาตุํ น สกฺโกมา’’ติ กมฺมํ วิสฺสชฺเชตฺวา นิสีทนฺติฯ อโนชวนฺตํ โหตีติ อกาเล ภุตฺตํ โอชํ หริตุํ น สกฺโกติฯ สุกฺกปกฺโข วุตฺตวิปลฺลาเสน เวทิตพฺโพฯ

9. ปฐมกณฺหสปฺปสุตฺตวณฺณนา

[229] นวเม สภีรูติ สนิทฺโท มหานิทฺทํ นิทฺทายติฯ สปฺปฏิภโยติ ตํ นิสฺสาย ภยํ อุปฺปชฺชติ, ตสฺมา สปฺปฏิภโยฯ มิตฺตทุพฺภีติ ปานโภชนทายกมฺปิ มิตฺตํ ทุพฺภติ หิํสติฯ มาตุคาเมปิ เอเสว นโยฯ

10. ทุติยกณฺหสปฺปสุตฺตวณฺณนา

[230] ทสเม โฆรวิโสติ กกฺขฬวิโสฯ ทุชฺชิวฺโหติ ทฺวิธา ภินฺนชิวฺโหฯ โฆรวิสตาติ โฆรวิสตายฯ เสสทฺวเยปิ เอเสว นโยฯ

ทีฆจาริกวคฺโค ตติโยฯ

(24) 4. อาวาสิกวคฺโค

1. อาวาสิกสุตฺตวณฺณนา

[231] จตุตฺถสฺส ปฐเม น อากปฺปสมฺปนฺโนติ สมณากปฺเปน สมฺปนฺโนฯ อภาวนีโย โหตีติ วฑฺฒนีโย น โหติฯ ทุติยํ อุตฺตานเมวฯ

3. โสภนสุตฺตวณฺณนา

[233] ตติเย ปฏิพโลติ กายพเลน จ ญาณพเลน จ สมนฺนาคตตฺตา ปฏิพโลฯ

4. พหูปการสุตฺตวณฺณนา

[234] จตุตฺเถ ขณฺฑผุลฺลนฺติ ปติตฏฺฐานญฺจ ภินฺนฏฺฐานญฺจฯ ปฏิสงฺขโรตีติ ปฏิปากติกํ กโรติฯ อาโรเจตีติ อิทํ ปวาริตกุลานํ วเสน วุตฺตํฯ

5. อนุกมฺปสุตฺตวณฺณนา

[235] ปญฺจเม อธิสีเลสูติ ปญฺจสุ สีเลสุฯ ธมฺมทสฺสเน นิเวเสตีติ จตุสจฺจธมฺมทสฺสเน ปติฏฺฐาเปติฯ อรหคฺคตนฺติ สพฺพสกฺการานํ อรเห รตนตฺตเยว คตํ, ตีสุ วตฺถูสุ ครุจิตฺตีการํ อุปฏฺฐเปถาติ อตฺโถฯ ฉฏฺฐํ อุตฺตานเมวฯ