เสสวาเรสุปิ เอเสว นโยฯ สภยํ ทุตฺตรํ อจฺจตรีติ อูมิภเยน สภยํ ทุรติกฺกมํ อติกฺกมิฯ โลกนฺตคูติ สงฺขารโลกสฺส อนฺตํ คโตฯ ปารคโตติ วุจฺจตีติ นิพฺพานํ คโตติ กถียติฯ

2-3. ทุติยสมุทฺทสุตฺตาทิวณฺณนา

[229-230] ทุติเย สมุทฺโทติ สมุทฺทนฏฺเฐน สมุทฺโท, กิเลทนฏฺเฐน เตมนฏฺเฐนาติ วุตฺตํ โหติฯ เยภุยฺเยนาติ ฐเปตฺวา อริยสาวเกฯ สมุนฺนาติ กิลินฺนา ตินฺตา นิมุคฺคาฯ ตนฺตากุลกชาตาติอาทิ เหฏฺฐา วิตฺถาริตเมวฯ มจฺจุชโหติ ตโย มจฺจู ชหิตฺวา ฐิโตฯ นิรุปธีติ ตีหิ อุปธีหิ อนุปธิฯ อปุนพฺภวายาติ นิพฺพานตฺถายฯ อโมหยี มจฺจุราชนฺติ ยถา ตสฺส คติํ น ชานาติ, เอวํ มจฺจุราชานํ โมเหตฺวา คโตฯ ตติยํ วุตฺตนยเมวฯ

4-6. ขีรรุกฺโขปมสุตฺตาทิวณฺณนา

[231-233] จตุตฺเถ อปฺปหีนฏฺเฐน อตฺถิ, เตเนวาห โส อปฺปหีโนติฯ ปริตฺตาติ, ปพฺพตมตฺตมฺปิ รูปํ อนิฏฺฐํ อรชนียํ ปริตฺตํ นาม โหติ, เอวรูปาปิสฺส รูปา จิตฺตํ ปริยาทิยนฺตีติ ทสฺเสติฯ โก ปน วาโท อธิมตฺตานนฺติ อิฏฺฐารมฺมณํ ปนสฺส รชนียํ วตฺถุ จิตฺตํ ปริยาทิยตีติ เอตฺถ กา กถา? เอตฺถ จ นขปิฏฺฐิปมาณมฺปิ มณิมุตฺตาทิ รชนียํ วตฺถุ อธิมตฺตารมฺมณเมวาติ เวทิตพฺพํฯ ทหโรติอาทีนิ ตีณิปิ อญฺญมญฺญเววจนาเนวฯ อาภินฺเทยฺยาติ ปหเรยฺย ปทาเลยฺย วาฯ ปญฺจเม ตทุภยนฺติ ตํ อุภยํฯ ฉฏฺฐํ อุตฺตานเมวฯ

7. อุทายีสุตฺตวณฺณนา

[234] สตฺตเม อเนกปริยาเยนาติ อเนเกหิ การเณหิฯ อิติปายนฺติ อิติปิ อยํฯ อิมสฺมิํ สุตฺเต อนิจฺเจน อนตฺตลกฺขณํ กถิตํฯ