เมนู

6. ปจฺจนีกสุตฺตวณฺณนา

[202] ฉฏฺเฐ ‘‘สพฺพํ เสต’’นฺติ วุตฺเต ‘‘สพฺพํ กณฺห’’นฺติอาทินา นเยน ปจฺจนีกํ กโรนฺตสฺเสวสฺส สาตํ สุขํ โหตีติ ปจฺจนีกสาโตโย จ วิเนยฺย สารมฺภนฺติ โย กรณุตฺตริยลกฺขณํ สารมฺภํ วิเนตฺวา สุณาตีติ อตฺโถฯ ฉฏฺฐํฯ

7. นวกมฺมิกสุตฺตวณฺณนา

[203] สตฺตเม นวกมฺมิกภารทฺวาโชติ โส กิร อรญฺเญ รุกฺขํ ฉินฺทาเปตฺวา ตตฺเถว ปาสาทกูฏาคาราทีนิ โยเชตฺวา นครํ อาหริตฺวา วิกฺกิณาติ, อิติ นวกมฺมํ นิสฺสาย ชีวตีติ นวกมฺมิโก, โคตฺเตน ภารทฺวาโชติ นวกมฺมิกภารทฺวาโชฯ ทิสฺวานสฺส เอตทโหสีติ ฉพฺพณฺณรสฺมิโย วิสฺสชฺเชตฺวา นิสินฺนํ ภควนฺตํ ทิสฺวาน อสฺส เอตํ อโหสิฯ วนสฺมินฺติ อิมสฺมิํ วนสณฺเฑฯ อุจฺฉินฺนมูลํ เม วนนฺติ มยฺหํ กิเลสวนํ อุจฺฉินฺนมูลํฯ นิพฺพนโถติ นิกฺกิเลสวโนฯ เอโก รเมติ เอกโก อภิรมามิฯ อรติํ วิปฺปหายาติ ปนฺตเสนาสเนสุ เจว ภาวนาย จ อุกฺกณฺฐิตํ ชหิตฺวาฯ สตฺตมํฯ

8. กฏฺฐหารสุตฺตวณฺณนา

[204] อฏฺฐเม อนฺเตวาสิกาติ เวยฺยาวจฺจํ กตฺวา สิปฺปุคฺคณฺหนกา ธมฺมนฺเตวาสิกาฯ นิสินฺนนฺติ ฉพฺพณฺณรสฺมิโย วิสฺสชฺเชตฺวา นิสินฺนํฯ คมฺภีรรูเปติ คมฺภีรสภาเวฯ

พหุเภรเวติ ตตฺรฏฺฐกสวิญฺญาณกอวิญฺญาณกเภรเวหิ พหุเภรเวฯ วิคาหิยาติ อนุปวิสิตฺวาฯ อนิญฺชมาเนนาติอาทีนิ กายวิเสสนานิ, เอวรูเปน กาเยนาติ อตฺโถฯ สุจารุรูปํ วตาติ อติสุนฺทรํ วต ฌานํ ฌายสีติ วทติฯ

วนวสฺสิโต มุนีติ วนํ อวสฺสิโต พุทฺธมุนิฯ อิทนฺติ อิทํ ตุมฺหากํ เอวํ วเน นิสินฺนการณํ มยฺหํ อจฺเฉรรูปํ ปฏิภาติฯ ปีติมโนติ ตุฏฺฐจิตฺโตฯ วเน วเสติ วนมฺหิ วสิฯ

มญฺญามหนฺติ มญฺญามิ อหํฯ โลกาธิปติสหพฺยตนฺติ โลกาธิปติมหาพฺรหฺมุนา สหภาวํฯ อากงฺขมาโนติ อิจฺฉมาโนฯ ติทิวํ อนุตฺตรนฺติ อิทํ พฺรหฺมโลกเมว สนฺธายาหฯ กสฺมา ภวํ วิชนมรญฺญมสฺสิโตติ อหํ ตาว พฺรหฺมโลกํ อากงฺขมาโนติ มญฺญามิฯ ยทิ เอวํ น โหติ, อถ เม อาจิกฺข, กสฺมา ภวนฺติ? ปุจฺฉติฯ

พฺรหฺมปตฺติยาติ เสฏฺฐปตฺติยา ฯ อิธ อิทํ ตโป กสฺมา กโรสีติ อปเรนปิ อากาเรน ปุจฺฉติฯ

กงฺขาติ ตณฺหาฯ อภินนฺทนาติ อภินนฺทนวเสน ตณฺหาว วุตฺตาฯ อเนกธาตูสูติ อเนกสภาเวสุ อารมฺมเณสุฯ ปุถูติ นานปฺปการา ตณฺหา เสสกิเลสา วาฯ สทาสิตาติ นิจฺจกาลํ อวสฺสิตาฯ อญฺญาณมูลปฺปภวาติ อวิชฺชามูลา หุตฺวา ชาตาฯ ปชปฺปิตาติ ตณฺหาว ‘‘อิทมฺปิ มยฺหํ, อิทมฺปิ มยฺห’’นฺติ ปชปฺปาปนวเสน ปชปฺปิตา นามาติ วุตฺตาฯ สพฺพา มยา พฺยนฺติกตาติ สพฺพา ตณฺหา มยา อคฺคมคฺเคน วิคตนฺตา นิรนฺตา กตาฯ สมูลิกาติ สทฺธิํ อญฺญาณมูเลนฯ

อนูปโยติ อนุปคมโนฯ สพฺเพสุ ธมฺเมสุ วิสุทฺธทสฺสโนติ อิมินา สพฺพญฺญุตญฺญาณํ ทีเปติฯ สมฺโพธิมนุตฺตรนฺติ อรหตฺตํ สนฺธายาหฯ สิวนฺติ เสฏฺฐํ ฌายามีติ ทฺวีหิ ฌาเนหิ ฌายามิฯ วิสารโทติ วิคตสารชฺโชฯ อฏฺฐมํฯ

9. มาตุโปสกสุตฺตวณฺณนา

[205] นวเม เปจฺจาติ อิโต ปฏิคนฺตฺวาฯ นวมํฯ

10. ภิกฺขกสุตฺตวณฺณนา

[206] ทสเม อิธาติ อิมสฺมิํ ภิกฺขุภาเวฯ วิสฺสํ ธมฺมนฺติ ทุคฺคนฺธํ อกุสลธมฺมํฯ พาหิตฺวาติ อคฺคมคฺเคน ชหิตฺวาฯ สงฺขายาติ ญาเณนฯ ส เว ภิกฺขูติ วุจฺจตีติ โส เว ภินฺนกิเลสตฺตา ภิกฺขุ นาม วุจฺจติฯ ทสมํฯ