เมนู

อารมฺมณปจฺจโย

[99] อุปาทาโน เจว อุปาทานิโย จ ธมฺโม อุปาทานสฺส เจว อุปาทานิยสฺส จ ธมฺมสฺส อารมฺมณปจฺจเยน ปจฺจโย – อุปาทาเน อารพฺภ อุปาทานา อุปฺปชฺชนฺติ… ตีณิฯ

อุปาทานิโย เจว โน จ อุปาทาโน ธมฺโม อุปาทานิยสฺส เจว โน จ อุปาทานสฺส ธมฺมสฺส อารมฺมณปจฺจเยน ปจฺจโย – ทานํ…เป.… ฌานา วุฏฺฐหิตฺวา ฌานํ ปจฺจเวกฺขติ, อสฺสาเทติ อภินนฺทติ, ตํ อารพฺภ ราโค อุปฺปชฺชติ, ทิฏฺฐิ อุปฺปชฺชติ, วิจิกิจฺฉา อุทฺธจฺจํ โทมนสฺสํ อุปฺปชฺชติ; อริยา โคตฺรภุํ ปจฺจเวกฺขนฺติ, โวทานํ ปจฺจเวกฺขนฺติ, ปหีเน กิเลเส…เป.… วิกฺขมฺภิเต กิเลเส…เป.… ปุพฺเพ สมุทาจิณฺเณ…เป.… จกฺขุํ…เป.… วตฺถุํ…เป.… (สํขิตฺตํ) อนาคตํสญาณสฺส อาวชฺชนาย อารมฺมณปจฺจเยน ปจฺจโยฯ (1)

อุปาทานิโย เจว โน จ อุปาทาโน ธมฺโม อุปาทานสฺส เจว อุปาทานิยสฺส จ ธมฺมสฺส อารมฺมณปจฺจเยน ปจฺจโย (สํขิตฺตํ, อิตเร ทฺเว อุปาทานทุกสทิสา)ฯ (3)

อุปาทาโน เจว อุปาทานิโย จ อุปาทานิโย เจว โน จ อุปาทาโน จ ธมฺมา อุปาทานสฺส เจว อุปาทานิยสฺส จ ธมฺมสฺส อารมฺมณปจฺจเยน ปจฺจโย… ตีณิ (เหฏฺฐา อธิปติ ตีณิ, อุปาทานทุกสทิสา)ฯ

อธิปติปจฺจโย

[100] อุปาทานิโย เจว โน จ อุปาทาโน ธมฺโม อุปาทานิยสฺส เจว โน จ อุปาทานสฺส จ ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติฯ อารมฺมณาธิปติ – ทานํ…เป.… ฌานา วุฏฺฐหิตฺวา ฌานํ ครุํ กตฺวา ปจฺจเวกฺขติ, อสฺสาเทติ อภินนฺทติ, ตํ ครุํ กตฺวา ราโค อุปฺปชฺชติ, ทิฏฺฐิ อุปฺปชฺชติ; เสกฺขา โคตฺรภุํ ครุํ กตฺวา…เป.… โวทานํ…เป.… จกฺขุํ…เป.… วตฺถุํ อุปาทานิเย เจว โน จ อุปาทาเน ขนฺเธ ครุํ กตฺวา อุปาทานิยา เจว โน จ อุปาทานา ขนฺธา อุปฺปชฺชนฺติฯ สหชาตาธิปติ – อุปาทานิยา เจว โน จ อุปาทานาธิปติ สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ อธิปติปจฺจเยน ปจฺจโย (อวเสสา ทฺเวปิ อารมฺมณาธิปติ สหชาตาธิปติปิ อุปาทานทุกสทิสา)ฯ (3)