เมนู

เหตุปจฺจโย

[300] จิตฺตสํสฏฺฐสมุฏฺฐาโน ธมฺโม จิตฺตสํสฏฺฐสมุฏฺฐานสฺส ธมฺมสฺส เหตุปจฺจเยน ปจฺจโย – จิตฺตสํสฏฺฐสมุฏฺฐานา เหตู สมฺปยุตฺตกานํ ขนฺธานํ เหตุปจฺจเยน ปจฺจโย; ปฏิสนฺธิกฺขเณ…เป.…ฯ (มูลํ กาตพฺพํ) จิตฺตสํสฏฺฐสมุฏฺฐานา เหตู จิตฺตสฺส จิตฺตสมุฏฺฐานานญฺจ รูปานํ เหตุปจฺจเยน ปจฺจโย; ปฏิสนฺธิกฺขเณ…เป.…ฯ (มูลํ กาตพฺพํ) จิตฺตสํสฏฺฐสมุฏฺฐานา เหตู สมฺปยุตฺตกานํ ขนฺธานํ จิตฺตสฺส จ จิตฺตสมุฏฺฐานานญฺจ รูปานํ เหตุปจฺจเยน ปจฺจโย; ปฏิสนฺธิกฺขเณ…เป.…ฯ (3)

อารมฺมณปจฺจโย

[301] จิตฺตสํสฏฺฐสมุฏฺฐาโน ธมฺโม จิตฺตสํสฏฺฐสมุฏฺฐานสฺส ธมฺมสฺส อารมฺมณปจฺจเยน ปจฺจโย – จิตฺตสํสฏฺฐสมุฏฺฐาเน ขนฺเธ อารพฺภ จิตฺตสํสฏฺฐสมุฏฺฐานา ขนฺธา อุปฺปชฺชนฺติฯ (มูลํ กาตพฺพํ) จิตฺตสํสฏฺฐสมุฏฺฐาเน ขนฺเธ อารพฺภ จิตฺตํ อุปฺปชฺชติฯ (มูลํ กาตพฺพํ) จิตฺตสํสฏฺฐสมุฏฺฐาเน ขนฺเธ อารพฺภ จิตฺตญฺจ สมฺปยุตฺตกา จ ขนฺธา อุปฺปชฺชนฺติฯ (3)

โนจิตฺตสํสฏฺฐสมุฏฺฐาโน ธมฺโม โนจิตฺตสํสฏฺฐสมุฏฺฐานสฺส ธมฺมสฺส อารมฺมณปจฺจเยน ปจฺจโย – อริยา มคฺคา วุฏฺฐหิตฺวา มคฺคํ ปจฺจเวกฺขนฺติ…เป.… นิพฺพานํ ปจฺจเวกฺขนฺติฯ นิพฺพานํ โคตฺรภุสฺส…เป.…ฯ (สํขิตฺตํฯ ยถา จิตฺตสหภูทุเก อารมฺมณํ เอวํ กาตพฺพํ, นินฺนานากรณํฯ นวปิ ปญฺหาฯ)

อธิปติปจฺจโย

[302] จิตฺตสํสฏฺฐสมุฏฺฐาโน ธมฺโม จิตฺตสํสฏฺฐสมุฏฺฐานสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ… ตีณิ (ทฺเวปิ อธิปตี กาตพฺพา)ฯ (3)

โนจิตฺตสํสฏฺฐสมุฏฺฐาโน ธมฺโม โนจิตฺตสํสฏฺฐสมุฏฺฐานสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ… ตีณิ (ทฺเวปิ อธิปติ กาตพฺพา)ฯ (3)

จิตฺตสํสฏฺฐสมุฏฺฐาโน จ โนจิตฺตสํสฏฺฐสมุฏฺฐาโน จ ธมฺมา จิตฺตสํสฏฺฐสมุฏฺฐานสฺส ธมฺมสฺส อธิปติปจฺจเยน ปจฺจโย – อารมฺมณาธิปติฯ (เอกาเยว อธิปติ กาตพฺพา, นวปิ ปญฺหาฯ ยถา จิตฺตสหภูทุกํ, เอวํ กาตพฺพํ, นินฺนานากรณํ)ฯ

อนนฺตรปจฺจยาทิ

[303] จิตฺตสํสฏฺฐสมุฏฺฐาโน ธมฺโม จิตฺตสํสฏฺฐสมุฏฺฐานสฺส ธมฺมสฺส อนนฺตรปจฺจเยน ปจฺจโย (นวปิ ปญฺหา จิตฺตสหภูทุกสทิสา)… สมนนฺตรปจฺจเยน ปจฺจโย… นว… สหชาตปจฺจเยน ปจฺจโย… นว (ปฏิจฺจสทิสา)… อญฺญมญฺญปจฺจเยน ปจฺจโย… นว (ปฏิจฺจสทิสา)… นิสฺสยปจฺจเยน ปจฺจโย… นว (ปจฺจยสทิสา)… อุปนิสฺสยปจฺจเยน ปจฺจโย (นวปิ ปญฺหา จิตฺตสหภูทุกสทิสา, นินฺนานากรณํ)ฯ

ปุเรชาตปจฺจยาทิ

[304] โนจิตฺตสํสฏฺฐสมุฏฺฐาโน ธมฺโม โนจิตฺตสํสฏฺฐสมุฏฺฐานสฺส ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํ… ตีณิ (จิตฺตสหภูทุกสทิสา, นินฺนานากรณํ)ฯ

จิตฺตสํสฏฺฐสมุฏฺฐาโน ธมฺโม โนจิตฺตสํสฏฺฐสมุฏฺฐานสฺส ธมฺมสฺส ปจฺฉาชาตปจฺจเยน ปจฺจโย (จิตฺตสหภูทุกสทิสา , นินฺนานากรณํฯ ตีณิปิ ปจฺฉาชาตาฯ ทฺเวฯ เอกมูลานํ เอกา ฆฏนา)… อาเสวนปจฺจเยน ปจฺจโย… นวฯ

กมฺมปจฺจยาทิ

[305] จิตฺตสํสฏฺฐสมุฏฺฐาโน ธมฺโม จิตฺตสํสฏฺฐสมุฏฺฐานสฺส ธมฺมสฺส กมฺมปจฺจเยน ปจฺจโย… ตีณิ (จิตฺตสหภูทุกสทิสา นินฺนานากรณาฯ ตีณิปิ สหชาตา, นานากฺขณิกา)… วิปากปจฺจเยน ปจฺจโย… นว… อาหารปจฺจเยน ปจฺจโย… นว (จิตฺตสหภูคมนสทิสา, เอกํเยว กพฬีการํ อาหารํ)… อินฺทฺริยปจฺจเยน ปจฺจโย… นว… ฌานปจฺจเยน ปจฺจโย… ตีณิ… มคฺคปจฺจเยน ปจฺจโย… ตีณิ… สมฺปยุตฺตปจฺจเยน ปจฺจโย… ปญฺจฯ

วิปฺปยุตฺตปจฺจโย

[306] จิตฺตสํสฏฺฐสมุฏฺฐาโน ธมฺโม โนจิตฺตสํสฏฺฐสมุฏฺฐานสฺส ธมฺมสฺส วิปฺปยุตฺตปจฺจเยน ปจฺจโย – สหชาตํ, ปจฺฉาชาตํ (สํขิตฺตํ)ฯ (1)