กมฺมปจฺจโย

[104] นีวรณสมฺปยุตฺโต เจว โน จ นีวรโณ ธมฺโม นีวรณสมฺปยุตฺตสฺส เจว โน จ นีวรณสฺส ธมฺมสฺส กมฺมปจฺจเยน ปจฺจโย – นีวรณสมฺปยุตฺตา เจว โน จ นีวรณา เจตนา สมฺปยุตฺตกานํ ขนฺธานํ กมฺมปจฺจเยน ปจฺจโยฯ (มูลํ กาตพฺพํ) นีวรณสมฺปยุตฺตา เจว โน จ นีวรณา เจตนา สมฺปยุตฺตกานํ นีวรณานํ กมฺมปจฺจเยน ปจฺจโยฯ (มูลํ กาตพฺพํ) นีวรณสมฺปยุตฺตา เจว โน จ นีวรณา เจตนา สมฺปยุตฺตกานํ ขนฺธานํ นีวรณานญฺจ กมฺมปจฺจเยน ปจฺจโยฯ (3)

อาหารปจฺจยาทิ

[105] นีวรณสมฺปยุตฺโต เจว โน จ นีวรโณ ธมฺโม นีวรณสมฺปยุตฺตสฺส เจว โน จ นีวรณสฺส ธมฺมสฺส อาหารปจฺจเยน ปจฺจโย… ตีณิ… อินฺทฺริยปจฺจเยน ปจฺจโย… ตีณิ… ฌานปจฺจเยน ปจฺจโย… ตีณิ… มคฺคปจฺจเยน ปจฺจโย… ตีณิ… สมฺปยุตฺตปจฺจเยน ปจฺจโย… นว… อตฺถิปจฺจเยน ปจฺจโย… นว… นตฺถิปจฺจเยน ปจฺจโย… นว… วิคตปจฺจเยน ปจฺจโย… นว… อวิคตปจฺจเยน ปจฺจโย … นวฯ

1. ปจฺจยานุโลมํ

2. สงฺขฺยาวาโร

สุทฺธํ

[106] เหตุยา ตีณิ, อารมฺมเณ นว, อธิปติยา นว, อนนฺตเร นว, สมนนฺตเร นว, สหชาเต นว, อญฺญมญฺเญ นว, นิสฺสเย นว, อุปนิสฺสเย นว, อาเสวเน นว, กมฺเม ตีณิ, อาหาเร ตีณิ, อินฺทฺริเย ตีณิ, ฌาเน ตีณิ, มคฺเค ตีณิ, สมฺปยุตฺเต นว, อตฺถิยา นว, นตฺถิยา นว, วิคเต นว, อวิคเต นวฯ

ปจฺจนียุทฺธาโร

[107] นีวรโณ เจว นีวรณสมฺปยุตฺโต จ ธมฺโม นีวรณสฺส เจว นีวรณสมฺปยุตฺตสฺส จ ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโย (เอวํ นวปิ ตีสุ ปเทสุ ปริวตฺเตตพฺพา)ฯ

2. ปจฺจยปจฺจนียํ

2. สงฺขฺยาวาโร

[108] นเหตุยา นว, นอารมฺมเณ นว…เป.… โนอวิคเต นวฯ

3. ปจฺจยานุโลมปจฺจนียํ

[109] เหตุปจฺจยา นอารมฺมเณ ตีณิ, นอธิปติยา ตีณิ, นอนนฺตเร ตีณิ, นสมนนฺตเร ตีณิ, นอุปนิสฺสเย ตีณิ…เป.… นมคฺเค ตีณิ, นวิปฺปยุตฺเต ตีณิ, โนนตฺถิยา ตีณิ, โนวิคเต ตีณิฯ

4. ปจฺจยปจฺจนียานุโลมํ

[110] นเหตุปจฺจยา อารมฺมเณ นว, อธิปติยา นว (อนุโลมมาติกา)…เป.… อวิคเต นวฯ

นีวรณนีวรณสมฺปยุตฺตทุกํ นิฏฺฐิตํฯ

49. นีวรณวิปฺปยุตฺตนีวรณิยทุกํ

1. ปฏิจฺจวาโร

1-4. ปจฺจยานุโลมาทิ

[111] นีวรณวิปฺปยุตฺตํ นีวรณิยํ ธมฺมํ ปฏิจฺจ นีวรณวิปฺปยุตฺโต นีวรณิโย ธมฺโม อุปฺปชฺชติ เหตุปจฺจยา – นีวรณวิปฺปยุตฺตํ นีวรณิยํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… ปฏิสนฺธิกฺขเณ…เป.… (สํขิตฺตํ)ฯ

(ยถา จูฬนฺตรทุเก โลกิยทุกํ เอวํ กาตพฺพํ นินฺนานากรณํฯ)

นีวรณวิปฺปยุตฺตนีวรณิยทุกํ นิฏฺฐิตํฯ

นีวรณโคจฺฉกํ นิฏฺฐิตํฯ

9. ปรามาสโคจฺฉกํ

50. ปรามาสทุกํ

1. ปฏิจฺจวาโร

1. ปจฺจยานุโลมํ

1. วิภงฺควาโร