นีวรณญฺจ โนนีวรณญฺจ ธมฺมํ ปจฺจยา นีวรโณ จ โนนีวรโณ จ ธมฺมา อุปฺปชฺชนฺติ เหตุปจฺจยา – โนนีวรณํ เอกํ ขนฺธญฺจ กามจฺฉนฺทนีวรณญฺจ ปจฺจยา ตโย ขนฺธา ถินมิทฺธนีวรณํ อุทฺธจฺจนีวรณํ อวิชฺชานีวรณํ…เป.… ทฺเว ขนฺเธ …เป.… (จกฺกํ)ฯ กามจฺฉนฺทนีวรณญฺจ วตฺถุญฺจ ปจฺจยา ถินมิทฺธนีวรณํ อุทฺธจฺจนีวรณํ อวิชฺชานีวรณํ สมฺปยุตฺตกา จ ขนฺธา (จกฺกํฯ สํขิตฺตํ)ฯ (3)

1. ปจฺจยานุโลมํ

2. สงฺขฺยาวาโร

[15] เหตุยา นว, อารมฺมเณ นว (สพฺพตฺถ นว), วิปาเก เอกํ…เป.… อวิคเต นวฯ

อนุโลมํฯ

2. ปจฺจยปจฺจนียํ

1. วิภงฺควาโร

นเหตุปจฺจโย

[16] นีวรณํ ธมฺมํ ปจฺจยา นีวรโณ ธมฺโม อุปฺปชฺชติ นเหตุปจฺจยา – วิจิกิจฺฉานีวรณํ ปจฺจยา อวิชฺชานีวรณํ, อุทฺธจฺจนีวรณํ ปจฺจยา อวิชฺชานีวรณํฯ (1)

โนนีวรณํ ธมฺมํ ปจฺจยา โนนีวรโณ ธมฺโม อุปฺปชฺชติ นเหตุปจฺจยา – อเหตุกํ โนนีวรณํ เอกํ ขนฺธํ ปจฺจยา ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… (ยาว อสญฺญสตฺตา) จกฺขายตนํ ปจฺจยา จกฺขุวิญฺญาณํ…เป.… กายายตนํ ปจฺจยา กายวิญฺญาณํ, วตฺถุํ ปจฺจยา อเหตุกา โนนีวรณา ขนฺธาฯ (1)

โนนีวรณํ ธมฺมํ ปจฺจยา นีวรโณ ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ ปจฺจยา อวิชฺชานีวรณํ, วตฺถุํ ปจฺจยา อวิชฺชานีวรณํฯ (2)

[17] นีวรณญฺจ โนนีวรณญฺจ ธมฺมํ ปจฺจยา นีวรโณ ธมฺโม อุปฺปชฺชติ นเหตุปจฺจยา – วิจิกิจฺฉานีวรณญฺจ สมฺปยุตฺตเก จ ขนฺเธ ปจฺจยา อวิชฺชานีวรณํ, อุทฺธจฺจนีวรณญฺจ สมฺปยุตฺตเก จ ขนฺเธ ปจฺจยา อวิชฺชานีวรณํ, วิจิกิจฺฉานีวรณญฺจ วตฺถุญฺจ ปจฺจยา อวิชฺชานีวรณํ, อุทฺธจฺจนีวรณญฺจ วตฺถุญฺจ ปจฺจยา อวิชฺชานีวรณํ (สํขิตฺตํ)ฯ (1)

2. ปจฺจยปจฺจนียํ

2. สงฺขฺยาวาโร

สุทฺธํ

[18] นเหตุยา จตฺตาริ, นอารมฺมเณ ตีณิ, นอธิปติยา นว, นอนนฺตเร ตีณิ, นสมนนฺตเร ตีณิ, นอญฺญมญฺเญ ตีณิ, นอุปนิสฺสเย ตีณิ, นปุเรชาเต นว, นปจฺฉาชาเต นว, นอาเสวเน นว, นกมฺเม ตีณิ, นวิปาเก นว, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค เอกํ, นสมฺปยุตฺเต ตีณิ, นวิปฺปยุตฺเต นว, โนนตฺถิยา ตีณิ, โนวิคเต ตีณิฯ

3. ปจฺจยานุโลมปจฺจนียํ

[19] เหตุปจฺจยา นอารมฺมเณ ตีณิ, นอธิปติยา นว (สํขิตฺตํ)ฯ

4. ปจฺจยปจฺจนียานุโลมํ

[20] นเหตุปจฺจยา อารมฺมเณ จตฺตาริ, อนนฺตเร จตฺตาริ, สมนนฺตเร จตฺตาริ…เป.… มคฺเค ตีณิ, อวิคเต จตฺตาริฯ

5. สํสฏฺฐวาโร

1-4. ปจฺจยจตุกฺกํ

[21] นีวรณํ ธมฺมํ สํสฏฺโฐ นีวรโณ ธมฺโม อุปฺปชฺชติ เหตุปจฺจยา – กามจฺฉนฺทนีวรณํ สํสฏฺฐํ ถินมิทฺธนีวรณํ อุทฺธจฺจนีวรณํ อวิชฺชานีวรณํ (จกฺกํฯ สพฺพํ นีวรณํ วิตฺถาเรตพฺพํ)ฯ

[22] เหตุยา นว, อารมฺมเณ นว (สพฺพตฺถ นว), วิปาเก เอกํ…เป.… อวิคเต นวฯ

อนุโลมํฯ