ปฐมวคฺโค

อถ โข มิลินฺทสฺส รญฺโญ เอตทโหสิ กตาวกาโส โขมฺหิ อายสฺมตา
นาคเสเนนาติ ฯ นิปติตฺวา คุรุสฺส ปาเท สิรสึ อญฺชลึ กตฺวา เอตทโวจ ภนฺเต นาคเสน
อิเม ติตฺถิยา เอวํ ภณนฺติ ยทิ พุทฺโธ ปูชํ สาทิยติ น ปรินิพฺพุโต พุทฺโธ สํยุตฺโต
โลเกน อนฺโตคธิโก โลกสาธารโณ ตสฺส กโต อธิกาโร อวชฺโฌ ภวติ สผโล ยทิ ปรินิพฺพุโต
วิสํยุตฺโต โลเกน วิสกฺโฐ สพฺพภเวหิ ตสฺส ปูชา น อุปฺปชฺชติ ปรินิพฺพุโต น กิญฺจิ
สาทิยติ อสาทิยนฺตสฺส พุทฺธสฺส กโต อธิกาโร วชฺโฌ ภวติ อผโลติ ฯ อยํ อุภโต
โกฏิโก ปญฺโห เนโส วิสโย อปฺปตฺตมานสานํ เอโส วิสโย มหนฺตานํ ภินฺทถ ภนฺเต
ทิฏฺฐิชาลํ เอกํเสน ถามนิโย ตว เอโส ปญฺโห อนุปฺปตฺโต อนาคตานํ ชินปุตฺตานํ จกฺขุํ
เทหิ ปรสาทานํ นิคฺคหายาติ ฯ เถโร อาห ปรินิพฺพุโต มหาราช ตถาคโต น จ
ตถาคโต ปูชํ สาทิยติ โพธิยาเยว มูเล ตถาคตสฺส สาทิยนา ปหีนา กึ ปน อนุปาทิเสสาย
นิพฺพานธาตุยา ปรินิพฺพุตสฺส ภควโต ฯ ภาสิตํ เจตํ มหาราช เถเรน สารีปุตฺเตน
ธมฺมาเสนาปตินาปิ
ปูชิตา อสมสมา สเทว มานุเสหิ เต
น สาทิยนฺติ สกฺการํ พุทฺธานํ เอส ธมฺมตาติ ฯ
ภนฺเต นาคเสน ปุตฺโต วา ปิตุโน วณฺณํ ภาสติ ปิตา วา ปุตฺตสฺส วณฺณํ
ภาสติ น เจตํ การณํ ปรปฺปวาทานํ นิคฺคหาย ปสาทปกาสโน นาเมโส อิงฺฆ ตฺวํ
ตตฺถ การณํ สพฺพํ พฺรูหิ สกวาทสฺส ปติฏฺฐาปนาย ทิฏฺฐิชาลํ วินิเวฏฺฐนายาติ ฯ เถโร
อาห ปรินิพฺพุโต โข มหาราช ตถาคโต น จ ตถาคโต ปูชํ สาทิยติ อสาทิยนฺตสฺส
คถาคตสฺส เทวมนุสฺสา ปรินิพฺพุตสฺส ธาตุรตนํ วตฺถุํ กริตฺวา ตถาคตสฺส ญาณ-
รตนารมฺมเณน สมฺมาปฏิปตฺตึ เสวนฺตา ติสฺโส สมฺปตฺติโย ปฏิลภนฺติ อุปมายปิ โส อตฺโถ
อุปปริกฺขิตพฺโพ ภวติ ฯ ยถา กึ วิย ยถา มหาราช มหติ มหาอคฺคิขนฺโธ ปชฺชลิตฺวา
นิพฺพายติ อปิ นุ โข โส มหาราช มหาอคฺคิขนฺโธ สาทิยติ ติณกฏฺฐอุปาทานนฺติ ฯ
ราชา อาห ชลมาโนปิ โส ภนฺเต มหติ มหาอคฺคิขนฺโธ ติณกฏฺฐอุปาทานนฺติ น สาทิยติ