วิเสสปญฺโห

ราชา อาห ภนฺเต นาคเสน ภาสิตํ เจตํ ภควตา มาตุจฺฉาย มหาปชาปติยา
โคตมิยา นวทุสฺสยุคํ ทิยมานาย สํเฆ โคตมิ เทหิ สํเฆ เต ทินฺเน อหญฺเจว ปูชิโต
ภวิสฺสามิ สํโฆ จาติ กินฺนุ โข ภนฺเต นาคเสน ตถาคโต สํฆรตนโต น ภาริโก น
ครุโก ทกฺขิเณยฺโย ฯ ยํ หิ วตฺถยุคลํ ตาย มาตุจฺฉาย สยํ วิปิงฺคิตํ สยํ ลุญฺจิตํ
สยํ วตฺตกํ สยํ โปฏฺฐํ สยํ กนฺติตํ สยํ วายิตํ วตฺถยุคลํ ทิยมานํ อตฺตโน ทิยามานํ
ตถาคโต ภิกฺขุสํฆสฺส ทาเปสิ ยทิ ภนฺเต นาคเสน ตถาคโต สํฆรตนโต อุตฺตริโก อธิโก
วา วิสิฏฺโฐ วา ภาเวยฺย มยิ ทินฺเน มหปฺผลํ ภวิสฺสตีติ น ตถาคโต มาตุจฺฉาย
มหาปชาปติยา ตํ สํฆสฺส เทหีติ สํเฆ ทาเปยฺย ยสฺมา จ โข ภนฺเต นาคเสน ตถาคโต
อตฺตานํ น ปตฺตียติ น อุปนียติ ตสฺมา ตถาคโต มาตุจฺฉาย ตํ สํฆสฺส ทาเปสีติ ฯ
เถโร อาห ภาสิตญฺเจตํ มหาราช ภควตา มาตุจฺฉาย มหาปชาปติยา โคตมิยา สาฏกา
ทิยมานานาย สํเฆ โคตมิ เทหิ สํเฆ เต ทินฺเน อหญฺเจว ปูชิโต ภวิสฺสามิ สํโฆ
จาติ ตญจ ปน วตฺถยุคํ อตฺตโน อนูปนียมานํ น อจิตฺติกตาย นน อทกฺขิเณยฺยตาย
อปิจ มหาราช หิตตฺถาย อนุกมฺปาย อนาคตมทฺธานํ สํโฆ มม อจฺจเยน จิตฺติกโต
ภวิสฺสตีติ วิชฺชมาเนเยว คุเณ ปติฏฺฐํ ชนยนฺโตเยว เอวมาห สํเฆ โคตมิ เทหิ สํเฆ
เต ทินฺเต อหญฺเจว ปูชิโต วิสฺสามิ สํโฆ จาติ ฯ ยถา มหาราช ปิตา ธรมาโนเยว
อมจฺจคณโทวาริกอนีกฏฺฐปาริสชฺชานํ มชฺเฌ รญฺโญ สนฺติเก ปุตฺตสฺส สํวิชฺชมาเน คุเณ
ปฏิกิตฺเตติ อิธ ฐปิโต อนาคตมทฺธาเน ชนมชฺเฌ ปูชิโต ภวิสฺสตีติ เอวเมว โข มหาราช
ตถาคโต หิตตฺถาย อนุกมฺปาย อนาคตมทฺธานํ สํโฆ มม อจฺจเยน จิตฺติกโต ภวิสฺสตีติ
วิชฺชามานเกเยว คุเณ ปติฏฐํ ชนยนฺโต เอวมาห สํเฆ โคตมิ เทหิ สํเฆ เต ทินฺเน
อหญฺเจว ปูชิโต ภวิสฺสามิ สํโฆ จาติ ฯ น โข มหาราช ตาวตฺตเกน จ
สาฏกานุปฺปทานมตฺเตน สํโฆ ตถาคตา อธิโก วา โหติ วิสิฏโฐ วาติ ฯ ยถา มหาราช
มาตาปิตโร นาม ปุตฺตานํ อจฺฉาเทนฺติ ปริมณฺเฑนฺติ นฺหาเปนฺติ สมฺพาหนํ เทนฺติ อปิ
นุ โข มหาราช ตาวตฺตเกน อจฺฉาทนปริมณฺฑนนฺหาปนเสมฺพาหนมตฺตเกน ปุตฺโต มาตาปิตูหิ
อธิโก นาม โหติ วิสิฏฺโฐ วาติ ฯ น หิ ภนฺเต อกามกรณียํ ภนฺเต ปุตฺโต

มาตาปิตูนํ ตสฺมา มาตาปิตโร ปุตฺตานํ อจฺฉาทนปริมณฑนนฺหาปนสมฺพาหนํ กโรนฺตีติ ฯ
เอวเมว โข มหาราช น ตาวตฺตเกน สาฏกานุปฺปทานมตฺตเกน สํโฆ ตถาคตา อธิโก
นาม โหติ วิสิฏฺโฐ วา ฯ อปิจ ตถาคโต อกามกรณียํ กโรนฺโต ตาย มาตุจฺฉาย
สํฆสฺส สาฏกํ ทาเปสิ ฯ ยถา ปนน มหาราช โกจิเทว ปุริโส รญฺโญ อุปยานํ ทเทยฺย
ตํ มหาราช อุปยานํ ชนสฺส อญฺญตรสฺส ภตฺติกสฺส วา พลตฺถสฺส วา ปุโรหิตสฺส
วา ทเทยฺย อปิ นุ โข โส มหาราช ชโน ตาวตฺตเกน อุปยานปฏิลาภมตฺตเกน รญฺญา
อธิโก นาม โหติ วิสิฏฺโฐ วาติ ฯ น หิ ภนฺเต ราชภตฺติโก ภนฺเต โส ราชปูชิตฏฺฐาเน
ฐปยนฺโต ราชา อุปยานํ เทตีติ ฯ เอวเมว โข มหาราช น ตาวตฺตเกน
สาฏกนุปฺปทานมตฺตเกน สํโฆ ตถาคตา อธิโก นาม โหติ วิสิฏฺโฐ วา ฯ อปิจ ตถาคตา
ปภูติ สํโฆ พุทฺธปูชิตฏฺฐาเน ฐปยนฺโต ตถาคโต สํหสฺส สาฏกํ ทาเปสิ ฯ อปิจ โข
มหาราช ตถาคตสฺส เอวํ อโหสิ สภาวปฏิปูชนีโย สํโฆ มม สนฺติเก น สํเฆ ปฏิปูชิสฺสามีติ
สํฆสฺส สาฏกํ ทาเปสิ ฯ น มหาราช ตถาคโต อตฺตโนเยว อติปูชนํ วณฺเณติ อถ
โข โย โกจิ ปูชนารโห โหติ เตสํปิ ตถาคโต อติปูชนํ วณฺเณติ ฯ ภาสิตํ เจตํ
มหาราช ภควตา เทวสติเทเวน มชฺฌิมนิกาเย วรลญฺจเก ธมฺมทายาทธมฺมปริยาเยน
อปฺปิจฺฉํ ปฏิปตฺตึ ปกิตฺติยมาเนน อสุเยว ปุริโม ภิกฺขุ ปุชฺชตโร ปาสํสตโรติ ฯ นตฺถิ
มหาราช ภเวสุ สตฺตนิกาเยสุ โกจิ สตฺโต ตถาคตา อธิโก วา วิสิฏฺโฐ วา ฯ ตถาคโต
จ ทกฺขิเณยฺโย จ อุตฺตโร จ อธิโก จ ฯ ภาสิตํ เจตํ มหาราช สํยุตฺตนิกาเย วรลญฺจเก
มานวคามิเกน เทวปุตฺเตน ภควโต ปุรโต ฐตฺวา สเทวมนุสฺสมชฺเฌ
วิปุโล ราชคหียานํ คิริเสฏฺโฐ ปวุจฺจติ
เสโต หิมวตํ เสฏฺโฐ อาทิจฺโจ อฆคามินํ
สมุทฺโททธีนํ เสฏฺโฐ นกฺขตฺตานญฺจ จนฺทิมา
สเทวกสฺส โลกสฺส พุทฺโธ อคฺโค ปวุจฺจตีติ ฯ
ตํ โข ปเนตํ มหาราช มานวคามิเกน เทวปุตฺเตน คาถา สํคีตา สุคหิตา น ทุคฺคหิตา
สุภาสิตา น ทุพฺภาสิตา อนุมตา ภควโต ฯ นนุ มหาราช เถเรน สารีปุตฺเตน
ธมฺมเสนาปตินา ภณิตํ เอโก มนปฺปสาเทน สรณงฺคโต อญฺชลีปณาโม วา อุสฺสาหโต
วา ตารยิตุนฺติ ฯ มารพลวิธํสเกน พุทฺเธน ภควตา จ ภณิตํ เทวาติเทเวน เอกปุคฺคโล
ภิกฺขเว โลเก อุปฺปชฺชมาโน อุปฺปชฺชติ พหุชนหิตาย พหุชนสุขาย โลกานุกมฺปาย อตฺถาย

หิตาย สุขาย เทวมนุสฺสานํ ฯ กตโม เอกปุคฺคโล ฯ ตถาคโต อรหํ สมฺมาสมฺพุทโธ
อยํ โข ภิกฺขเว เอกปุคฺคโล ฯ เป ฯ เทวมนุสฺสานนฺติ ฯ สาธุ ภนฺเต นาคเสน เอวเมตํ
สมฺปฏิจฺฉามีติ

โคตมีวตฺถทานปญฺโห ฯ