ฉฏฺฐวคฺโค

ราชา อาห ภนฺเต นาคเสน ปิโย ปพฺพชิตานํ กาโยติ ฯ เถโร อาห น
โข มหาราช ปิโย ปพฺพชิตานํ กาโยติ ฯ อถ กิสฺส นุ โข ภนฺเต เกฬาเยถ มมาเยถาติ
ฯ อตฺถิ ปน เต มหาราช กทาจิ สงฺคามคตสฺส กญฺฑสตฺติปฺปหาโรติ ฯ อาม ภนฺเต
อตฺถีติ ฯ กึ นุ โข มหาราช โส วโณ อาเลเปน จ อาลิมฺปิยติ เตเลน จ มกฺขิยติ
สุขุเมน จ โจฬปเฏน ปลิเวฐิยตีติ ฯ อาม ภนฺเต อาเลเปน จ อาลิมฺปิยติ เตเลน
จ มหฺขิยติ สุขุเมน จ โยฬปเฏน ปลิเวฐิยตีติ ฯ กินฺนุ โข มหาราช ปิโย วโณ
เยน จ อาเลเปน อาลิมฺปิยติ เตเลน จ มกฺขิยติ สุขุเมน จ โจฬปเฏน
ปลิเวฐิยตีติ ฯ น โข ภนฺเต ปิโย วโณ อปิ จ มํสสฺส รุหนตฺถาย อาเลเปน จ
อาลิมฺปิยติ เตเลน จ มกฺขิยติ สุขุเมน จ โจฬปเฏน ปลิเวฐิยตีติ ฯ เอวเมว โข
มหาราช อปฺปิโย ปพฺพชิตานํ กาโย อนชฺโฌสิตา ปพฺพชิตา กายํ ปริหรนฺติ
พฺรหฺมจริยานุคฺคหาย อปิ จ วณุปโม กาโย วุตฺโต ภควตา เตน ปพฺพชิตา วณมิว
กายํ ปริหรนฺติ อนชฺโฌสิตา ฯ ภาสิตํ เจตํ มหาราช ภควตา
อลฺลจมฺมปฏิจฺฉนโน นวทฺวาโร มหาวโณ
สมนฺตโต ปคฺฆรติ อสุจิ ปูติคนฺธิโกติ ฯ
กลฺโลสิ ภนฺเต นาคเสนาติ ฯ

กายอปฺปิยปญฺโห ปฐโม ฯ

ราชา อาห ภนฺเต นาคเสน พุทฺโธ สพฺพญฺญู สพฺพทสฺสาวีติ ฯ เถโร อาห
อาม มหาราช ภควา สพฺพญฺญู สพฺพทสฺสาวีติ ฯ อถ กิสฺส ปน ภนฺเต นาคเสน
สาวกานํ อนุปุพฺพสกฺขาปทานิ ปญฺญาเปสฺสตีติ ฯ เถโร อาห อตฺถิ ปน มหาราช โกจิ
เวชฺโช โย อิมายํ ปฐวิยา สพฺพเภสชฺชานิ ชานาตีติ ฯ อาม ภนฺเต อตฺถีติ ฯ
กึ นุ โข มหาราช โส เวชฺโช คิลานกํ นรํ อสมฺปตฺตกาเล เภสชฺชํ ปาเยติ อุทาหุ
สมฺปตฺเตติ ฯ สมฺปตฺเต ภนฺเต คิลานกํ นรํ เภสชฺชํ ปาเยติ โน อสมฺปตฺเตติ ฯ

เอวเมว โข มหาราช ภควา สพฺพญฺญู สพฺพทสฺสาวี น อกาเล สาวกานํ
สิกฺขาปทํ ปญฺญาเปติ สมฺปตฺเต กาเล สาวกานํ สิกขฺขาปทํ ปญฺญาเปติ ยาวชีวํ
อนติกฺกมนียนฺติ ฯ กลฺโลสิ ภนฺเต นาคเสนาติ ฯ

สมฺปตฺกาลปญฺโห ทุติโย ฯ

ราชา อาห ภนฺเต นาคเสน พุทฺโธ ทฺวตฺตึสมหาปุริสลกฺขเณหิ
สมนฺนาคโต อสีติยา จ อนุพฺยญฺชเนหิ ปริรญฺชิโต สุวณฺณวณฺโณ กาญฺจนสนฺนิภตโจ
พฺยามปฺปโภติ ฯ เถโร อาห อาม มหาราช ภควา ทฺวติตึสมหาปุริสลกฺขเณหิ สมนฺนาคโต
อสีติยา จ อนุพฺญฺชเนหิ ปริรญฺชิโต สุวณฺณวณฺโณ กาญฺจนสนฺนิภตโจ
พฺยามปฺปโภติ ฯ กิสฺส ปน ภนฺเต มาตาปิตโร ทฺวตฺตึสมหาปุริสลกฺขเณหิ สมนฺนาคตา
อสีติยา จ อนุพฺยญฺชเนหิ ปริรญฺชิตา สุวณฺณวณฺณา กาญฺจนสนฺนิภตจา
พฺยามปฺปภาติ ฯ น หิ มหาราชาติ ฯฯ เอวํ สนฺเต โข ภนฺเต นาคเสน กึ นุ
อุปฺปชฺชติ พุทฺโธ ทฺวตฺตึสมหาปุริสลกฺขเณหิ สมนฺนาคโต อสีติยา จ อนุพฺยญฺชเนหิ
ปริรญฺชิโต สุวณฺณวณฺโณ กาญฺจนสนฺนิภตโจ พฺยามปฺปโภ อปิ จ มาตุสทิโส ปุตฺโต โหติ
มาตุ ปกฺโข วา ปิตุสทิโส วา ปุตฺโต โหติ ปิตุ ปกฺโขติ ฯ เถโร อาห อตฺถิ ปน
มหาราช กิญฺจิ ปทุมํ วา สตฺตปตฺตํ วา อุปฺปลํ วา กุมุทํ วา ปุณฺฑริกํ วาติ ฯ
อาม ภนฺเต อตฺถิ อุทเก วาริชา ชายนฺติ ปฐวิยํ ชายนฺติ อุทเก อภิสิญฺจิยนฺตีติ ฯ
กินฺนุ โข มหาราช ปฐวิยา สทิสํ วณฺเณน วา คนฺเธน วา รเสน วาติ ฯ น หิ
ภนฺเตติ ฯ อถ กทมสฺส สทิสํ วณฺเณน วา คนฺเธน วา รเสน วาติ ฯ น หิ
ภนฺเตติ ฯ เอวเมว โข มหาราช ภควา ทฺวตฺตึสหาปุริสลกฺขเณหิ สมนฺนาคโต อสีติยา
จ อนุพฺยญฺชเนหิ ปริรญฺชิโต สุวณฺโณวณฺโณ กาญฺจนสนฺนิภตโจ พฺยามปฺปโภติ เนวสฺส
มาตาปิตโร ทฺวตฺตึสมหาปุริสลกฺขเณหิ สมนฺนาคตา น อสีติยา น อนุพฺยญฺชเนหิ ปริรญฺชิตา
สุวณฺณวณฺณา กาญฺจนสนฺนิภตจา น พฺยามปฺปภาติ ฯ น กลฺโลสิ ภนฺเต นาคเสนาติ ฯ

ทฺวตฺตึสมหาปุริสลกฺขณปญฺโห ตติโย ฯ

ราชา อาห ภนฺเต นาคเสน พุทฺโธ พฺรหฺมจารีติ ฯ เถโร อาห อาม มหาราช
ภควา พฺรหฺมจารีติ ฯ เตนหิ ภนฺเต นาคเสน พุทฺโธ พฺรหฺมุโน สิสฺโสติ ฯ เถโร
อาห อตฺถิ เต มหาราช โกจิ หตฺถี ปาโมกฺโขติ ฯ อาม ภนฺเต อตฺถีติ ฯ กินฺนุ