ทุติยวคฺโค

ราชา อาห ภนฺเต นาคเสน โย อุปฺปชฺชติ โสเยว อุทาหุ อญฺโญติ ฯ
เถโร อาห น จ โส น จ อญฺโญติ ฯ อุปมํ กโรหีติ ฯ กึ มญฺญสิ มหาราช
ยถา ตฺวํ ทหโร ตรุโณ มนฺโท อุตฺตานเสยฺยโก โทลายํ อโหสิ ฯ โส ตฺวํเยว เอตรหิ
มหนฺโตติ ฯ น หิ ภนฺเต อญฺโญ โส ตทา ทหโร ตรุโณ อุตฺตานเสยฺยโก น ปริวตฺตโก
อโหสึ ฯ อญฺโญ อหํ เอหตรหิ มหนฺโตติ ฯ เอวํ นฺเตปิ โข มหาราช มาตาปิ
น ภวิสฺสติ ปิตาปิ น ภวิสฺสติ อาจริโยปิ น ภวิสฺสติ สีลวาปิ น ภวิสฺสติ สิปฺปวาปิ
น ภวิสฺสติ ปญฺญวาปิ น ภวสฺสติ กินฺนุ โข มหาราช อญฺญาเยว กลลสฺส มาตา
อญฺญา อมฺพุทสฺส มาตา อญฺญา เปสิสฺส มาตา อญฺญา ฆนสฺส มาตา อญฺญา ขุทฺทกสฺส
มาตา อญฺญา มหนฺตสฺส มาตา กินฺนุ โข มหาราช อญฺโญ สิปฺปํ สิกฺขติ อญฺโญ
สิกฺขิโต ภวติ อญฺโญ ปาปกมฺมํ กโรติ อญฺญสฺส หตฺถปาทา นิจฺฉิชฺชนฺตีติ ฯ น หิ
ภนฺเต ตฺวํ ปน เอวํ วุตฺเต กึ วเทยฺยาสีติ ฯ เถโร อาห อหญฺเญว โข มหาราช
ทหโร อโหสึ อหญฺเญว เอตรหิ มหนฺโต อิมํเยว กายํ นิสฺสาย สพฺเพเต
เอกสงฺคหิตาติ ฯ อุปมํ ภนฺเต กโรหีติ ฯ ยถา มหาราช โกจิเทว ปุริโส ปทีปํ ปทีเปยฺย
กึ สพฺพรตฺตึ ทีเปยฺยาติ ฯ อาม ภนฺเต สพฺพรตฺตึ ทีเปยฺยาติ ฯ กึ นุ โข มหาราช
ยา ปุริเม ยาเม อจฺฉิ สา มชฺฌิเม ยาเม อจฺฉีติ ฯ น หิ ภนฺเตติ ฯ ยา จ
มชฺฌิเม ยาเม อจฺฉิ สา ปจิฉฺเม ยาเม อจฺฉีติ ฯ น หิ ภนฺเตติ ฯ กึ นุ โข
มหาราช อญฺโญ โส อโหสิ ปุริเม ยาเม ปทีโป อญฺโญ มชฺฌิเม ยาเม ปทีโป อญฺโญ
ปจฺฉิเม ยาเม ปทีโปติ ฯ น หิ ภนฺเต ตํเยว นิสฺสาย สพฺพรตฺตึ ปทีโป ปทิตฺถาติ
ฯ เอวเมว โข มหาราช ธมฺมสนฺตติ สนฺธิยติ ฯ อญฺโญ อุปฺปชฺชติ อญฺโญ นิรุชฺฌติ
อปุพฺพํ อจริมํ สนฺธิยติ เตน น จ โส น จ อญฺโญ ปจฺฉิมวิญฺญาณสงฺคหํ คจฺฉตีติ
ฯ ภิยฺโย ภนฺเต อปุมํ กโรหีติ ฯ ยถาา มหาราช ขีรํ ทูหมานํ กาลนฺตเรน ทธิ
ปริวตฺเตยฺย ทธิโต นวนีตํ ปริวตฺเตยฺย นวนีตโต ฆฏํ ปริวตฺเตยฺย โย โข มหาราช เอวํ
วเทยฺย ยํเยว ขีรํ ตํเยว ทธิ ยํเยว ทธิ ตํเยว นวนีตํ ยํเยว นวนีตํ ตํเยว ฆฏนฺติ
สมฺมา นุ โข มหาราช โส วทมาโน วเทยฺยาติ ฯ น หิ ภนฺฌต ตํเยว นิสฺสาย

สมฺภูตนฺติ ฯ เอวเมว โข มหาราช ธมฺมานฺตติ สนฺธิยติ อญฺโญ อุปฺปชฺชติ อญฺโญ
นิรุชฺฌติ อปุพฺพํ อจริมํ สนฺธิยติ เตน น จ โส น จ อญฺโญ ปจฺฉิมวิญฺญาณสงฺคหํ
คจฺฉตีติ ฯ กลฺโลสิ ภนฺเต นาคเสนาติ ฯ

ธมฺมสนฺตติปญฺโห ปฐโม ฯ

ราชา อาห ภนฺเต นาคเสน โย น ปฏิสนฺธิยติ โส ชานาติ นปฺปฏิ-
สนฺธหิสฺสามีติ ฯ เถโร อาห อาม มหาราช โย นปฺปฏิสนฺธิยติ โส ชานาติ
นปฺปฏิสนฺธหิสฺสามีติ ฯ กถํ ภนฺเต นาคเสน โส ชานาตีติ ฯ เถโร อาห โย เหตุ
โย ปจฺจโย ปฏิสนฺธิคหณาย ตสฺส เหตุสฺส จ ตสฺส ปจฺจยสฺส จ อุปรมาย ชานาติ
นปฺปฏิสนฺธหิสฺสามีติ ฯ อุปมํ กโรหีติ ฯ ยถา มหาราช กสโก คหปติโก กสิตฺวา
วปฺปิตฺวา ว ธญฺญาคารํ ปริปูเรยฺย โส จ อปเรน สมเยน เนว กเสยฺย เสว วปฺเปยฺย
ยถาสงฺขฺยํ ตญฺจ ธญฺญํ ปริภุญเชยฺย วา วิสชฺเชยฺย วา ยถาปจฺจยํ วา กเรยฺย ชาเนยฺย
โส มหาราช กสโก คหปติโก น เม ธญฺญาคารํ ปริปูรยิสฺสตีติ ฯ อาม ภนฺเต โส
ชาเนยฺยาติ ฯ กถํ ชาเนยฺยาติ ฯ โย เหตุ โย ปจฺจโย ธญฺญาคารสฺส ปริปูรณาย
ตสฺส เหตุสฺส จ ตสฺส ปจฺจยสฺส จ อุปรมาย ชานาติ น เม ธญฺญาคารํ
ปริปูรยิสฺสตีติ ฯ เอวเมว โข มหาราช โย เหตุ โย ปจฺจโย ปฏิสนฺธิคหณาย ตสฺส
เหตุสฺส จ ตสฺส ปจฺจยสฺส จ อุปรมาย ชานาติ โส นปฺปฏิสนฺธหิสฺสามีติ ฯ กลฺโลสิ
ภนฺเต

นปฺปฏิสนฺธิคหณชานนปญฺโห ทุติโย ฯ

ราชา อาห ภนฺเต นาคเสน ยสฺส ญาณํ ปน อุปฺปนฺนํ ปญฺญา ตสฺส
อุปฺปนฺนาติ ฯ เถโร อาห อาม มหาราช ยสฺส ญาณํ อุปฺปนฺนํ ปญฺญา ปน ตสฺส
อุปฺปนฺนาติ ฯ ภนฺเต นาคเสน กึ ยํเยว ญาณํ สาเยว ปญฺญาติ ฯ อาม มหาราช
ยํเยว ญาณํ สาเยว ปญฺญาติ ฯ ยสฺส ภนฺเต ยํเยว ญาณํ อุปฺปนฺนํ ตสฺส สา
จ ปญฺญา อุปฺปนฺนา กึ สมฺมุยฺเหยฺย โส อทาหุ น สมฺมุยฺเหยฺยาติ ฯ กตฺถจิ มหาราช
ปญฺญวา สมฺมุยฺเหยฺย กตฺถจิ น สมฺมุยฺเหยฺยาติ ฯ กุหึ ภนฺเต สมฺมุยเยฺย กุหึ น
สมฺมุยฺเหยฺยาติ ฯ เถโร อาห อกตปุพฺเพ จ โข มหาราช สิปฺปฏฺฐาเน อคตปุพฺพาย
วา ทิสาย อสุตปุพฺพาย วา นามปญฺญตฺติยา สมฺมุยฺเหยฺยาติ ฯ กุหึ ภนฺเต น