สตฺตมวคฺโค

ภนฺเต นาคเสน มหนฺตํ อิทํ ตถาคตสาสนํ สารํ วรํ เสฏฺฐํ ปวรํ อนูปมํ
ปริสุทฺธํ วิมลํ ปณฺฑรํ อนวชฺชํ น ยุตฺตํ คิหึ ตาวตฺตกํ ปพฺพาเชตุํ โส คิหีเยว เอกสฺมึ
ผเล วินยิตฺวา ยทา อปุนราวตฺตี โหติ ตทา ปพฺพาเชตพฺโพ ฯ ตํ กึการณํ ฯ อิเม
ทุชฺชนา ตาว ตตฺถ สาสเน วิสุทฺเธ ปพฺพชิตฺวา ปฏินิวตฺติตฺวา หีนายาวตฺตนฺติ เตสํ
ปจฺจาคมเนน อยํ มหาชโน เอวํ จินฺเตติ ตุจฺฉกํ วต โภ เอตํ สมณสฺส โคตมสฺส
สาสนํ ภวิสฺสติ ยํ อิเม ปฏินิวตฺตนฺตีติ ฯ อิทเมตฺถ การณนฺติ ฯ
ยถา มหาราช ตฬาโก ภเวยฺย สมฺปุณฺณสุจิวิมลสีตลสลิโส อถ โย โกจิ กิลิฏฺโฐ
มลกทฺทมคโต ตํ ตฬากํ คนฺตฺวา อนฺหายิตฺวา กิลิฏฺโฐว ปฏินิวตฺเตยฺย ตตฺถ กตมํ มหาราช
ชโน ครเหยฺย กิลิฏฺฐํ วา ตฬากํ วาติ ฯ กิลิฏฺฐํ ภนฺเต ชโน ครเหยฺย อยํ ตฬากํ
คนฺตฺวา อนฺหายิตฺวา กิลิฏฺโฐว ปฏินิวตฺโต กึ อิมํ อนฺหายิตุกามํ ตฬาโก สยํ นฺหาเปสฺสติ
โก โทโส ตฬากสฺสาติ ฯ เอวเมว โข มหาราช ตถาคโต วิมุตฺติวรสลิสสมฺปุณฺณํ
สทฺธมฺมวรตฬากํ มเปสิ เย เกจิ กิเลสมลกิลิฏฺฐา สเจตนา พุทฺธา เต อิธ นฺหายิตฺวา
สพฺพกิเลเส ปวาปยิสฺสนฺตีติ ฯ ยทิ โกจิ ตํ สทฺธมฺมวรตฬากํ คนฺตฺวา อนฺหายิตฺวา
สกิเลโส ว ปฏินิวตฺติตฺวา หีนายาวตฺตติ ตํเยว ชโน ครหิสฺสติ อยํ ชินสาสนเน ปพฺพชิตฺวา
ตตฺถ ปติฏฺฐํ อลภิตฺวา หีนายาวตฺโต กึ อิมํ อปฺปฏิปชฺชนฺตํ ชินสาสนํ สยํ โสเธสฺสติ
โก โทโส ชินสาสนสฺสาติ ฯ
ยถา วา ปน มหาราช ปุริโส ปรมพฺยาธิโก โรคุปฺปตฺติกุสลํ อโมฆธุวสิทฺธิกมฺมํ
ภึสกํ สลฺลกนฺตํ ทิสฺวา อติกิจฺฉาเปตฺวา สพฺยาธิโกว ปฏินิวตฺเตยฺย ตตฺถ กตมํ มหาราช
ชโน ครเหยฺย อาตุรํ วา ภึสกํ วาติ ฯ อาตุรํ ภนฺเต ชโน ครเหยฺย อยํ โรคุปฺปตฺติกุสลํ
อโมฆธุวสิทฺธิกมฺมํ ภึสกํ สลฺลกนฺตํ ทิสฺวา อติกิจฺฉาเปตฺวา สพฺยาธิโกว ปฏินิวตฺโต กึ
อมํ อติกิจฺฉาเปนฺตํ ภึสโก สยํ ติกิจฺฉิสฺสติ โก โทโส ภึสกสฺสาติ ฯ เอวเมว โข
มหาราช ตถาคโต อนฺโตสาสนสมุคฺเค เกวลํ สกลกิเลสพฺยาธิวูปสมนสมตฺถํ อมโตสถํ ปกฺขิปิ
เย เกจิ กิเลสพฺยาธิปีฬิตา สเจตนา พุทฺธา เต อิมํ อมโตสถํ ปิวิตฺวา สพฺพกิเลสพฺยาธึ