ทุติยวคฺโค

ภนฺเต นาคเสน ภาสิตํ ภควตา อภิญฺเญยฺยาหํ ภิกฺขเว ธมฺมํ เทเสมิ โน
อนภิญฺเญยฺยนฺติ ปุน จ วินยปญฺญตฺติยา เอวํ ภณิตํ อากงฺขมาโน อานนฺท สํโฆ มม
อจฺจเยน ขุทฺทานุขุทฺทกานิ สิกฺขาปทานิ สมูหนตูติ กินฺนุ โข ภนฺเต นาคเสน ตํ ขุทฺทานุขุทฺทํ
สิกฺขาปทํ ทุปปญฺญตฺตํ อุทาหุ อวตฺถุสฺมึ ปญฺญตฺตํ ยํ ภควา อตฺตโน อจฺจเยน
ขุทฺทานุขุทฺทกํ สิกฺขาปทํ สมูหนาเปติ ฯ ยทิปิ ภนฺเต นาคเสน ตถาคโต อภิญฺเญยฺยธมฺมํ
เทเสติ เตนหิ สิกฺขาปทสฺส สมูหนาปนํ มิจฺฉา ยทิ ขุทฺทานุขุทฺทานิ สิกฺขาปทานิ
สมูหนาเปติ เตนหิ อภิญฺเญยฺยธมฺมํ เทสนา มิจฺฉา ฯ อยํ อุภโต โกฏิโก ปญฺโห
สณฺโห สุขุโม นิปุโณ โส ตวานุปฺปตฺโต ตตฺถ ตฺวํ ญาณพลวิตฺถารํ ทสฺเสหิ มงฺกโร
วิย สาครพฺภนฺตรคโตติ ฯ
ภาสิตํปิ จตํ มหาราช ภควตา อภิญฺเญยฺยาหํ ภิกฺขเว ธมฺมํ เทเสมิ โน
อนภิญฺเญยฺยนฺติ ปุน จ วินยปญฺญตฺติยํปิ ภณิตํ อากงฺขมาโน อานนฺท สํโฆ มม อจฺจเยน
ขุทฺทานุขุทฺทกานิ สิกฺขาปทานิ สมูหนตูติ ฯ ตํ ปน มหาราช ตถาคโตปิ ภิกฺขูนํ วีมํสมาโน
อาห อุสฺสกฺกิสฺสนฺติ นุ โข มม สาวกา มยา วิสชฺชิยมานา ขุทฺทานุขุทฺทกานิ สิกฺขาปทานิ
อุทาหุ อาทิยิสฺสนฺตีติ ฯ ยถา มหาราช ราชา จกฺกวตฺติ ปุตฺเต เอวํ วเทยฺย อยํ
ตาตา มหาชนปโท สพฺพาสุ ทิสาสุ สาครปริยนฺโต ทุกฺกโร โส ตาวตฺตเกน พเลน ธาเรตุํ
ตุมฺเห ตาตา มม อจฺจเยน ปจฺจนฺเต ปเทเส ปฏิมุญฺจถาติ ฯ อปิ นุ โข เต
มหาราช ราชกุมารา ปิตุโน วจเนน หตฺถคเต ชนปเท สพฺเพ เต ปจฺจนฺตปเทเส
มุญฺเจยฺยุนฺติ ฯ รชฺชสฺส ภนฺเต โลเภน ราชกุมารา ตทุตฺตรึ ทฺวิคุณํ ชนปทํ ปริเยเสยฺยุํ
กึ ปน เต หตฺถคตํ ชนปทํ มุญฺเจยฺยุนฺติ ฯ เอวเมว โข มหาราช ตถาคโต ภิกฺขูนํ
วีมํสมาโน เอวมาห อากงฺขมาโน อานนฺท สํโฆ มม อจฺจเยน ขุทฺทานุขุทฺทกานิ สิกฺขาปทานิ
สมูหนตูติ ฯ ทุกฺขปริมุตฺติยา มหาราช พุทฺธปุตฺตา ธมฺมสฺส โลเภน อญฺญํ อุตฺตรึ ทฺวิคุณํ
สิกฺขาปทํ สตตํ ภาเวยฺยุํ กึ ปน ปกติปญฺญตฺตํ สิกฺขาปทนฺติ ฯ ภนฺเต นาคเสน ยํ
ภควา อาห ขุทฺทานุขุทฺทกานิ สิกฺขาปทานิ สมูหนตูติ เอตฺถายํ โลโก อนฺโธ สมฺมุฬฺโห