(201) 2. อวิวิตฺตกถา

[879] ปุถุชฺชโน เตธาตุเกหิ ธมฺเมหิ อวิวิตฺโตติ? อามนฺตาฯ ปุถุชฺชโน เตธาตุเกหิ ผสฺเสหิ…เป.… เตธาตุกาหิ เวทนาหิ… สญฺญาหิ … เจตนาหิ… จิตฺเตหิ… สทฺธาหิ… วีริเยหิ… สตีหิ… สมาธีหิ…เป.… เตธาตุกาหิ ปญฺญาหิ อวิวิตฺโตติ? น เหวํ วตฺตพฺเพ…เป.…ฯ

ปุถุชฺชโน เตธาตุเกหิ กมฺเมหิ อวิวิตฺโตติ? อามนฺตาฯ ยสฺมิํ ขเณ ปุถุชฺชโน จีวรํ เทติ, ตสฺมิํ ขเณ ปฐมํ ฌานํ อุปสมฺปชฺช วิหรติ…เป.… อากาสานญฺจายตนํ อุปสมฺปชฺช วิหรตีติ? น เหวํ วตฺตพฺเพ…เป.… ยสฺมิํ ขเณ ปุถุชฺชโน ปิณฺฑปาตํ เทติ…เป.… เสนาสนํ เทติ…เป.… คิลานปจฺจยเภสชฺชปริกฺขารํ เทติ, ตสฺมิํ ขเณ จตุตฺถํ ฌานํ อุปสมฺปชฺช วิหรติ… เนวสญฺญานาสญฺญายตนํ อุปสมฺปชฺช วิหรตีติ? น เหวํ วตฺตพฺเพ…เป.…ฯ

[880] น วตฺตพฺพํ – ‘‘ปุถุชฺชโน เตธาตุเกหิ กมฺเมหิ อวิวิตฺโต’’ติ? อามนฺตา ฯ ปุถุชฺชนสฺส รูปธาตุอรูปธาตูปคํ กมฺมํ ปริญฺญาตนฺติ? น เหวํ วตฺตพฺเพฯ เตน หิ ปุถุชฺชโน เตธาตุเกหิ กมฺเมหิ อวิวิตฺโตติ…เป.…ฯ

อวิวิตฺตกถา นิฏฺฐิตาฯ

21. เอกวีสติมวคฺโค

(202) 3. สํโยชนกถา

[881] อตฺถิ กิญฺจิ สํโยชนํ อปฺปหาย อรหตฺตปฺปตฺตีติ? อามนฺตาฯ อตฺถิ กิญฺจิ สกฺกายทิฏฺฐิํ อปฺปหาย…เป.… วิจิกิจฺฉํ อปฺปหาย…เป.… สีลพฺพตปรามาสํ อปฺปหาย… ราคํ อปฺปหาย… โทสํ อปฺปหาย… โมหํ อปฺปหาย… อโนตฺตปฺปํ อปฺปหาย อรหตฺตปฺปตฺตีติ? น เหวํ วตฺตพฺเพ…เป.…ฯ

อตฺถิ กิญฺจิ สํโยชนํ อปฺปหาย อรหตฺตปฺปตฺตีติ? อามนฺตาฯ อรหา สราโค สโทโส สโมโห สมาโน สมกฺโข สปฬาโส สอุปายาโส สกิเลโสติ? น เหวํ วตฺตพฺเพ…เป.… นนุ อรหา นิราโค นิทฺโทโส นิมฺโมโห นิมฺมาโน นิมฺมกฺโข นิปฺปฬาโส นิรุปายาโส นิกฺกิเลโสติ? อามนฺตาฯ หญฺจิ อรหา นิราโค…เป.… นิกฺกิเลโส, โน จ วต เร วตฺตพฺเพ – ‘‘อตฺถิ กิญฺจิ สํโยชนํ อปฺปหาย อรหตฺตปฺปตฺตี’’ติฯ

[882] น วตฺตพฺพํ – ‘‘อตฺถิ กิญฺจิ สํโยชนํ อปฺปหาย อรหตฺตปฺปตฺตี’’ติ ? อามนฺตาฯ อรหา สพฺพํ พุทฺธวิสยํ ชานาตีติ? น เหวํ วตฺตพฺเพฯ เตน หิ อตฺถิ กิญฺจิ สํโยชนํ อปฺปหาย อรหตฺตปฺปตฺตีติฯ

สํโยชนกถา นิฏฺฐิตาฯ

21. เอกวีสติมวคฺโค

(203) 4. อิทฺธิกถา

[883] อตฺถิ อธิปฺปายอิทฺธิ พุทฺธานํ วา สาวกานํ วาติ? อามนฺตาฯ ‘‘นิจฺจปณฺณา รุกฺขา โหนฺตู’’ติ – อตฺถิ อธิปฺปายอิทฺธิ พุทฺธานํ วา สาวกานํ วาติ? น เหวํ วตฺตพฺเพ…เป.… นิจฺจปุปฺผา รุกฺขา โหนฺตุ…เป.… นิจฺจผลิกา รุกฺขา โหนฺตุ… นิจฺจํ ชุณฺหํ โหตุ… นิจฺจํ เขมํ โหตุ… นิจฺจํ สุภิกฺขํ โหตุ… ‘‘นิจฺจํ สุวตฺถิ [สุวุฏฺฐิกํ (สฺยา.)] โหตู’’ติ – อตฺถิ อธิปฺปายอิทฺธิ พุทฺธานํ วา สาวกานํ วาติ? น เหวํ วตฺตพฺเพ…เป.…ฯ

อตฺถิ อธิปฺปายอิทฺธิ พุทฺธานํ วา สาวกานํ วาติ? อามนฺตา ฯ ‘‘อุปฺปนฺโน ผสฺโส มา นิรุชฺฌี’’ติ – อตฺถิ อธิปฺปายอิทฺธิ พุทฺธานํ วา สาวกานํ วาติ? น เหวํ วตฺตพฺเพ…เป.…ฯ

อุปฺปนฺนา เวทนา…เป.… สญฺญา… เจตนา… จิตฺตํ… สทฺธา… วีริยํ… สติ… สมาธิ…เป.… ปญฺญา มา นิรุชฺฌีติ – อตฺถิ อธิปฺปายอิทฺธิ พุทฺธานํ วา สาวกานํ วาติ? น เหวํ วตฺตพฺเพ…เป.…ฯ

อตฺถิ อธิปฺปายอิทฺธิ พุทฺธานํ วา สาวกานํ วาติ? อามนฺตาฯ ‘‘รูปํ นิจฺจํ โหตู’’ติ – อตฺถิ อธิปฺปายอิทฺธิ… เวทนา…เป.… สญฺญา…เป.… สงฺขารา…เป.… ‘‘วิญฺญาณํ นิจฺจํ โหตู’’ติ – อตฺถิ อธิปฺปายอิทฺธิ พุทฺธานํ วา สาวกานํ วาติ? น เหวํ วตฺตพฺเพ…เป.…ฯ

อตฺถิ อธิปฺปายอิทฺธิ พุทฺธานํ วา สาวกานํ วาติ? อามนฺตาฯ ‘‘ชาติธมฺมา สตฺตา มา ชายิํสู’’ติ อตฺถิ…เป.… ‘‘ชราธมฺมา สตฺตา มา ชีริํสู’’ติ…เป.… ‘‘พฺยาธิธมฺมา สตฺตา มา พฺยาธิยิํสู’’ติ…เป.… ‘‘มรณธมฺมา สตฺตา มา มียิํสู’’ติ – อตฺถิ อธิปฺปายอิทฺธิ พุทฺธานํ วา สาวกานํ วาติ? น เหวํ วตฺตพฺเพ…เป.…ฯ