[833] รูปกฺขนฺธสฺส สุญฺญตา สงฺขารกฺขนฺธปริยาปนฺนาติ? อามนฺตาฯ สงฺขารกฺขนฺธสฺส สุญฺญตา รูปกฺขนฺธปริยาปนฺนาติ? น เหวํ วตฺตพฺเพ…เป.… เวทนากฺขนฺธสฺส…เป.… สญฺญากฺขนฺธสฺส… วิญฺญาณกฺขนฺธสฺส สุญฺญตา สงฺขารกฺขนฺธปริยาปนฺนาติ? อามนฺตาฯ สงฺขารกฺขนฺธสฺส สุญฺญตา วิญฺญาณกฺขนฺธปริยาปนฺนาติ? น เหวํ วตฺตพฺเพ…เป.…ฯ

สงฺขารกฺขนฺธสฺส สุญฺญตา น วตฺตพฺพา – ‘‘รูปกฺขนฺธปริยาปนฺนา’’ติ? อามนฺตาฯ รูปกฺขนฺธสฺส สุญฺญตา น วตฺตพฺพา – ‘‘สงฺขารกฺขนฺธปริยาปนฺนา’’ติ? น เหวํ วตฺตพฺเพ…เป.… สงฺขารกฺขนฺธสฺส สุญฺญตา น วตฺตพฺพา – ‘‘เวทนากฺขนฺธปริยาปนฺนา…เป.… สญฺญากฺขนฺธปริยาปนฺนา… วิญฺญาณกฺขนฺธปริยาปนฺนา’’ติ? อามนฺตาฯ วิญฺญาณกฺขนฺธสฺส สุญฺญตา น วตฺตพฺพา – ‘‘สงฺขารกฺขนฺธปริยาปนฺนา’’ติ? น เหวํ วตฺตพฺเพ…เป.…ฯ

[834] น วตฺตพฺพํ – สุญฺญตา สงฺขารกฺขนฺธปริยาปนฺนา’’ติ? อามนฺตาฯ นนุ วุตฺตํ ภควตา – ‘‘สุญฺญมิทํ, ภิกฺขเว, สงฺขารา อตฺเตน วา อตฺตนิเยน วา’’ติ [ม. นิ. 3.69 อาเนญฺชสปฺปาเย]! อตฺเถว สุตฺตนฺโตติ? อามนฺตาฯ เตน หิ สุญฺญตา สงฺขารกฺขนฺธปริยาปนฺนาติฯ

สุญฺญตากถา นิฏฺฐิตาฯ

19. เอกูนวีสติมวคฺโค

(188) 3 สามญฺญผลกถา

[835] สามญฺญผลํ อสงฺขตนฺติ? อามนฺตาฯ นิพฺพานํ ตาณํ เลณํ สรณํ ปรายณํ อจฺจุตํ อมตนฺติ? น เหวํ วตฺตพฺเพ…เป.… สามญฺญผลํ อสงฺขตํ, นิพฺพานํ อสงฺขตนฺติ? อามนฺตาฯ ทฺเว อสงฺขตานีติ? น เหวํ วตฺตพฺเพ…เป.… ทฺเว อสงฺขตานีติ? อามนฺตาฯ ทฺเว ตาณานิ…เป.… อนฺตริกา วาติ? น เหวํ วตฺตพฺเพ…เป.…ฯ

[836] สามญฺญผลํ อสงฺขตนฺติ? อามนฺตาฯ สามญฺญํ อสงฺขตนฺติ? น เหวํ วตฺตพฺเพ …เป.… สามญฺญํ สงฺขตนฺติ? อามนฺตาฯ สามญฺญผลํ สงฺขตนฺติ? น เหวํ วตฺตพฺเพ…เป.…ฯ

โสตาปตฺติผลํ อสงฺขตนฺติ? อามนฺตาฯ โสตาปตฺติมคฺโค อสงฺขโตติ? น เหวํ วตฺตพฺเพ…เป.… โสตาปตฺติมคฺโค สงฺขโตติ? อามนฺตาฯ โสตาปตฺติผลํ สงฺขตนฺติ? น เหวํ วตฺตพฺเพ…เป.…ฯ

สกทาคามิผลํ…เป.… อนาคามิผลํ…เป.… อรหตฺตผลํ อสงฺขตนฺติ? อามนฺตาฯ อรหตฺตมคฺโค อสงฺขโตติ? น เหวํ วตฺตพฺเพ…เป.… อรหตฺตมคฺโค สงฺขโตติ? อามนฺตาฯ อรหตฺตผลํ สงฺขตนฺติ? น เหวํ วตฺตพฺเพ…เป.…ฯ

โสตาปตฺติผลํ อสงฺขตํ, สกทาคามิผลํ…เป.… อนาคามิผลํ …เป.… อรหตฺตผลํ อสงฺขตํ, นิพฺพานํ อสงฺขตนฺติ? อามนฺตาฯ ปญฺจ อสงฺขตานีติ? น เหวํ วตฺตพฺเพ…เป.… ปญฺจ อสงฺขตานีติ? อามนฺตาฯ ปญฺจ ตาณานิ…เป.… อนฺตริกา วาติ? น เหวํ วตฺตพฺเพ…เป.…ฯ

สามญฺญผลกถา นิฏฺฐิตาฯ

19. เอกูนวีสติมวคฺโค

(189) 4. ปตฺติกถา

[837] ปตฺติ อสงฺขตาติ? อามนฺตาฯ นิพฺพานํ ตาณํ เลณํ สรณํ ปรายณํ อจฺจุตํ อมตนฺติ? น เหวํ วตฺตพฺเพ…เป.… ปตฺติ อสงฺขตา, นิพฺพานํ อสงฺขตนฺติ? อามนฺตาฯ ทฺเว อสงฺขตานีติ? น เหวํ วตฺตพฺเพ…เป.… ทฺเว อสงฺขตานีติ? อามนฺตาฯ ทฺเว ตาณานิ…เป.… อนฺตริกา วาติ? น เหวํ วตฺตพฺเพ…เป.…ฯ

[838] จีวรสฺส ปตฺติ อสงฺขตาติ? อามนฺตาฯ นิพฺพานํ…เป.… อมตนฺติ? น เหวํ วตฺตพฺเพ…เป.… จีวรสฺส ปตฺติ อสงฺขตา, นิพฺพานํ อสงฺขตนฺติ? อามนฺตาฯ ทฺเว อสงฺขตานีติ? น เหวํ วตฺตพฺเพ…เป.… ทฺเว อสงฺขตานีติ? อามนฺตาฯ ทฺเว ตาณานิ…เป.… อนฺตริกา วาติ? น เหวํ วตฺตพฺเพ…เป.… ปิณฺฑปาตสฺส…เป.… เสนาสนสฺส…เป.… คิลานปจฺจยเภสชฺชปริกฺขารสฺส ปตฺติ อสงฺขตาติ? อามนฺตาฯ นิพฺพานํ…เป.… อจฺจุตํ อมตนฺติ? น เหวํ วตฺตพฺเพ…เป.… คิลานปจฺจยเภสชฺชปริกฺขารสฺส ปตฺติ อสงฺขตา, นิพฺพานํ อสงฺขตนฺติ? อามนฺตาฯ ทฺเว อสงฺขตานีติ? น เหวํ วตฺตพฺเพ…เป.… ทฺเว อสงฺขตานีติ? อามนฺตาฯ ทฺเว ตาณานิ…เป.… อนฺตริกา วาติ? น เหวํ วตฺตพฺเพ…เป.…ฯ