19. เอกูนวีสติมวคฺโค

(186) 1. กิเลสชหนกถา

[828] อตีเต กิเลเส ชหตีติ? อามนฺตาฯ นิรุทฺธํ นิโรเธติ, วิคตํ วิคเมติ, ขีณํ เขเปติ, อตฺถงฺคตํ อตฺถงฺคเมติ, อพฺภตฺถงฺคตํ อพฺภตฺถงฺคเมตีติ? น เหวํ วตฺตพฺเพ…เป.… อตีเต กิเลเส ชหตีติ? อามนฺตาฯ นนุ อตีตํ นิรุทฺธนฺติ? อามนฺตาฯ หญฺจิ อตีตํ นิรุทฺธํ , โน จ วต เร วตฺตพฺเพ – ‘‘อตีเต กิเลเส ชหตี’’ติฯ อตีเต กิเลเส ชหตีติ? อามนฺตาฯ นนุ อตีตํ นตฺถีติ? อามนฺตาฯ หญฺจิ อตีตํ นตฺถิ, โน จ วต เร วตฺตพฺเพ – ‘‘อตีเต กิเลเส ชหตี’’ติฯ

[829] อนาคเต กิเลเส ชหตีติ? อามนฺตาฯ อชาตํ อชเนติ, อสญฺชาตํ อสญฺชเนติ, อนิพฺพตฺตํ อนิพฺพตฺเตติ, อปาตุภูตํ อปาตุภาเวตีติ? น เหวํ วตฺตพฺเพ…เป.… อนาคเต กิเลเส ชหตีติ? อามนฺตาฯ นนุ อนาคตํ อชาตนฺติ? อามนฺตาฯ หญฺจิ อนาคตํ อชาตํ, โน จ วต เร วตฺตพฺเพ – ‘‘อนาคเต กิเลเส ชหตี’’ติ ฯ อนาคเต กิเลเส ชหตีติ? อามนฺตาฯ นนุ อนาคตํ นตฺถีติ? อามนฺตาฯ หญฺจิ อนาคตํ นตฺถิ, โน จ วต เร วตฺตพฺเพ – ‘‘อนาคเต กิเลเส ชหตี’’ติฯ

[830] ปจฺจุปฺปนฺเน กิเลเส ชหตีติ? อามนฺตาฯ รตฺโต ราคํ ชหติ, ทุฏฺโฐ โทสํ ชหติ, มูฬฺโห โมหํ ชหติ, กิลิฏฺโฐ กิเลเส ชหตีติ? น เหวํ วตฺตพฺเพ…เป.… ราเคน ราคํ ชหติ, โทเสน โทสํ ชหติ, โมเหน โมหํ ชหติ, กิเลเสหิ กิเลเส ชหตีติ? น เหวํ วตฺตพฺเพ…เป.…ฯ

ราโค จิตฺตสมฺปยุตฺโต, มคฺโค จิตฺตสมฺปยุตฺโตติ? อามนฺตาฯ ทฺวินฺนํ จิตฺตานํ สโมธานํ โหตีติ? น เหวํ วตฺตพฺเพ…เป.…ฯ

ราโค อกุสโล, มคฺโค กุสโลติ? อามนฺตาฯ กุสลากุสลา สาวชฺชานวชฺชา หีนปณีตา กณฺหสุกฺกสปฺปฏิภาคา ธมฺมา สมฺมุขีภาวํ อาคจฺฉนฺตีติ? น เหวํ วตฺตพฺเพ…เป.…ฯ