(171) 6. น วตฺตพฺพํ สงฺโฆ ทกฺขิณํ ปฏิคฺคณฺหาติกถา

[791] น วตฺตพฺพํ – ‘‘สงฺโฆ ทกฺขิณํ ปฏิคฺคณฺหาตี’’ติ? อามนฺตาฯ นนุ สงฺโฆ อาหุเนยฺโย ปาหุเนยฺโย ทกฺขิเณยฺโย อญฺชลิกรณีโย อนุตฺตรํ ปุญฺญกฺเขตฺตํ โลกสฺสาติ? อามนฺตาฯ หญฺจิ สงฺโฆ อาหุเนยฺโย ปาหุเนยฺโย ทกฺขิเณยฺโย อญฺชลิกรณีโย อนุตฺตรํ ปุญฺญกฺเขตฺตํ โลกสฺส, เตน วต เร วตฺตพฺเพ – ‘‘สงฺโฆ ทกฺขิณํ ปฏิคฺคณฺหาตี’’ติฯ

น วตฺตพฺพํ – ‘‘สงฺโฆ ทกฺขิณํ ปฏิคฺคณฺหาตี’’ติ? อามนฺตาฯ นนุ จตฺตาโร ปุริสยุคา อฏฺฐปุริสปุคฺคลา ทกฺขิเณยฺยา วุตฺตา ภควตาติ? อามนฺตาฯ หญฺจิ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตา, เตน วต เร วตฺตพฺเพ – ‘‘สงฺโฆ ทกฺขิณํ ปฏิคฺคณฺหาตี’’ติฯ

น วตฺตพฺพํ – ‘‘สงฺโฆ ทกฺขิณํ ปฏิคฺคณฺหาตี’’ติ? อามนฺตาฯ นนุ อตฺถิ เกจิ สงฺฆสฺส ทานํ เทนฺตีติ? อามนฺตาฯ หญฺจิ อตฺถิ เกจิ สงฺฆสฺส ทานํ เทนฺติ, เตน วต เร วตฺตพฺเพ – ‘‘สงฺโฆ ทกฺขิณํ ปฏิคฺคณฺหาตี’’ติฯ นนุ อตฺถิ เกจิ สงฺฆสฺส จีวรํ เทนฺติ…เป.… ปิณฺฑปาตํ เทนฺติ… เสนาสนํ เทนฺติ… คิลานปจฺจยเภสชฺชปริกฺขารํ เทนฺติ… ขาทนียํ เทนฺติ… โภชนียํ เทนฺติ…เป.… ปานียํ เทนฺตีติ? อามนฺตาฯ หญฺจิ อตฺถิ เกจิ สงฺฆสฺส ปานียํ เทนฺติ, เตน วต เร วตฺตพฺเพ – ‘‘สงฺโฆ ทกฺขิณํ ปฏิคฺคณฺหาตี’’ติฯ

น วตฺตพฺพํ – ‘‘สงฺโฆ ทกฺขิณํ ปฏิคฺคณฺหาตี’’ติ? อามนฺตาฯ นนุ วุตฺตํ ภควตา –

‘‘อาหุติํ ชาตเวโทว, มหาเมฆํว เมทนี;

สงฺโฆ สมาธิสมฺปนฺโน, ปฏิคฺคณฺหาติ ทกฺขิณ’’นฺติฯ

อตฺเถว สุตฺตนฺโตติ? อามนฺตาฯ เตน หิ สงฺโฆ ทกฺขิณํ ปฏิคฺคณฺหาตีติฯ

[792] สงฺโฆ ทกฺขิณํ ปฏิคฺคณฺหาตีติ? อามนฺตาฯ มคฺโค ปฏิคฺคณฺหาติ, ผลํ ปฏิคฺคณฺหาตีติ? น เหวํ วตฺตพฺเพ…เป.…ฯ

น วตฺตพฺพํ สงฺโฆ ทกฺขิณํ ปฏิคฺคณฺหาตีติกถา นิฏฺฐิตาฯ

17. สตฺตรสมวคฺโค

(172) 7. น วตฺตพฺพํ สงฺโฆ ทกฺขิณํ วิโสเธตีติกถา

[793] น วตฺตพฺพํ – ‘‘สงฺโฆ ทกฺขิณํ วิโสเธตี’’ติ? อามนฺตาฯ นนุ สงฺโฆ อาหุเนยฺโย ปาหุเนยฺโย ทกฺขิเณยฺโย อญฺชลิกรณีโย อนุตฺตรํ ปุญฺญกฺเขตฺตํ โลกสฺสาติ? อามนฺตาฯ หญฺจิ สงฺโฆ อาหุเนยฺโย…เป.… อนุตฺตรํ ปุญฺญกฺเขตฺตํ โลกสฺส, เตน วต เร วตฺตพฺเพ – ‘‘สงฺโฆ ทกฺขิณํ วิโสเธตี’’ติฯ

น วตฺตพฺพํ – ‘‘สงฺโฆ ทกฺขิณํ วิโสเธตี’’ติ? อามนฺตาฯ นนุ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตาติ? อามนฺตาฯ หญฺจิ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตา, เตน วต เร วตฺตพฺเพ – ‘‘สงฺโฆ ทกฺขิณํ วิโสเธตี’’ติฯ

น วตฺตพฺพํ – ‘‘สงฺโฆ ทกฺขิณํ วิโสเธตี’’ติ? อามนฺตาฯ นนุ อตฺถิ เกจิ สงฺฆสฺส ทานํ ทตฺวา ทกฺขิณํ อาราเธนฺตีติ? อามนฺตาฯ หญฺจิ อตฺถิ เกจิ สงฺฆสฺส ทานํ ทตฺวา ทกฺขิณํ อาราเธนฺติ, เตน วต เร วตฺตพฺเพ – ‘‘สงฺโฆ ทกฺขิณํ วิโสเธตี’’ติฯ

นนุ อตฺถิ เกจิ สงฺฆสฺส จีวรํ ทตฺวา…เป.… ปิณฺฑปาตํ ทตฺวา…เป.… เสนาสนํ ทตฺวา… คิลานปจฺจยเภสชฺชปริกฺขารํ ทตฺวา… ขาทนียํ ทตฺวา… โภชนียํ ทตฺวา…เป.… ปานียํ ทตฺวา ทกฺขิณํ อาราเธนฺตีติ? อามนฺตาฯ หญฺจิ อตฺถิ เกจิ สงฺฆสฺส ปานียํ ทตฺวา ทกฺขิณํ อาราเธนฺติ, เตน วต เร วตฺตพฺเพ – ‘‘สงฺโฆ ทกฺขิณํ วิโสเธตี’’ติฯ

[794] สงฺโฆ ทกฺขิณํ วิโสเธตีติ? อามนฺตาฯ มคฺโค วิโสเธติ, ผลํ วิโสเธตีติ? น เหวํ วตฺตพฺเพ…เป.…ฯ

น วตฺตพฺพํ สงฺโฆ ทกฺขิณํ วิโสเธตีติกถา นิฏฺฐิตาฯ

17. สตฺตรสมวคฺโค

(173) 8. น วตฺตพฺพํ สงฺโฆ ภุญฺชตีติกถา

[795] น วตฺตพฺพํ – ‘‘สงฺโฆ ภุญฺชติ ปิวติ ขาทติ สายตี’’ติ? อามนฺตาฯ นนุ อตฺถิ เกจิ สงฺฆภตฺตานิ กโรนฺติ, อุทฺเทสภตฺตานิ กโรนฺติ, ยาคุปานานิ กโรนฺตีติ? อามนฺตาฯ หญฺจิ อตฺถิ เกจิ สงฺฆภตฺตานิ กโรนฺติ, อุทฺเทสภตฺตานิ กโรนฺติ, ยาคุปานานิ กโรนฺติ, เตน วต เร วตฺตพฺเพ – ‘‘สงฺโฆ ภุญฺชติ ปิวติ ขาทติ สายตี’’ติฯ