อรหา อาจินาตีติ? น เหวํ วตฺตพฺเพ…เป.… อรหา อปจินาตีติ? น เหวํ วตฺตพฺเพ …เป.… อรหา ปชหตีติ…เป.… อรหา อุปาทิยตีติ…เป.… อรหา วิสิเนตีติ…เป.… อรหา อุสฺสิเนตีติ…เป.… อรหา วิธูเปตีติ …เป.… อรหา สนฺธูเปตีติ? น เหวํ วตฺตพฺเพ…เป.… นนุ อรหา เนวาจินาติ น อปจินาติ อปจินิตฺวา ฐิโตติ? อามนฺตาฯ หญฺจิ อรหา เนวาจินาติ นาปจินาติ อปจินิตฺวา ฐิโต, โน จ วต เร วตฺตพฺเพ – ‘‘อตฺถิ อรหโต ปุญฺญูปจโย’’ติฯ

นนุ อรหา เนว ปชหติ น อุปาทิยติ ปชหิตฺวา ฐิโต, เนว วิสิเนติ น อุสฺสิเนติ วิสิเนตฺวา ฐิโต, เนว วิธูเปติ น สนฺธูเปติ วิธูเปตฺวา ฐิโตติ? อามนฺตาฯ หญฺจิ อรหา เนว วิธูเปติ น สนฺธูเปติ วิธูเปตฺวา ฐิโต, โน จ วต เร วตฺตพฺเพ – ‘‘อตฺถิ อรหโต ปุญฺญูปจโย’’ติฯ

[779] นตฺถิ อรหโต ปุญฺญูปจโยติ? อามนฺตาฯ อรหา ทานํ ทเทยฺยาติ? อามนฺตา ฯ หญฺจิ อรหา ทานํ ทเทยฺย, โน จ วต เร วตฺตพฺเพ – ‘‘นตฺถิ อรหโต ปุญฺญูปจโย’’ติฯ

อรหา จีวรํ ทเทยฺย…เป.… ปิณฺฑปาตํ ทเทยฺย… เสนาสนํ ทเทยฺย… คิลานปจฺจยเภสชฺชปริกฺขารํ ทเทยฺย… ขาทนียํ ทเทยฺย… โภชนียํ ทเทยฺย… ปานียํ ทเทยฺย… เจติยํ วนฺเทยฺย… เจติเย มาลํ อาโรเปยฺย… คนฺธํ อาโรเปยฺย… วิเลปนํ อาโรเปยฺย…เป.… เจติยํ อภิทกฺขิณํ [ปทกฺขิณํ (?)] กเรยฺยาติ? อามนฺตาฯ หญฺจิ อรหา เจติยํ อภิทกฺขิณํ กเรยฺย, โน จ วต เร วตฺตพฺเพ – ‘‘นตฺถิ อรหโต ปุญฺญูปจโย’’ติฯ

อตฺถิ อรหโต ปุญฺญูปจโยติกถา นิฏฺฐิตาฯ

17. สตฺตรสมวคฺโค

(167) 2. นตฺถิ อรหโต อกาลมจฺจูติกถา

[780] นตฺถิ อรหโต อกาลมจฺจูติ? อามนฺตาฯ นตฺถิ อรหนฺตฆาตโกติ? น เหวํ วตฺตพฺเพ…เป.… อตฺถิ อรหนฺตฆาตโกติ? อามนฺตาฯ อตฺถิ อรหโต อกาลมจฺจูติ? น เหวํ วตฺตพฺเพ…เป.… นตฺถิ อรหโต อกาลมจฺจูติ? อามนฺตาฯ โย อรหนฺตํ ชีวิตา โวโรเปติ, สติ ชีวิเต ชีวิตาวเสเส ชีวิตา โวโรเปติ, อสติ ชีวิเต ชีวิตาวเสเส ชีวิตา โวโรเปตีติ? สติ ชีวิเต ชีวิตาวเสเส ชีวิตา โวโรเปตีติฯ หญฺจิ สติ ชีวิเต ชีวิตาวเสเส ชีวิตา โวโรเปติ, โน จ วต เร วตฺตพฺเพ – ‘‘นตฺถิ อรหโต อกาลมจฺจู’’ติฯ อสติ ชีวิเต ชีวิตาวเสเส ชีวิตา โวโรเปตีติ, นตฺถิ อรหนฺตฆาตโกติ? น เหวํ วตฺตพฺเพ…เป.…ฯ

[781] นตฺถิ อรหโต อกาลมจฺจูติ? อามนฺตาฯ อรหโต กาเย วิสํ น กเมยฺย, สตฺถํ น กเมยฺย, อคฺคิ น กเมยฺยาติ? น เหวํ วตฺตพฺเพ…เป.… นนุ อรหโต กาเย วิสํ กเมยฺย , สตฺถํ กเมยฺย, อคฺคิ กเมยฺยาติ? อามนฺตาฯ หญฺจิ อรหโต กาเย วิสํ กเมยฺย, สตฺถํ กเมยฺย, อคฺคิ กเมยฺย, โน จ วต เร วตฺตพฺเพ – ‘‘นตฺถิ อรหโต อกาลมจฺจู’’ติฯ

อรหโต กาเย วิสํ น กเมยฺย, สตฺถํ น กเมยฺย, อคฺคิ น กเมยฺยาติ? อามนฺตาฯ นตฺถิ อรหนฺตฆาตโกติ? น เหวํ วตฺตพฺเพ…เป.…ฯ

[782] อตฺถิ อรหโต อกาลมจฺจูติ? อามนฺตาฯ นนุ วุตฺตํ ภควตา – ‘‘นาหํ, ภิกฺขเว, สญฺเจตนิกานํ กมฺมานํ กตานํ อุปจิตานํ อปฺปฏิสํเวทิตฺวา พฺยนฺตีภาวํ วทามิ; ตญฺจ โข ทิฏฺเฐว ธมฺเม อุปปชฺชํ วา อปเร วา ปริยาเย’’ติฯ อตฺเถว สุตฺตนฺโตติ? อามนฺตา ฯ เตน หิ นตฺถิ อรหโต อกาลมจฺจูติฯ

นตฺถิ อรหโต อกาลมจฺจูติกถา นิฏฺฐิตาฯ

17. สตฺตรสมวคฺโค