(158) 3. สุขานุปฺปทานกถา

[747] ปโร ปรสฺส สุขํ อนุปฺปเทตีติ? อามนฺตาฯ ปโร ปรสฺส ทุกฺขํ อนุปฺปเทตีติ? น เหวํ วตฺตพฺเพ…เป.… ปโร ปรสฺส ทุกฺขํ น อนุปฺปเทตีติ? อามนฺตาฯ ปโร ปรสฺส สุขํ น อนุปฺปเทตีติ? น เหวํ วตฺตพฺเพ…เป.… ปโร ปรสฺส สุขํ อนุปฺปเทตีติ? อามนฺตาฯ ปโร ปรสฺส อตฺตโน สุขํ อนุปฺปเทติ, อญฺเญสํ สุขํ อนุปฺปเทติ, ตสฺส สุขํ อนุปฺปเทตีติ? น เหวํ วตฺตพฺเพ…เป.… ปโร ปรสฺส เนวตฺตโน, น อญฺเญสํ, น ตสฺส สุขํ อนุปฺปเทตีติ? อามนฺตาฯ หญฺจิ ปโร ปรสฺส เนวตฺตโน, น อญฺเญสํ, น ตสฺส สุขํ อนุปฺปเทติ, โน จ วต เร วตฺตพฺเพ – ‘‘ปโร ปรสฺส สุขํ อนุปฺปเทตี’’ติฯ

ปโร ปรสฺส สุขํ อนุปฺปเทตีติ? อามนฺตาฯ อญฺโญ อญฺญสฺส การโก, ปรงฺกตํ สุขํ ทุกฺขํ อญฺโญ กโรติ อญฺโญ ปฏิสํเวเทตีติ? น เหวํ วตฺตพฺเพ…เป.…ฯ

[748] น วตฺตพฺพํ – ‘‘ปโร ปรสฺส สุขํ อนุปฺปเทตี’’ติ? อามนฺตาฯ นนุ อายสฺมา อุทายี เอตทโวจ – ‘‘พหูนํ วต โน ภควา ทุกฺขธมฺมานํ อปหตฺตา, พหูนํ วต โน ภควา สุขธมฺมานํ อุปหตฺตา, พหูนํ วต โน ภควา อกุสลานํ ธมฺมานํ อปหตฺตา, พหูนํ วต โน ภควา กุสลานํ ธมฺมานํ อุปหตฺตา’’ติ [ม. นิ. 2.148 ลฏุกิโกปเม]! อตฺเถว สุตฺตนฺโตติ? อามนฺตาฯ เตน หิ ปโร ปรสฺส สุขํ อนุปฺปเทตีติฯ

สุขานุปฺปทานกถา นิฏฺฐิตาฯ

16. โสฬสมวคฺโค