เมนู

(157) 2. ปคฺคหกถา

[745] ปโร ปรสฺส จิตฺตํ ปคฺคณฺหาตีติ? อามนฺตาฯ ปโร ปรสฺส จิตฺตํ ‘‘มา รชฺชิ,’’‘‘มา ทุสฺสิ,’’‘‘มา มุยฺหิ,’’‘‘มา กิลิสฺสี’’ติ ปคฺคณฺหาตีติ? น เหวํ วตฺตพฺเพ…เป.… ปโร ปรสฺส จิตฺตํ ปคฺคณฺหาตีติ? อามนฺตาฯ ปโร ปรสฺส อโลภํ กุสลมูลํ ชเนติ… อโทสํ กุสลมูลํ ชเนติ… อโมหํ กุสลมูลํ ชเนติ… สทฺธํ ชเนติ… วีริยํ ชเนติ… สติํ ชเนติ… สมาธิํ ชเนติ… ปญฺญํ ชเนตีติ? น เหวํ วตฺตพฺเพ…เป.… ปโร ปรสฺส จิตฺตํ ปคฺคณฺหาตีติ? อามนฺตาฯ ปโร ปรสฺส อุปฺปนฺโน ผสฺโส ‘‘มา นิรุชฺฌี’’ติ ปคฺคณฺหาตีติ? น เหวํ วตฺตพฺเพ…เป.… ปโร ปรสฺส อุปฺปนฺนา เวทนา…เป.… อุปฺปนฺนา ปญฺญา ‘‘มา นิรุชฺฌี’’ติ ปคฺคณฺหาตีติ? น เหวํ วตฺตพฺเพ…เป.…ฯ

ปโร ปรสฺส จิตฺตํ ปคฺคณฺหาตีติ? อามนฺตาฯ ปโร ปรสฺส อตฺถาย ราคํ ปชหติ… โทสํ ปชหติ… โมหํ ปชหติ…เป.… อโนตฺตปฺปํ ปชหตีติ? น เหวํ วตฺตพฺเพ…เป.…ฯ

ปโร ปรสฺส จิตฺตํ ปคฺคณฺหาตีติ? อามนฺตาฯ ปโร ปรสฺส อตฺถาย มคฺคํ ภาเวติ… สติปฏฺฐานํ ภาเวติ…เป.… โพชฺฌงฺคํ ภาเวตีติ? น เหวํ วตฺตพฺเพ…เป.…ฯ

ปโร ปรสฺส จิตฺตํ ปคฺคณฺหาตีติ? อามนฺตาฯ ปโร ปรสฺส อตฺถาย ทุกฺขํ ปริชานาติ…เป.… มคฺคํ ภาเวตีติ? น เหวํ วตฺตพฺเพ…เป.…ฯ

ปโร ปรสฺส จิตฺตํ ปคฺคณฺหาตีติ? อามนฺตาฯ อญฺโญ อญฺญสฺส การโก, ปรงฺกตํ สุขํ ทุกฺขํ อญฺโญ กโรติ อญฺโญ ปฏิสํเวเทตีติ? น เหวํ วตฺตพฺเพ…เป.…ฯ

ปโร ปรสฺส จิตฺตํ ปคฺคณฺหาตีติ? อามนฺตาฯ นนุ วุตฺตํ ภควตา – ‘‘อตฺตนาว กตํ ปาปํ…เป.… นาญฺโญ อญฺญํ วิโสธเย’’ติฯ อตฺเถว สุตฺตนฺโตติ? อามนฺตาฯ เตน หิ น วตฺตพฺพํ – ‘‘ปโร ปรสฺส จิตฺตํ ปคฺคณฺหาตี’’ติฯ

[746] วตฺตพฺพํ – ‘‘ปโร ปรสฺส จิตฺตํ ปคฺคณฺหาตี’’ติ? อามนฺตาฯ นนุ อตฺถิ พลปฺปตฺตา, อตฺถิ วสีภูตาติ? อามนฺตาฯ หญฺจิ อตฺถิ พลปฺปตฺตา, อตฺถิ วสีภูตา, เตน วต เร วตฺตพฺเพ – ‘‘ปโร ปรสฺส จิตฺตํ ปคฺคณฺหาตี’’ติฯ

ปคฺคหกถา นิฏฺฐิตาฯ

16. โสฬสมวคฺโค