อตีตา ปญฺจกฺขนฺธา อตีโต อทฺธา, อนาคตา ปญฺจกฺขนฺธา อนาคโต อทฺธา, ปจฺจุปฺปนฺนา ปญฺจกฺขนฺธา ปจฺจุปฺปนฺโน อทฺธาติ? อามนฺตาฯ ปนฺนรสทฺธาติ ? น เหวํ วตฺตพฺเพ…เป.…ฯ
อตีตานิ ทฺวาทสายตนานิ อตีโต อทฺธา, อนาคตานิ ทฺวาทสายตนานิ อนาคโต อทฺธา, ปจฺจุปฺปนฺนานิ ทฺวาทสายตนานิ ปจฺจุปฺปนฺโน อทฺธาติ? อามนฺตาฯ ฉตฺติํส อทฺธาติ? น เหวํ วตฺตพฺเพ…เป.…ฯ
อตีตา อฏฺฐารส ธาตุโย อตีโต อทฺธา, อนาคตา อฏฺฐารส ธาตุโย อนาคโต อทฺธา, ปจฺจุปฺปนฺนา อฏฺฐารส ธาตุโย ปจฺจุปฺปนฺโน อทฺธาติ? อามนฺตาฯ จตุปญฺญาส อทฺธาติ? น เหวํ วตฺตพฺเพ…เป.…ฯ
อตีตานิ พาวีสตินฺทฺริยานิ อตีโต อทฺธา, อนาคตานิ พาวีสตินฺทฺริยานิ อนาคโต อทฺธา, ปจฺจุปฺปนฺนานิ พาวีสตินฺทฺริยานิ ปจฺจุปฺปนฺโน อทฺธาติ? อามนฺตาฯ ฉสฏฺฐิ อทฺธาติ? น เหวํ วตฺตพฺเพ…เป.…ฯ
[721] น วตฺตพฺพํ – ‘‘อทฺธา ปรินิปฺผนฺโนติ? อามนฺตาฯ นนุ วุตฺตํ ภควตา – ‘‘ตีณิมานิ, ภิกฺขเว, กถาวตฺถูนิ! กตมานิ ตีณิ? อตีตํ วา, ภิกฺขเว, อทฺธานํ อารพฺภ กถํ กเถยฺย – ‘เอวํ อโหสิ อตีตมทฺธาน’นฺติ; อนาคตํ วา, ภิกฺขเว, อทฺธานํ อารพฺภ กถํ กเถยฺย – ‘เอวํ ภวิสฺสติ อนาคตมทฺธาน’นฺติ; เอตรหิ วา, ภิกฺขเว, ปจฺจุปฺปนฺนํ อทฺธานํ อารพฺภ กถํ กเถยฺย – ‘เอวํ โหติ เอตรหิ ปจฺจุปฺปนฺน’นฺติฯ อิมานิ โข, ภิกฺขเว, ตีณิ กถาวตฺถูนี’’ติ [อ. นิ. 3.68; ที. นิ. 3.305]ฯ อตฺเถว สุตฺตนฺโตติ? อามนฺตาฯ เตน หิ อทฺธา ปรินิปฺผนฺโนติฯ
อทฺธากถา นิฏฺฐิตาฯ
15. ปนฺนรสมวคฺโค
(148) 4. ขณลยมุหุตฺตกถา
[722] ขโณ ปรินิปฺผนฺโน, ลโย ปรินิปฺผนฺโน, มุหุตฺตํ ปรินิปฺผนฺนนฺติ? อามนฺตาฯ รูปนฺติ? น เหวํ วตฺตพฺเพ…เป.… เวทนา… สญฺญา… สงฺขารา… วิญฺญาณนฺติ? น เหวํ วตฺตพฺเพ…เป.…ฯ
[723] น วตฺตพฺพํ – ‘‘มุหุตฺตํ ปรินิปฺผนฺนนฺติ? อามนฺตาฯ นนุ วุตฺตํ ภควตา – ‘‘ตีณิมานิ, ภิกฺขเว, กถาวตฺถูนิ! กตมานิ ตีณิ? อตีตํ วา, ภิกฺขเว, อทฺธานํ อารพฺภ กถํ กเถยฺย – ‘เอวํ อโหสิ อตีตมทฺธาน’นฺติ; อนาคตํ วา, ภิกฺขเว, อทฺธานํ อารพฺภ กถํ กเถยฺย – ‘เอวํ ภวิสฺสติ อนาคตมทฺธาน’นฺติ; เอตรหิ วา, ภิกฺขเว, ปจฺจุปฺปนฺนํ อทฺธานํ อารพฺภ กถํ กเถยฺย – ‘เอวํ โหติ เอตรหิ ปจฺจุปฺปนฺน’นฺติฯ อิมานิ โข, ภิกฺขเว, ตีณิ กถาวตฺถูนี’’ติฯ อตฺเถว สุตฺตนฺโตติ? อามนฺตาฯ เตน หิ มุหุตฺตํ ปรินิปฺผนฺนนฺติฯ
ขณลยมุหุตฺตกถา นิฏฺฐิตาฯ
15. ปนฺนรสมวคฺโค
(149) 5. อาสวกถา
[724] จตฺตาโร อาสวา อนาสวาติ? อามนฺตาฯ มคฺโค ผลํ นิพฺพานํ, โสตาปตฺติมคฺโค โสตาปตฺติผลํ…เป.… โพชฺฌงฺโคติ? น เหวํ วตฺตพฺเพ…เป.…ฯ
[725] น วตฺตพฺพํ – ‘‘จตฺตาโร อาสวา อนาสวาติ? อามนฺตาฯ อตฺถญฺเญว อาสวา เยหิ อาสเวหิ เต อาสวา สาสวา โหนฺตีติ? น เหวํ วตฺตพฺเพฯ เตน หิ จตฺตาโร อาสวา อนาสวาติฯ
อาสวกถา นิฏฺฐิตาฯ
15. ปนฺนรสมวคฺโค