เมนู

หญฺจิ ตณฺหา อุปาทาเนน สหชาตา, เตน วต เร วตฺตพฺเพ – ‘‘ตณฺหาปจฺจยาปิ อุปาทานํ, อุปาทานปจฺจยาปิ ตณฺหา’’ติฯ

[719] ‘‘ชรามรณปจฺจยา , ภิกฺขเว, ชาติ, ชาติปจฺจยา ภโว’’ติ – อตฺเถว สุตฺตนฺโตติ ? นตฺถิฯ เตน หิ อวิชฺชาปจฺจยาว สงฺขารา, น วตฺตพฺพํ – ‘‘สงฺขารปจฺจยาปิ อวิชฺชา’’ติฯ ตณฺหาปจฺจยาว อุปาทานํ, น วตฺตพฺพํ – ‘‘อุปาทานปจฺจยาปิ ตณฺหา’’ติฯ

‘‘วิญฺญาณปจฺจยา, ภิกฺขเว, นามรูปํ, นามรูปปจฺจยาปิ วิญฺญาณ’’นฺติ [ที. นิ. 2.58, โถกํ ปน วิสทิสํ] – อตฺเถว สุตฺตนฺโตติ? อามนฺตาฯ เตน หิ อวิชฺชาปจฺจยาปิ สงฺขารา, สงฺขารปจฺจยาปิ อวิชฺชา; ตณฺหาปจฺจยาปิ อุปาทานํ, อุปาทานปจฺจยาปิ ตณฺหาติฯ

อญฺญมญฺญปจฺจยกถา นิฏฺฐิตาฯ

15. ปนฺนรสมวคฺโค

(147) 3. อทฺธากถา

[720] อทฺธา ปรินิปฺผนฺโนติ? อามนฺตาฯ รูปนฺติ? น เหวํ วตฺตพฺเพ…เป.… เวทนา…เป.… สญฺญา…เป.… สงฺขารา…เป.… วิญฺญาณนฺติ? น เหวํ วตฺตพฺเพ…เป.… อตีโต อทฺธา ปรินิปฺผนฺโนติ? อามนฺตาฯ รูปนฺติ ? น เหวํ วตฺตพฺเพ…เป.… เวทนา…เป.… สญฺญา…เป.… สงฺขารา…เป.… วิญฺญาณนฺติ? น เหวํ วตฺตพฺเพ…เป.… อนาคโต อทฺธา ปรินิปฺผนฺโนติ? อามนฺตาฯ รูปนฺติ? น เหวํ วตฺตพฺเพ…เป.… เวทนา…เป.… สญฺญา…เป.… สงฺขารา…เป.… วิญฺญาณนฺติ? น เหวํ วตฺตพฺเพ…เป.… ปจฺจุปฺปนฺโน อทฺธา ปรินิปฺผนฺโนติ? อามนฺตาฯ รูปนฺติ? น เหวํ วตฺตพฺเพ…เป.… เวทนา…เป.… สญฺญา…เป.… สงฺขารา…เป.… วิญฺญาณนฺติ? น เหวํ วตฺตพฺเพ…เป.…ฯ

อตีตํ รูปํ เวทนา สญฺญา สงฺขารา วิญฺญาณํ อตีโต อทฺธาติ? อามนฺตาฯ อตีตา ปญฺจทฺธาติ? น เหวํ วตฺตพฺเพ…เป.… อนาคตํ รูปํ เวทนา สญฺญา สงฺขารา วิญฺญาณํ อนาคโต อทฺธาติ? อามนฺตาฯ อนาคตา ปญฺจทฺธาติ? น เหวํ วตฺตพฺเพ…เป.… ปจฺจุปฺปนฺนํ รูปํ เวทนา สญฺญา สงฺขารา วิญฺญาณํ ปจฺจุปฺปนฺโน อทฺธาติ? อามนฺตาฯ ปจฺจุปฺปนฺนา ปญฺจทฺธาติ? น เหวํ วตฺตพฺเพ…เป.…ฯ