นนุ วุตฺตํ ภควตา – ‘‘ยํ กิญฺจิ, ภิกฺขเว, รูปํ จตฺตาริ มหาภูตานิ จตุนฺนญฺจ มหาภูตานํ อุปาทายรูป’’นฺติ [ม. นิ. 1.347; อ. นิ. 11.15]! อตฺเถว สุตฺตนฺโตติ? อามนฺตาฯ เตน หิ อริยรูปํ มหาภูตานํ อุปาทายาติฯ

อริยรูปกถา นิฏฺฐิตาฯ

14. จุทฺทสมวคฺโค

(140) 5. อญฺโญ อนุสโยติกถา

[700] อญฺโญ กามราคานุสโย อญฺญํ กามราคปริยุฏฺฐานนฺติ? อามนฺตาฯ อญฺโญ กามราโค อญฺญํ กามราคปริยุฏฺฐานนฺติ ? น เหวํ วตฺตพฺเพ…เป.… สฺเวว กามราโค ตํ กามราคปริยุฏฺฐานนฺติ? อามนฺตาฯ สฺเวว กามราคานุสโย ตํ กามราคปริยุฏฺฐานนฺติ? น เหวํ วตฺตพฺเพ…เป.…ฯ

อญฺโญ ปฏิฆานุสโย อญฺญํ ปฏิฆปริยุฏฺฐานนฺติ? อามนฺตาฯ อญฺญํ ปฏิฆํ อญฺญํ ปฏิฆปริยุฏฺฐานนฺติ? น เหวํ วตฺตพฺเพ…เป.… ตญฺเญว ปฏิฆํ ตํ ปฏิฆปริยุฏฺฐานนฺติ? อามนฺตาฯ สฺเวว ปฏิฆานุสโย ตํ ปฏิฆปริยุฏฺฐานนฺติ? น เหวํ วตฺตพฺเพ…เป.…ฯ

อญฺโญ มานานุสโย อญฺญํ มานปริยุฏฺฐานนฺติ? อามนฺตาฯ อญฺโญ มาโน อญฺญํ มานปริยุฏฺฐานนฺติ? น เหวํ วตฺตพฺเพ…เป.… สฺเวว มาโน ตํ มานปริยุฏฺฐานนฺติ? อามนฺตาฯ สฺเวว มานานุสโย ตํ มานปริยุฏฺฐานนฺติ? น เหวํ วตฺตพฺเพ…เป.…ฯ

อญฺโญ ทิฏฺฐานุสโย อญฺญํ ทิฏฺฐิปริยุฏฺฐานนฺติ? อามนฺตาฯ อญฺญา ทิฏฺฐิ อญฺญํ ทิฏฺฐิปริยุฏฺฐานนฺติ? น เหวํ วตฺตพฺเพ…เป.… สาว ทิฏฺฐิ ตํ ทิฏฺฐิปริยุฏฺฐานนฺติ? อามนฺตาฯ สฺเวว ทิฏฺฐานุสโย ตํ ทิฏฺฐิปริยุฏฺฐานนฺติ? น เหวํ วตฺตพฺเพ…เป.…ฯ

อญฺโญ วิจิกิจฺฉานุสโย อญฺญํ วิจิกิจฺฉาปริยุฏฺฐานนฺติ? อามนฺตาฯ อญฺญา วิจิกิจฺฉา อญฺญํ วิจิกิจฺฉาปริยุฏฺฐานนฺติ? น เหวํ วตฺตพฺเพ…เป.… สาว วิจิกิจฺฉา ตํ วิจิกิจฺฉาปริยุฏฺฐานนฺติ? อามนฺตาฯ สฺเวว วิจิกิจฺฉานุสโย ตํ วิจิกิจฺฉาปริยุฏฺฐานนฺติ? น เหวํ วตฺตพฺเพ…เป.…ฯ