เมนู

สํวโร กมฺมํ ตเถว อสํวโร, สพฺพกมฺมํ สวิปากํ, สทฺโท วิปาโก, สฬายตนํ วิปาโก, สตฺตกฺขตฺตุปรโม ปุคฺคโล สตฺตกฺขตฺตุปรมตานิยโต, โกลงฺโกลปุคฺคโล โกลงฺโกลตานิยโต, เอกพีชี ปุคฺคโล เอกพีชิตานิยโต, ทิฏฺฐิสมฺปนฺโน ปุคฺคโล สญฺจิจฺจ ปาณํ ชีวิตา โวโรเปยฺย, ทิฏฺฐิสมฺปนฺนสฺส ปุคฺคลสฺส ปหีนา ทุคฺคติ, ตเถว สตฺตมภวิกสฺสาติฯ

13. เตรสมวคฺโค

(126) 1. กปฺปฏฺฐกถา

[654] กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺโป จ สณฺฐาติ พุทฺโธ จ โลเก อุปฺปชฺชตีติ? น เหวํ วตฺตพฺเพ…เป.…ฯ กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺโป จ สณฺฐาติ สงฺโฆ จ ภิชฺชตีติ? น เหวํ วตฺตพฺเพ…เป.… กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺโป จ สณฺฐาติ กปฺปฏฺโฐ จ กปฺปฏฺฐิยํ กมฺมํ กโรตีติ? น เหวํ วตฺตพฺเพ…เป.… กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺโป จ สณฺฐาติ กปฺปฏฺโฐ จ ปุคฺคโล กาลํ กโรตีติ? น เหวํ วตฺตพฺเพ…เป.…ฯ

[655] กปฺปฏฺโฐ กปฺปํ ติฏฺเฐยฺยาติ? อามนฺตาฯ อตีตํ กปฺปํ ติฏฺเฐยฺย, อนาคตํ กปฺปํ ติฏฺเฐยฺยาติ? น เหวํ วตฺตพฺเพ…เป.… กปฺปฏฺโฐ กปฺปํ ติฏฺเฐยฺยาติ? อามนฺตาฯ ทฺเว กปฺเป ติฏฺเฐยฺย… ตโย กปฺเป ติฏฺเฐยฺย… จตฺตาโร กปฺเป ติฏฺเฐยฺยาติ? น เหวํ วตฺตพฺเพ…เป.…ฯ

[656] กปฺปฏฺโฐ กปฺปํ ติฏฺเฐยฺยาติ? อามนฺตาฯ กปฺปฏฺโฐ กปฺเป ฑยฺหนฺเต กตฺถ คจฺฉตีติ? อญฺญํ โลกธาตุํ คจฺฉตีติฯ มโต คจฺฉติ, เวหาสํ คจฺฉตีติ? มโต คจฺฉตีติฯ กปฺปฏฺฐิยํ กมฺมํ อปราปริยเวปกฺกนฺติ? น เหวํ วตฺตพฺเพ…เป.… [เวหาสํ คจฺฉตีติ (?) อยํ หิ ปรวาทิสฺส ปฏิญฺญาเยว, กถา. 621-623 นวมปนฺติยํ วิย] เวหาสํ คจฺฉตีติ? อามนฺตา [เวหาสํ คจฺฉตีติ (?) อยํ หิ ปรวาทิสฺส ปฏิญฺญาเยว, กถา. 621-623 นวมปนฺติยํ วิย]ฯ กปฺปฏฺโฐ อิทฺธิมาติ? น เหวํ วตฺตพฺเพ…เป.… กปฺปฏฺโฐ อิทฺธิมาติ? อามนฺตาฯ

กปฺปฏฺเฐน ฉนฺทิทฺธิปาโท ภาวิโต วีริยิทฺธิปาโท ภาวิโต จิตฺติทฺธิปาโท ภาวิโต วีมํสิทฺธิปาโท ภาวิโตติ? น เหวํ วตฺตพฺเพ…เป.…ฯ

[657] น วตฺตพฺพํ – ‘‘กปฺปฏฺโฐ กปฺปํ ติฏฺเฐยฺยา’’ติ? อามนฺตาฯ นนุ วุตฺตํ ภควตา –

‘‘อาปายิโก เนรยิโก, กปฺปฏฺโฐ สงฺฆเภทโก;

วคฺครโต อธมฺมฏฺโฐ, โยคกฺเขมา ปธํสติ;

สงฺฆํ สมคฺคํ เภตฺวาน [ภินฺทิตฺวา (สี. ก.)], กปฺปํ นิรยมฺหิ ปจฺจตี’’ติ [จูฬว. 354; อ. นิ. 10.39; อิติวุ. 18]

อตฺเถว สุตฺตนฺโตติ? อามนฺตาฯ เตน หิ กปฺปฏฺโฐ กปฺปํ ติฏฺเฐยฺยาติฯ

กปฺปฏฺฐกถา นิฏฺฐิตาฯ

13. เตรสมวคฺโค

(127) 2. กุสลปฏิลาภกถา

[658] กปฺปฏฺโฐ กุสลํ จิตฺตํ น ปฏิลเภยฺยาติ? อามนฺตาฯ กปฺปฏฺโฐ ทานํ ทเทยฺยาติ? อามนฺตาฯ หญฺจิ กปฺปฏฺโฐ ทานํ ทเทยฺย, โน จ วต เร วตฺตพฺเพ – ‘‘กปฺปฏฺโฐ กุสลํ จิตฺตํ น ปฏิลเภยฺยา’’ติฯ

กปฺปฏฺโฐ กุสลํ จิตฺตํ น ปฏิลเภยฺยาติ? อามนฺตาฯ กปฺปฏฺโฐ จีวรํ ทเทยฺย…เป.… ปิณฺฑปาตํ ทเทยฺย…เป.… เสนาสนํ ทเทยฺย…เป.… คิลานปจฺจยเภสชฺชปริกฺขารํ ทเทยฺย … ขาทนียํ ทเทยฺย… โภชนียํ ทเทยฺย… ปานียํ ทเทยฺย… เจติยํ วนฺเทยฺย… เจติเย มาลํ อาโรเปยฺย… คนฺธํ อาโรเปยฺย… วิเลปนํ อาโรเปยฺย…เป.… เจติยํ อภิทกฺขิณํ [ปทกฺขิณํ (ปี.)] กเรยฺยาติ? อามนฺตาฯ หญฺจิ กปฺปฏฺโฐ เจติยํ อภิทกฺขิณํ กเรยฺย, โน จ วต เร วตฺตพฺเพ – ‘‘กปฺปฏฺโฐ กุสลํ จิตฺตํ น ปฏิลเภยฺยา’’ติ…เป.…ฯ