(117) 2. กมฺมกถา

[633] สพฺพํ กมฺมํ สวิปากนฺติ? อามนฺตาฯ สพฺพา เจตนา สวิปากาติ? น เหวํ วตฺตพฺเพ…เป.… สพฺพา เจตนา สวิปากาติ? อามนฺตาฯ วิปากาพฺยากตา เจตนา สวิปากาติ? น เหวํ วตฺตพฺเพ…เป.… สพฺพา เจตนา สวิปากาติ ? อามนฺตาฯ กิริยาพฺยากตา เจตนา สวิปากาติ? น เหวํ วตฺตพฺเพ…เป.…ฯ

สพฺพา เจตนา สวิปากาติ? อามนฺตาฯ กามาวจรา วิปากาพฺยากตา เจตนา สวิปากาติ? น เหวํ วตฺตพฺเพ…เป.… สพฺพา เจตนา สวิปากาติ? อามนฺตาฯ รูปาวจรา อรูปาวจรา อปริยาปนฺนา วิปากาพฺยากตา เจตนา สวิปากาติ? น เหวํ วตฺตพฺเพ…เป.…ฯ

สพฺพา เจตนา สวิปากาติ? อามนฺตาฯ กามาวจรา กิริยาพฺยากตา เจตนา สวิปากาติ? น เหวํ วตฺตพฺเพ…เป.… สพฺพา เจตนา สวิปากาติ? อามนฺตาฯ รูปาวจรา อรูปาวจรา กิริยาพฺยากตา เจตนา สวิปากาติ? น เหวํ วตฺตพฺเพ…เป.…ฯ

[634] วิปากาพฺยากตา เจตนา อวิปากาติ? อามนฺตาฯ หญฺจิ วิปากาพฺยากตา เจตนา อวิปากา, โน จ วต เร วตฺตพฺเพ – ‘‘สพฺพา เจตนา สวิปากา’’ติฯ

กิริยาพฺยากตา เจตนา อวิปากาติ? อามนฺตาฯ หญฺจิ กิริยาพฺยากตา เจตนา อวิปากา, โน จ วต เร วตฺตพฺเพ – ‘‘สพฺพา เจตนา สวิปากา’’ติฯ

กามาวจรา รูปาวจรา อรูปาวจรา อปริยาปนฺนา วิปากาพฺยากตา เจตนา อวิปากาติ? อามนฺตา ฯ หญฺจิ อปริยาปนฺนา วิปากาพฺยากตา เจตนา อวิปากา, โน จ วต เร วตฺตพฺเพ – ‘‘สพฺพา เจตนา สวิปากา’’ติฯ

กามาวจรา รูปาวจรา อรูปาวจรา กิริยาพฺยากตา เจตนา อวิปากาติ? อามนฺตาฯ หญฺจิ อรูปาวจรา กิริยาพฺยากตา เจตนา อวิปากา, โน จ วต เร วตฺตพฺเพ – ‘‘สพฺพา เจตนา สวิปากา’’ติฯ

[635] น วตฺตพฺพํ – ‘‘สพฺพํ กมฺมํ สวิปาก’’นฺติ? อามนฺตาฯ นนุ วุตฺตํ ภควตา – ‘‘นาหํ, ภิกฺขเว, สญฺเจตนิกานํ กมฺมานํ กตานํ อุปจิตานํ อปฺปฏิสํวิทิตฺวา พฺยนฺติภาวํ วทามิ, ตญฺจ โข ทิฏฺเฐว ธมฺเม อุปปชฺเช [อุปปชฺชํ (อ. นิ. 10.17)] วา อปเร วา ปริยาเย’’ติ [อ. นิ. 10.217]! อตฺเถว สุตฺตนฺโตติ? อามนฺตาฯ เตน หิ สพฺพํ กมฺมํ สวิปากนฺติฯ

กมฺมกถา นิฏฺฐิตาฯ

12. ทฺวาทสมวคฺโค

(118) 3. สทฺโท วิปาโกติกถา

[636] สทฺโท วิปาโกติ? อามนฺตาฯ สุขเวทนิโย ทุกฺขเวทนิโย อทุกฺขมสุขเวทนิโย, สุขาย เวทนาย สมฺปยุตฺโต, ทุกฺขาย เวทนาย สมฺปยุตฺโต , อทุกฺขมสุขาย เวทนาย สมฺปยุตฺโต, ผสฺเสน สมฺปยุตฺโต, เวทนาย สมฺปยุตฺโต, สญฺญาย สมฺปยุตฺโต, เจตนาย สมฺปยุตฺโต, จิตฺเตน สมฺปยุตฺโต, สารมฺมโณ; อตฺถิ ตสฺส อาวฏฺฏนา อาโภโค สมนฺนาหาโร มนสิกาโร เจตนา ปตฺถนา ปณิธีติ? น เหวํ วตฺตพฺเพ…เป.… นนุ น สุขเวทนิโย น ทุกฺขเวทนิโย…เป.… อนารมฺมโณ, นตฺถิ ตสฺส อาวฏฺฏนา…เป.… ปณิธีติ? อามนฺตาฯ หญฺจิ น สุขเวทนิโย…เป.… อนารมฺมโณ, นตฺถิ ตสฺส อาวฏฺฏนา…เป.… ปณิธิ, โน จ วต เร วตฺตพฺเพ – ‘‘สทฺโท วิปาโก’’ติฯ

ผสฺโส วิปาโก, ผสฺโส สุขเวทนิโย…เป.… สารมฺมโณ, อตฺถิ ตสฺส อาวฏฺฏนา…เป.… ปณิธีติ? อามนฺตาฯ สทฺโท วิปาโก, สทฺโท สุขเวทนิโย…เป.… สารมฺมโณ, อตฺถิ ตสฺส อาวฏฺฏนา…เป.… ปณิธีติ? น เหวํ วตฺตพฺเพ…เป.…ฯ

สทฺโท วิปาโก, สทฺโท น สุขเวทนิโย…เป.… อนารมฺมโณ, นตฺถิ ตสฺส อาวฏฺฏนา…เป.… ปณิธีติ? อามนฺตาฯ ผสฺโส วิปาโก, ผสฺโส น สุขเวทนิโย, น ทุกฺขเวทนิโย…เป.… อนารมฺมโณ, นตฺถิ ตสฺส อาวฏฺฏนา…เป.… ปณิธีติ? น เหวํ วตฺตพฺเพ…เป.…ฯ

[637] น วตฺตพฺพํ – ‘‘สทฺโท วิปาโก’’ติ? อามนฺตาฯ นนุ วุตฺตํ ภควตา – ‘‘โส ตสฺส กมฺมสฺส กตตฺตา อุปจิตตฺตา อุสฺสนฺนตฺตา วิปุลตฺตา พฺรหฺมสฺสโร โหติ กรวิกภาณี’’ติ [ทีฆนิกาเย]! อตฺเถว สุตฺตนฺโตติ? อามนฺตา ฯ เตน หิ สทฺโท วิปาโกติฯ

สทฺโท วิปาโกติกถา นิฏฺฐิตาฯ

12. ทฺวาทสมวคฺโค