เมนู

[615] อญฺญาเณ วิคเต ญาณวิปฺปยุตฺเต จิตฺเต วตฺตมาเน วตฺตพฺพํ – ‘‘ญาณี’’ติ? อามนฺตา ฯ อตีเตน ญาเณน ญาณี นิรุทฺเธน วิคเตน ปฏิปสฺสทฺเธน ญาเณน ญาณีติ? น เหวํ วตฺตพฺเพ…เป.…ฯ

ญาณกถา นิฏฺฐิตาฯ

11. เอกาทสมวคฺโค

(110) 5. ญาณํ จิตฺตวิปฺปยุตฺตนฺติกถา

[616] ญาณํ จิตฺตวิปฺปยุตฺตนฺติ? อามนฺตาฯ รูปํ นิพฺพานํ จกฺขายตนํ…เป.… โผฏฺฐพฺพายตนนฺติ? น เหวํ วตฺตพฺเพ…เป.… ญาณํ จิตฺตวิปฺปยุตฺตนฺติ? อามนฺตาฯ ปญฺญา ปญฺญินฺทฺริยํ ปญฺญาพลํ สมฺมาทิฏฺฐิ ธมฺมวิจยสมฺโพชฺฌงฺโค จิตฺตวิปฺปยุตฺโตติ? น เหวํ วตฺตพฺเพ…เป.… ปญฺญา ปญฺญินฺทฺริยํ ปญฺญาพลํ สมฺมาทิฏฺฐิ ธมฺมวิจยสมฺโพชฺฌงฺโค จิตฺตสมฺปยุตฺโตติ? อามนฺตาฯ ญาณํ จิตฺตสมฺปยุตฺตนฺติ? น เหวํ วตฺตพฺเพ…เป.…ฯ

ญาณํ จิตฺตวิปฺปยุตฺตนฺติ? อามนฺตาฯ กตมกฺขนฺธปริยาปนฺนนฺติ ? สงฺขารกฺขนฺธปริยาปนฺนนฺติฯ สงฺขารกฺขนฺโธ จิตฺตวิปฺปยุตฺโตติ? น เหวํ วตฺตพฺเพ…เป.… สงฺขารกฺขนฺโธ จิตฺตวิปฺปยุตฺโตติ? อามนฺตาฯ เวทนากฺขนฺโธ สญฺญากฺขนฺโธ จิตฺตวิปฺปยุตฺโตติ? น เหวํ วตฺตพฺเพ…เป.… ญาณํ สงฺขารกฺขนฺธปริยาปนฺนํ จิตฺตวิปฺปยุตฺตนฺติ? อามนฺตาฯ ปญฺญา สงฺขารกฺขนฺธปริยาปนฺนา จิตฺตวิปฺปยุตฺตาติ? น เหวํ วตฺตพฺเพ…เป.… ปญฺญา สงฺขารกฺขนฺธปริยาปนฺนา จิตฺตสมฺปยุตฺตาติ? อามนฺตาฯ ญาณํ สงฺขารกฺขนฺธปริยาปนฺนํ จิตฺตสมฺปยุตฺตนฺติ? น เหวํ วตฺตพฺเพ…เป.… ญาณํ สงฺขารกฺขนฺธปริยาปนฺนํ จิตฺตวิปฺปยุตฺตํ, ปญฺญา สงฺขารกฺขนฺธปริยาปนฺนา จิตฺตสมฺปยุตฺตาติ? อามนฺตาฯ สงฺขารกฺขนฺโธ เอกเทโส จิตฺตสมฺปยุตฺโต เอกเทโส จิตฺตวิปฺปยุตฺโตติ? น เหวํ วตฺตพฺเพ…เป.… สงฺขารกฺขนฺโธ เอกเทโส จิตฺตสมฺปยุตฺโต เอกเทโส จิตฺตวิปฺปยุตฺโตติ? อามนฺตาฯ เวทนากฺขนฺโธ สญฺญากฺขนฺโธ เอกเทโส จิตฺตสมฺปยุตฺโต เอกเทโส จิตฺตวิปฺปยุตฺโตติ? น เหวํ วตฺตพฺเพ…เป.…ฯ

[617] วตฺตพฺพํ – ‘‘ญาณํ จิตฺตวิปฺปยุตฺต’’นฺติ? อามนฺตาฯ อรหา จกฺขุวิญฺญาณสมงฺคี ‘‘ญาณี’’ติ วตฺตพฺโพติ? อามนฺตาฯ ญาณํ เตน จิตฺเตน สมฺปยุตฺตนฺติ? น เหวํ วตฺตพฺเพฯ เตน หิ ญาณํ จิตฺตวิปฺปยุตฺตนฺติฯ

อรหา จกฺขุวิญฺญาณสมงฺคี ‘‘ปญฺญวา’’ติ วตฺตพฺโพติ [สกวาทีปุจฺฉา วิย ทิสฺสติ]? อามนฺตาฯ ปญฺญา เตน จิตฺเตน สมฺปยุตฺตาติ? น เหวํ วตฺตพฺเพฯ เตน หิ ปญฺญา จิตฺตวิปฺปยุตฺตาติฯ

ญาณํ จิตฺตวิปฺปยุตฺตนฺติกถา นิฏฺฐิตาฯ

11. เอกาทสมวคฺโค

(111) 6. อิทํ ทุกฺขนฺติกถา

[618] ‘‘อิทํ ทุกฺข’’นฺติ วาจํ ภาสโต ‘‘อิทํ ทุกฺข’’นฺติ ญาณํ ปวตฺตตีติ? อามนฺตาฯ ‘‘อยํ ทุกฺขสมุทโย’’ติ วาจํ ภาสโต ‘‘อยํ ทุกฺขสมุทโย’’ติ ญาณํ ปวตฺตตีติ? น เหวํ วตฺตพฺเพ…เป.… ‘‘อิทํ ทุกฺข’’นฺติ วาจํ ภาสโต ‘‘อิทํ ทุกฺข’’นฺติ ญาณํ ปวตฺตตีติ? อามนฺตาฯ ‘‘อยํ ทุกฺขนิโรโธ’’ติ วาจํ ภาสโต ‘‘อยํ ทุกฺขนิโรโธ’’ติ ญาณํ ปวตฺตตีติ? น เหวํ วตฺตพฺเพ…เป.… ‘‘อิทํ ทุกฺข’’นฺติ วาจํ ภาสโต ‘‘อิทํ ทุกฺข’’นฺติ ญาณํ ปวตฺตตีติ? อามนฺตาฯ ‘‘อยํ มคฺโค’’ติ วาจํ ภาสโต ‘‘อยํ มคฺโค’’ติ ญาณํ ปวตฺตตีติ? น เหวํ วตฺตพฺเพ…เป.…ฯ

‘‘อยํ สมุทโย’’ติ วาจํ ภาสโต น จ ‘‘อยํ สมุทโย’’ติ ญาณํ ปวตฺตตีติ? อามนฺตาฯ ‘‘อิทํ ทุกฺข’’นฺติ วาจํ ภาสโต น จ ‘‘อิทํ ทุกฺข’’นฺติ ญาณํ ปวตฺตตีติ? น เหวํ วตฺตพฺเพ…เป.… ‘‘อยํ นิโรโธ’’ติ… ‘‘อยํ มคฺโค’’ติ วาจํ ภาสโต น จ ‘‘อยํ มคฺโค’’ติ ญาณํ ปวตฺตตีติ? อามนฺตาฯ ‘‘อิทํ ทุกฺข’’นฺติ วาจํ ภาสโต น จ ‘‘อิทํ ทุกฺข’’นฺติ ญาณํ ปวตฺตตีติ? น เหวํ วตฺตพฺเพ…เป.…ฯ

[619] ‘‘อิทํ ทุกฺข’’นฺติ วาจํ ภาสโต ‘‘อิทํ ทุกฺข’’นฺติ ญาณํ ปวตฺตตีติ? อามนฺตาฯ ‘‘รูปํ อนิจฺจ’’นฺติ วาจํ ภาสโต ‘‘รูปํ อนิจฺจ’’นฺติ ญาณํ ปวตฺตตีติ? น เหวํ วตฺตพฺเพ…เป.… ‘‘อิทํ ทุกฺข’’นฺติ วาจํ ภาสโต ‘‘อิทํ ทุกฺข’’นฺติ ญาณํ ปวตฺตตีติ? อามนฺตาฯ เวทนา… สญฺญา… สงฺขารา… ‘‘วิญฺญาณํ อนิจฺจ’’นฺติ วาจํ ภาสโต ‘‘วิญฺญาณํ อนิจฺจ’’นฺติ ญาณํ ปวตฺตตีติ? น เหวํ วตฺตพฺเพ…เป.…ฯ