(88) 5. ญาณํ อนารมฺมณนฺติกถา

[557] ญาณํ อนารมฺมณนฺติ? อามนฺตาฯ รูปํ นิพฺพานํ จกฺขายตนํ…เป.… โผฏฺฐพฺพายตนนฺติ? น เหวํ วตฺตพฺเพ…เป.… ญาณํ อนารมฺมณนฺติ? อามนฺตาฯ ปญฺญา ปญฺญินฺทฺริยํ ปญฺญาพลํ สมฺมาทิฏฺฐิ ธมฺมวิจยสมฺโพชฺฌงฺโค อนารมฺมโณติ? น เหวํ วตฺตพฺเพ…เป.… ปญฺญา ปญฺญินฺทฺริยํ ปญฺญาพลํ สมฺมาทิฏฺฐิ ธมฺมวิจยสมฺโพชฺฌงฺโค สารมฺมโณติ? อามนฺตาฯ ญาณํ สารมฺมณนฺติ? น เหวํ วตฺตพฺเพ…เป.…ฯ

ญาณํ อนารมฺมณนฺติ? อามนฺตาฯ กตมกฺขนฺธปริยาปนฺนนฺติ? สงฺขารกฺขนฺธปริยาปนฺนนฺติฯ สงฺขารกฺขนฺโธ อนารมฺมโณติ? น เหวํ วตฺตพฺเพ…เป.… สงฺขารกฺขนฺโธ อนารมฺมโณติ ? อามนฺตาฯ เวทนากฺขนฺโธ สญฺญากฺขนฺโธ วิญฺญาณกฺขนฺโธ อนารมฺมโณติ? น เหวํ วตฺตพฺเพ…เป.… ญาณํ สงฺขารกฺขนฺธปริยาปนฺนํ อนารมฺมณนฺติ? อามนฺตาฯ ปญฺญา สงฺขารกฺขนฺธปริยาปนฺนา อนารมฺมณาติ? น เหวํ วตฺตพฺเพ…เป.… ปญฺญา สงฺขารกฺขนฺธปริยาปนฺนา สารมฺมณาติ? อามนฺตาฯ ญาณํ สงฺขารกฺขนฺธปริยาปนฺนํ สารมฺมณนฺติ? น เหวํ วตฺตพฺเพ…เป.…ฯ

ญาณํ สงฺขารกฺขนฺธปริยาปนฺนํ อนารมฺมณํ, ปญฺญา สงฺขารกฺขนฺธปริยาปนฺนา สารมฺมณาติ? อามนฺตาฯ สงฺขารกฺขนฺโธ เอกเทโส สารมฺมโณ เอกเทโส อนารมฺมโณติ? น เหวํ วตฺตพฺเพ…เป.… สงฺขารกฺขนฺโธ เอกเทโส สารมฺมโณ เอกเทโส อนารมฺมโณติ? อามนฺตาฯ เวทนากฺขนฺโธ สญฺญากฺขนฺโธ วิญฺญาณกฺขนฺโธ เอกเทโส สารมฺมโณ เอกเทโส อนารมฺมโณติ? น เหวํ วตฺตพฺเพ…เป.…ฯ

[558] น วตฺตพฺพํ – ‘‘ญาณํ อนารมฺมณ’’นฺติ? อามนฺตาฯ อรหา จกฺขุวิญฺญาณสมงฺคี ญาณีติ วตฺตพฺโพติ? อามนฺตาฯ อตฺถิ ตสฺส ญาณสฺส อารมฺมณนฺติ? น เหวํ วตฺตพฺเพ…เป.… เตน หิ ญาณํ อนารมฺมณนฺติฯ อรหา จกฺขุวิญฺญาณสมงฺคี ปญฺญวาติ วตฺตพฺโพติ? อามนฺตาฯ อตฺถิ ตาย ปญฺญาย อารมฺมณนฺติ? น เหวํ วตฺตพฺเพ…เป.…ฯ เตน หิ ปญฺญา อนารมฺมณาติฯ

ญาณํ อนารมฺมณนฺติกถา นิฏฺฐิตาฯ

9. นวมวคฺโค

(89) 6. อตีตานาคตารมฺมณกถา

[559] อตีตารมฺมณํ จิตฺตํ อนารมฺมณนฺติ? อามนฺตาฯ นนุ อตีตารมฺมณนฺติ? อามนฺตาฯ หญฺจิ อตีตารมฺมณํ, โน จ วต เร วตฺตพฺเพ – ‘‘อตีตารมฺมณํ จิตฺตํ อนารมฺมณ’’นฺติฯ อตีตารมฺมณํ จิตฺตํ อนารมฺมณนฺติ มิจฺฉาฯ หญฺจิ วา ปน อนารมฺมณํ, โน จ วต เร วตฺตพฺเพ – ‘‘อตีตารมฺมณ’’นฺติฯ อนารมฺมณํ อตีตารมฺมณนฺติ มิจฺฉาฯ

อตีตารมฺมณํ จิตฺตํ อนารมฺมณนฺติ? อามนฺตาฯ นนุ อตีตํ อารพฺภ อตฺถิ อาวฏฺฏนา…เป.… ปณิธีติ? อามนฺตาฯ หญฺจิ อตีตํ อารพฺภ อตฺถิ อาวฏฺฏนา…เป.… ปณิธิ, โน จ วต เร วตฺตพฺเพ – ‘‘อตีตารมฺมณํ จิตฺตํ อนารมฺมณ’’นฺติฯ

[560] อนาคตารมฺมณํ จิตฺตํ อนารมฺมณนฺติ? อามนฺตาฯ นนุ อนาคตารมฺมณนฺติ? อามนฺตาฯ หญฺจิ อนาคตารมฺมณํ, โน จ วต เร วตฺตพฺเพ – ‘‘อนาคตารมฺมณํ จิตฺตํ อนารมฺมณ’’นฺติฯ อนาคตารมฺมณํ จิตฺตํ อนารมฺมณนฺติ มิจฺฉาฯ หญฺจิ วา ปน อนารมฺมณํ, โน จ วต เร วตฺตพฺเพ – ‘‘อนาคตารมฺมณ’’นฺติฯ อนารมฺมณํ อนาคตารมฺมณนฺติ มิจฺฉาฯ

อนาคตารมฺมณํ จิตฺตํ อนารมฺมณนฺติ? อามนฺตาฯ นนุ อนาคตํ อารพฺภ อตฺถิ อาวฏฺฏนา…เป.… ปณิธีติ? อามนฺตาฯ หญฺจิ อนาคตํ อารพฺภ อตฺถิ อาวฏฺฏนา…เป.… ปณิธิ, โน จ วต เร วตฺตพฺเพ – ‘‘อนาคตารมฺมณํ จิตฺตํ อนารมฺมณ’’นฺติฯ

ปจฺจุปฺปนฺนํ อารพฺภ อตฺถิ อาวฏฺฏนา…เป.… ปณิธิ, ปจฺจุปฺปนฺนารมฺมณํ จิตฺตํ สารมฺมณนฺติ? อามนฺตาฯ อตีตํ อารพฺภ อตฺถิ อาวฏฺฏนา…เป.… ปณิธิ, อตีตารมฺมณํ จิตฺตํ สารมฺมณนฺติ? น เหวํ วตฺตพฺเพ…เป.… ปจฺจุปฺปนฺนํ อารพฺภ อตฺถิ อาวฏฺฏนา…เป.… ปณิธิ, ปจฺจุปฺปนฺนารมฺมณํ จิตฺตํ สารมฺมณนฺติ? อามนฺตาฯ อนาคตํ อารพฺภ อตฺถิ อาวฏฺฏนา…เป.… ปณิธิ, อนาคตารมฺมณํ จิตฺตํ สารมฺมณนฺติ? น เหวํ วตฺตพฺเพ…เป.…ฯ

อตีตํ อารพฺภ อตฺถิ อาวฏฺฏนา…เป.… ปณิธิ, อตีตารมฺมณํ จิตฺตํ อนารมฺมณนฺติ? อามนฺตาฯ ปจฺจุปฺปนฺนํ อารพฺภ อตฺถิ อาวฏฺฏนา…เป.… ปณิธิ, ปจฺจุปฺปนฺนารมฺมณํ จิตฺตํ อนารมฺมณนฺติ? น เหวํ วตฺตพฺเพ…เป.…ฯ

อนาคตํ อารพฺภ อตฺถิ อาวฏฺฏนา…เป.… ปณิธิ, อนาคตารมฺมณํ จิตฺตํ อนารมฺมณนฺติ? อามนฺตาฯ ปจฺจุปฺปนฺนํ อารพฺภ อตฺถิ อาวฏฺฏนา…เป.… ปณิธิ, ปจฺจุปฺปนฺนารมฺมณํ จิตฺตํ อนารมฺมณนฺติ? น เหวํ วตฺตพฺเพ…เป.…ฯ