[476] จิตฺเตน สหชาตาติ กตฺวา เจตสิกาติ? อามนฺตาฯ ผสฺเสน สหชาตาติ กตฺวา ผสฺสสิกาติ [ผสฺสิกาติ (ปี. อฏฺฐ.)]? อามนฺตาฯ จิตฺเตน สหชาตาติ กตฺวา เจตสิกาติ? อามนฺตา ฯ เวทนาย… สญฺญาย… เจตนาย… สทฺธาย… วีริเยน… สติยา… สมาธินา… ปญฺญาย… ราเคน… โทเสน… โมเหน…เป.… อโนตฺตปฺเปน สหชาตาติ กตฺวา อโนตฺตปฺปาสิกาติ [อโนตฺตปฺปิกาติ (?)]? อามนฺตาฯ
[477] นตฺถิ เจตสิโก ธมฺโมติ? อามนฺตาฯ นนุ วุตฺตํ ภควตา –
‘‘จิตฺตญฺหิทํ เจตสิกา จ ธมฺมา,
อนตฺตโต สํวิทิตสฺส โหนฺติ;
หีนปฺปณีตํ ตทุภเย วิทิตฺวา,
สมฺมทฺทโส เวทิ ปโลกธมฺม’’นฺติฯ
อตฺเถว สุตฺตนฺโตติ? อามนฺตาฯ เตน หิ อตฺถิ เจตสิโก ธมฺโมติฯ
นตฺถิ เจตสิโก ธมฺโมติ? อามนฺตาฯ นนุ วุตฺตํ ภควตา – ‘‘อิธ, เกวฏฺฏ, ภิกฺขุ ปรสตฺตานํ ปรปุคฺคลานํ จิตฺตมฺปิ อาทิสติ เจตสิกมฺปิ อาทิสติ วิตกฺกิตมฺปิ อาทิสติ วิจาริตมฺปิ อาทิสติ – ‘เอวมฺปิ เต มโน, อิตฺถมฺปิ เต มโน, อิติปิ เต จิตฺต’’’นฺติ [ที. นิ. 1.485]ฯ อตฺเถว สุตฺตนฺโตติ? อามนฺตาฯ เตน หิ อตฺถิ เจตสิโก ธมฺโมติฯ
เจตสิกกถา นิฏฺฐิตาฯ
7. สตฺตมวคฺโค
(66) 4. ทานกถา
[478] เจตสิโก ธมฺโม ทานนฺติ? อามนฺตาฯ ลพฺภา เจตสิโก ธมฺโม ปเรสํ ทาตุนฺติ? น เหวํ วตฺตพฺเพ …เป.… ลพฺภา เจตสิโก ธมฺโม ปเรสํ ทาตุนฺติ? อามนฺตาฯ ลพฺภา ผสฺโส ปเรสํ ทาตุนฺติ? น เหวํ วตฺตพฺเพ …เป.… ลพฺภา เวทนา…เป.… สญฺญา… เจตนา… สทฺธา… วีริยํ… สติ… สมาธิ… ปญฺญา ปเรสํ ทาตุนฺติ? น เหวํ วตฺตพฺเพ…เป.…ฯ