อนาคามินา ตโย มคฺคา ปฏิลทฺธา เตหิ จ อปริหีโนติ, อนาคามี ตีหิ มคฺเคหิ สมนฺนาคโตติ? น เหวํ วตฺตพฺเพ…เป.…ฯ

สกทาคามินา ทฺเว ผลานิ ปฏิลทฺธานิ เตหิ จ อปริหีโนติ, สกทาคามี ทฺวีหิ ผเลหิ สมนฺนาคโตติ? อามนฺตาฯ สกทาคามินา ทฺเว มคฺคา ปฏิลทฺธา, เตหิ จ อปริหีโนติ, สกทาคามี ทฺวีหิ มคฺเคหิ สมนฺนาคโตติ? น เหวํ วตฺตพฺเพ…เป.…ฯ

สมนฺนาคตกถา นิฏฺฐิตาฯ

4. จตุตฺถวคฺโค

(37) 5. อุเปกฺขาสมนฺนาคตกถา

[397] อรหา ฉหิ อุเปกฺขาหิ สมนฺนาคโตติ? อามนฺตาฯ อรหา ฉหิ ผสฺเสหิ, ฉหิ เวทนาหิ, ฉหิ สญฺญาหิ…เป.… ฉหิ ปญฺญาหิ สมนฺนาคโตติ? น เหวํ วตฺตพฺเพ…เป.…ฯ

อรหา ฉหิ อุเปกฺขาหิ สมนฺนาคโตติ? อามนฺตาฯ อรหา จกฺขุนา รูปํ ปสฺสนฺโต โสเตน สทฺทํ สุณาติ, ฆาเนน คนฺธํ ฆายติ, ชิวฺหาย รสํ สายติ, กาเยน โผฏฺฐพฺพํ ผุสติ, มนสา ธมฺมํ วิชานาติ…เป.… มนสา ธมฺมํ วิชานนฺโต จกฺขุนา รูปํ ปสฺสติ, โสเตน สทฺทํ สุณาติ, ฆาเนน คนฺธํ ฆายติ, ชิวฺหาย รสํ สายติ, กาเยน โผฏฺฐพฺพํ ผุสตีติ? น เหวํ วตฺตพฺเพ…เป.…ฯ

อรหา ฉหิ อุเปกฺขาหิ สมนฺนาคโตติ? อามนฺตาฯ สตตํ สมิตํ อพฺโพกิณฺณํ ฉหิ อุเปกฺขาหิ สมนฺนาคโต สโมหิโต [สมาหิโต (สฺยา.)], ฉ อุเปกฺขาโย ปจฺจุปฏฺฐิตาติ? น เหวํ วตฺตพฺเพ…เป.…ฯ

น วตฺตพฺพํ – ‘‘อรหา ฉหิ อุเปกฺขาหิ สมนฺนาคโต’’ติ? อามนฺตาฯ นนุ อรหา ฉฬงฺคุเปกฺโขติ? อามนฺตาฯ หญฺจิ อรหา ฉฬงฺคุเปกฺโข, เตน วต เร วตฺตพฺเพ – ‘‘อรหา ฉหิ อุเปกฺขาหิ สมนฺนาคโต’’ติ…เป.…ฯ

อุเปกฺขาสมนฺนาคตกถา นิฏฺฐิตาฯ

4. จตุตฺถวคฺโค

(38) 6. โพธิยา พุทฺโธติกถา

[398] โพธิยา พุทฺโธติ? อามนฺตาฯ โพธิยา นิรุทฺธาย วิคตาย ปฏิปสฺสทฺธาย อพุทฺโธ โหตีติ? น เหวํ วตฺตพฺเพ…เป.…ฯ

โพธิยา พุทฺโธติ? อามนฺตาฯ อตีตาย โพธิยา พุทฺโธติ? น เหวํ วตฺตพฺเพ…เป.… อตีตาย โพธิยา พุทฺโธติ? อามนฺตาฯ ตาย โพธิยา โพธิกรณียํ กโรตีติ? น เหวํ วตฺตพฺเพ…เป.…ฯ

ตาย โพธิยา โพธิกรณียํ กโรตีติ? อามนฺตาฯ ตาย โพธิยา ทุกฺขํ ปริชานาติ, สมุทยํ ปชหติ, นิโรธํ สจฺฉิกโรติ, มคฺคํ ภาเวตีติ? น เหวํ วตฺตพฺเพ…เป.…ฯ

โพธิยา พุทฺโธติ? อามนฺตาฯ อนาคตาย โพธิยา พุทฺโธติ ? น เหวํ วตฺตพฺเพ…เป.…ฯ

อนาคตาย โพธิยา พุทฺโธติ? อามนฺตาฯ ตาย โพธิยา โพธิกรณียํ กโรตีติ? น เหวํ วตฺตพฺเพ…เป.…ฯ

ตาย โพธิยา โพธิกรณียํ กโรตีติ? อามนฺตาฯ ตาย โพธิยา ทุกฺขํ ปริชานาติ…เป.… มคฺคํ ภาเวตีติ? น เหวํ วตฺตพฺเพ…เป.…ฯ

ปจฺจุปฺปนฺนาย โพธิยา พุทฺโธ, ตาย โพธิยา โพธิกรณียํ กโรตีติ? อามนฺตาฯ อตีตาย โพธิยา พุทฺโธ, ตาย โพธิยา โพธิกรณียํ กโรตีติ? น เหวํ วตฺตพฺเพ…เป.…ฯ

ปจฺจุปฺปนฺนาย โพธิยา พุทฺโธ, ตาย โพธิยา ทุกฺขํ ปริชานาติ, สมุทยํ ปชหติ, นิโรธํ สจฺฉิกโรติ, มคฺคํ ภาเวตีติ? อามนฺตาฯ อตีตาย โพธิยา พุทฺโธ, ตาย โพธิยา ทุกฺขํ ปริชานาติ…เป.… มคฺคํ ภาเวตีติ? น เหวํ วตฺตพฺเพ…เป.…ฯ

ปจฺจุปฺปนฺนาย โพธิยา พุทฺโธ, ตาย โพธิยา โพธิกรณียํ กโรตีติ? อามนฺตาฯ อนาคตาย โพธิยา พุทฺโธ, ตาย โพธิยา โพธิกรณียํ กโรตีติ? น เหวํ วตฺตพฺเพ…เป.…ฯ