ตญฺเญว สาสวํ ตํ อนาสวนฺติ? น เหวํ วตฺตพฺเพ…เป.… ตญฺเญว สาสวํ ตํ อนาสวนฺติ? อามนฺตาฯ ราโค สาสโว หุตฺวา อนาสโว โหตีติ ? น เหวํ วตฺตพฺเพ…เป.… โทโส…เป.… โมโห…เป.… อโนตฺตปฺปํ สาสวํ หุตฺวา อนาสวํ โหตีติ? น เหวํ วตฺตพฺเพ…เป.…ฯ

น วตฺตพฺพํ – ‘‘อรหโต สพฺเพ ธมฺมา อนาสวา’’ติ? อามนฺตาฯ นนุ อรหา อนาสโวติ? อามนฺตาฯ หญฺจิ อรหา อนาสโว, เตน วต เร วตฺตพฺเพ – ‘‘อรหโต สพฺเพ ธมฺมา อนาสวา’’ติฯ

อนาสวกถา นิฏฺฐิตาฯ

4. จตุตฺถวคฺโค

(36) 4. สมนฺนาคตกถา

[393] อรหา จตูหิ ผเลหิ สมนฺนาคโตติ? อามนฺตาฯ อรหา จตูหิ ผสฺเสหิ จตูหิ เวทนาหิ จตูหิ สญฺญาหิ จตูหิ เจตนาหิ จตูหิ จิตฺเตหิ จตูหิ สทฺธาหิ จตูหิ วีริเยหิ จตูหิ สตีหิ จตูหิ สมาธีหิ จตูหิ ปญฺญาหิ สมนฺนาคโตติ? น เหวํ วตฺตพฺเพ…เป.…ฯ

อนาคามี ตีหิ ผเลหิ สมนฺนาคโตติ? อามนฺตาฯ อนาคามี ตีหิ ผสฺเสหิ…เป.… ตีหิ ปญฺญาหิ สมนฺนาคโตติ? น เหวํ วตฺตพฺเพ…เป.…ฯ

สกทาคามี ทฺวีหิ ผเลหิ สมนฺนาคโตติ? อามนฺตาฯ สกทาคามี ทฺวีหิ ผสฺเสหิ…เป.… ทฺวีหิ ปญฺญาหิ สมนฺนาคโตติ? น เหวํ วตฺตพฺเพ…เป.…ฯ

อรหา โสตาปตฺติผเลน สมนฺนาคโตติ? อามนฺตาฯ อรหา โสตาปนฺโน สตฺตกฺขตฺตุปรโม, โกลงฺโกโล, เอกพีชีติ? น เหวํ วตฺตพฺเพ…เป.… อรหา สกทาคามิผเลน สมนฺนาคโตติ? อามนฺตาฯ อรหา สกทาคามีติ? น เหวํ วตฺตพฺเพ …เป.… อรหา อนาคามิผเลน สมนฺนาคโตติ? อามนฺตาฯ อรหา อนาคามี, อนฺตราปรินิพฺพายี, อุปหจฺจปรินิพฺพายี, อสงฺขารปรินิพฺพายี, สสงฺขารปรินิพฺพายี, อุทฺธํโสโต อกนิฏฺฐคามีติ? น เหวํ วตฺตพฺเพ…เป.…ฯ

อนาคามี โสตาปตฺติผเลน สมนฺนาคโตติ? อามนฺตาฯ

อนาคามี โสตาปนฺโน สตฺตกฺขตฺตุปรโม, โกลงฺโกโล, เอกพีชีติ? น เหวํ วตฺตพฺเพ …เป.… อนาคามี สกทาคามิผเลน สมนฺนาคโตติ? อามนฺตาฯ อนาคามี สกทาคามีติ? น เหวํ วตฺตพฺเพ…เป.…ฯ

สกทาคามี โสตาปตฺติผเลน สมนฺนาคโตติ? อามนฺตาฯ สกทาคามี โสตาปนฺโน สตฺตกฺขตฺตุปรโม, โกลงฺโกโล, เอกพีชีติ? น เหวํ วตฺตพฺเพ…เป.…ฯ

[394] โสตาปตฺติผเลน สมนฺนาคโต ‘‘โสตาปนฺโน’’ติ วตฺตพฺโพติ? อามนฺตาฯ อรหา โสตาปตฺติผเลน สมนฺนาคโตติ? อามนฺตาฯ สฺเวว อรหา, โส โสตาปนฺโนติ? น เหวํ วตฺตพฺเพ…เป.…ฯ

สกทาคามิผเลน สมนฺนาคโต ‘‘สกทาคามี’’ติ วตฺตพฺโพติ? อามนฺตา ฯ อรหา สกทาคามิผเลน สมนฺนาคโตติ? อามนฺตาฯ สฺเวว อรหา, โส สกทาคามีติ? น เหวํ วตฺตพฺเพ…เป.…ฯ

อนาคามิผเลน สมนฺนาคโต ‘‘อนาคามี’’ติ วตฺตพฺโพติ? อามนฺตา ฯ อรหา อนาคามิผเลน สมนฺนาคโตติ? อามนฺตาฯ สฺเวว อรหา, โส อนาคามีติ? น เหวํ วตฺตพฺเพ…เป.…ฯ

โสตาปตฺติผเลน สมนฺนาคโต ‘‘โสตาปนฺโน’’ติ วตฺตพฺโพติ? อามนฺตาฯ อนาคามี โสตาปตฺติผเลน สมนฺนาคโตติ? อามนฺตาฯ สฺเวว อนาคามี, โส โสตาปนฺโนติ? น เหวํ วตฺตพฺเพ…เป.…ฯ

สกทาคามิผเลน สมนฺนาคโต ‘‘สกทาคามี’’ติ วตฺตพฺโพติ? อามนฺตาฯ อนาคามี สกทาคามิผเลน สมนฺนาคโตติ? อามนฺตาฯ สฺเวว อนาคามี, โส สกทาคามีติ? น เหวํ วตฺตพฺเพ…เป.…ฯ

โสตาปตฺติผเลน สมนฺนาคโต ‘‘โสตาปนฺโน’’ติ วตฺตพฺโพติ? อามนฺตาฯ สกทาคามี โสตาปตฺติผเลน สมนฺนาคโตติ? อามนฺตาฯ สฺเวว สกทาคามี, โส โสตาปนฺโนติ? น เหวํ วตฺตพฺเพ…เป.…ฯ

[395] อรหา โสตาปตฺติผเลน สมนฺนาคโตติ? อามนฺตาฯ นนุ อรหา โสตาปตฺติผลํ วีติวตฺโตติ? อามนฺตาฯ หญฺจิ อรหา โสตาปตฺติผลํ วีติวตฺโต, โน จ วต เร วตฺตพฺเพ – ‘‘อรหา โสตาปตฺติผเลน สมนฺนาคโต’’ติฯ

อรหา โสตาปตฺติผลํ วีติวตฺโต เตน สมนฺนาคโตติ? อามนฺตาฯ อรหา โสตาปตฺติมคฺคํ วีติวตฺโต, สกฺกายทิฏฺฐิํ วิจิกิจฺฉํ สีลพฺพตปรามาสํ, อปายคมนียํ ราคํ, อปายคมนียํ โทสํ, อปายคมนียํ โมหํ วีติวตฺโต เตน สมนฺนาคโตติ? น เหวํ วตฺตพฺเพ…เป.…ฯ

อรหา สกทาคามิผเลน สมนฺนาคโตติ? อามนฺตาฯ นนุ อรหา สกทาคามิผลํ วีติวตฺโตติ? อามนฺตาฯ หญฺจิ อรหา สกทาคามิผลํ วีติวตฺโต, โน จ วต เร วตฺตพฺเพ – ‘‘อรหา สกทาคามิผเลน สมนฺนาคโต’’ติฯ

อรหา สกทาคามิผลํ วีติวตฺโต เตน สมนฺนาคโตติ? อามนฺตาฯ อรหา สกทาคามิมคฺคํ วีติวตฺโต, โอฬาริกํ กามราคํ, โอฬาริกํ พฺยาปาทํ วีติวตฺโต เตน สมนฺนาคโตติ? น เหวํ วตฺตพฺเพ…เป.…ฯ

อรหา อนาคามิผเลน สมนฺนาคโตติ? อามนฺตาฯ นนุ อรหา อนาคามิผลํ วีติวตฺโตติ? อามนฺตาฯ หญฺจิ อรหา อนาคามิผลํ วีติวตฺโต, โน จ วต เร วตฺตพฺเพ – ‘‘อรหา อนาคามิผเลน สมนฺนาคโต’’ติฯ

อรหา อนาคามิผลํ วีติวตฺโต เตน สมนฺนาคโตติ? อามนฺตาฯ อรหา อนาคามิมคฺคํ วีติวตฺโต, อณุสหคตํ กามราคํ, อณุสหคตํ พฺยาปาทํ วีติวตฺโต เตน สมนฺนาคโตติ? น เหวํ วตฺตพฺเพ…เป.…ฯ

อนาคามี โสตาปตฺติผเลน สมนฺนาคโตติ? อามนฺตาฯ นนุ อนาคามี โสตาปตฺติผลํ วีติวตฺโตติ? อามนฺตาฯ หญฺจิ อนาคามี โสตาปตฺติผลํ วีติวตฺโต, โน จ วต เร วตฺตพฺเพ – ‘‘อนาคามี โสตาปตฺติผเลน สมนฺนาคโต’’ติฯ

อนาคามี โสตาปตฺติผลํ วีติวตฺโต เตน สมนฺนาคโตติ? อามนฺตา ฯ อนาคามี โสตาปตฺติมคฺคํ วีติวตฺโต, สกฺกายทิฏฺฐิํ…เป.… อปายคมนียํ โมหํ วีติวตฺโต เตน สมนฺนาคโตติ? น เหวํ วตฺตพฺเพ…เป.…ฯ

อนาคามี สกทาคามิผเลน สมนฺนาคโตติ? อามนฺตาฯ นนุ อนาคามี สกทาคามิผลํ วีติวตฺโตติ? อามนฺตาฯ หญฺจิ อนาคามี สกทาคามิผลํ วีติวตฺโต, โน จ วต เร วตฺตพฺเพ – ‘‘อนาคามี สกทาคามิผเลน สมนฺนาคโต’’ติฯ

อนาคามี สกทาคามิผลํ วีติวตฺโต เตน สมนฺนาคโตติ? อามนฺตาฯ อนาคามี สกทาคามิมคฺคํ วีติวตฺโต, โอฬาริกํ กามราคํ, โอฬาริกํ พฺยาปาทํ วีติวตฺโต เตน สมนฺนาคโตติ? น เหวํ วตฺตพฺเพ…เป.…ฯ

สกทาคามี โสตาปตฺติผเลน สมนฺนาคโตติ? อามนฺตาฯ นนุ สกทาคามี โสตาปตฺติผลํ วีติวตฺโตติ? อามนฺตาฯ หญฺจิ สกทาคามี โสตาปตฺติผลํ วีติวตฺโต, โน จ วต เร วตฺตพฺเพ – ‘‘สกทาคามี โสตาปตฺติผเลน สมนฺนาคโต’’ติฯ

สกทาคามี โสตาปตฺติผลํ วีติวตฺโต เตน สมนฺนาคโตติ? อามนฺตาฯ สกทาคามี โสตาปตฺติมคฺคํ วีติวตฺโต, สกฺกายทิฏฺฐิํ…เป.… อปายคมนียํ โมหํ วีติวตฺโต เตน สมนฺนาคโตติ? น เหวํ วตฺตพฺเพ…เป.…ฯ

[396] น วตฺตพฺพํ – ‘‘อรหา จตูหิ ผเลหิ สมนฺนาคโต’’ติ? อามนฺตา ฯ นนุ อรหตา จตฺตาริ ผลานิ ปฏิลทฺธานิ, เตหิ จ อปริหีโนติ? อามนฺตา ฯ หญฺจิ อรหตา จตฺตาริ ผลานิ ปฏิลทฺธานิ เตหิ จ อปริหีโน, เตน วต เร วตฺตพฺเพ – ‘‘อรหา จตูหิ ผเลหิ สมนฺนาคโต’’ติฯ

น วตฺตพฺพํ – ‘‘อนาคามี ตีหิ ผเลหิ สมนฺนาคโต’’ติ? อามนฺตาฯ นนุ อนาคามินา ตีณิ ผลานิ ปฏิลทฺธานิ, เตหิ จ อปริหีโนติ? อามนฺตาฯ หญฺจิ อนาคามินา ตีณิ ผลานิ ปฏิลทฺธานิ เตหิ จ อปริหีโน, เตน วต เร วตฺตพฺเพ – ‘‘อนาคามี ตีหิ ผเลหิ สมนฺนาคโต’’ติฯ

น วตฺตพฺพํ – ‘‘สกทาคามี ทฺวีหิ ผเลหิ สมนฺนาคโต’’ติ? อามนฺตาฯ นนุ สกทาคามินา ทฺเว ผลานิ ปฏิลทฺธานิ, เตหิ จ อปริหีโนติ? อามนฺตาฯ หญฺจิ สกทาคามินา ทฺเว ผลานิ ปฏิลทฺธานิ เตหิ จ อปริหีโน, เตน วต เร วตฺตพฺเพ – ‘‘สกทาคามี ทฺวีหิ ผเลหิ สมนฺนาคโต’’ติฯ

อรหตา จตฺตาริ ผลานิ ปฏิลทฺธานิ เตหิ จ อปริหีโนติ, อรหา จตูหิ ผเลหิ สมนฺนาคโตติ? อามนฺตาฯ อรหตา จตฺตาโร มคฺคา ปฏิลทฺธา เตหิ จ อปริหีโนติ, อรหา จตูหิ มคฺเคหิ สมนฺนาคโตติ? น เหวํ วตฺตพฺเพ…เป.…ฯ

อนาคามินา ตีณิ ผลานิ ปฏิลทฺธานิ เตหิ จ อปริหีโนติ, อนาคามี ตีหิ ผเลหิ สมนฺนาคโตติ? อามนฺตาฯ

อนาคามินา ตโย มคฺคา ปฏิลทฺธา เตหิ จ อปริหีโนติ, อนาคามี ตีหิ มคฺเคหิ สมนฺนาคโตติ? น เหวํ วตฺตพฺเพ…เป.…ฯ

สกทาคามินา ทฺเว ผลานิ ปฏิลทฺธานิ เตหิ จ อปริหีโนติ, สกทาคามี ทฺวีหิ ผเลหิ สมนฺนาคโตติ? อามนฺตาฯ สกทาคามินา ทฺเว มคฺคา ปฏิลทฺธา, เตหิ จ อปริหีโนติ, สกทาคามี ทฺวีหิ มคฺเคหิ สมนฺนาคโตติ? น เหวํ วตฺตพฺเพ…เป.…ฯ

สมนฺนาคตกถา นิฏฺฐิตาฯ

4. จตุตฺถวคฺโค

(37) 5. อุเปกฺขาสมนฺนาคตกถา

[397] อรหา ฉหิ อุเปกฺขาหิ สมนฺนาคโตติ? อามนฺตาฯ อรหา ฉหิ ผสฺเสหิ, ฉหิ เวทนาหิ, ฉหิ สญฺญาหิ…เป.… ฉหิ ปญฺญาหิ สมนฺนาคโตติ? น เหวํ วตฺตพฺเพ…เป.…ฯ

อรหา ฉหิ อุเปกฺขาหิ สมนฺนาคโตติ? อามนฺตาฯ อรหา จกฺขุนา รูปํ ปสฺสนฺโต โสเตน สทฺทํ สุณาติ, ฆาเนน คนฺธํ ฆายติ, ชิวฺหาย รสํ สายติ, กาเยน โผฏฺฐพฺพํ ผุสติ, มนสา ธมฺมํ วิชานาติ…เป.… มนสา ธมฺมํ วิชานนฺโต จกฺขุนา รูปํ ปสฺสติ, โสเตน สทฺทํ สุณาติ, ฆาเนน คนฺธํ ฆายติ, ชิวฺหาย รสํ สายติ, กาเยน โผฏฺฐพฺพํ ผุสตีติ? น เหวํ วตฺตพฺเพ…เป.…ฯ

อรหา ฉหิ อุเปกฺขาหิ สมนฺนาคโตติ? อามนฺตาฯ สตตํ สมิตํ อพฺโพกิณฺณํ ฉหิ อุเปกฺขาหิ สมนฺนาคโต สโมหิโต [สมาหิโต (สฺยา.)], ฉ อุเปกฺขาโย ปจฺจุปฏฺฐิตาติ? น เหวํ วตฺตพฺเพ…เป.…ฯ

น วตฺตพฺพํ – ‘‘อรหา ฉหิ อุเปกฺขาหิ สมนฺนาคโต’’ติ? อามนฺตาฯ นนุ อรหา ฉฬงฺคุเปกฺโขติ? อามนฺตาฯ หญฺจิ อรหา ฉฬงฺคุเปกฺโข, เตน วต เร วตฺตพฺเพ – ‘‘อรหา ฉหิ อุเปกฺขาหิ สมนฺนาคโต’’ติ…เป.…ฯ

อุเปกฺขาสมนฺนาคตกถา นิฏฺฐิตาฯ

4. จตุตฺถวคฺโค