ทฺเว นิโรธาติ? อามนฺตาฯ ปฏิสงฺขานิรุทฺธา สงฺขารา น ปุน อุปฺปชฺชนฺตีติ? อามนฺตาฯ อปฺปฏิสงฺขานิรุทฺธา สงฺขารา น ปุน อุปฺปชฺชนฺตีติ? น เหวํ วตฺตพฺเพ…เป.… เตน หิ น วตฺตพฺพํ – ‘‘ทฺเว นิโรธา’’ติฯ
นิโรธกถา นิฏฺฐิตาฯ
ทุติยวคฺโคฯ
ตสฺสุทฺทานํ –
ปรูปหาโร อญฺญาณํ, กงฺขา ปรวิตารณา;
วจีเภโท ทุกฺขาหาโร, จิตฺตฏฺฐิติ จ กุกฺกุฬา;
อนุปุพฺพาภิสมโย, โวหาโร จ นิโรธโกติฯ
3. ตติยวคฺโค
(21) 1. พลกถา
[354] ตถาคตพลํ สาวกสาธารณนฺติ? อามนฺตาฯ ตถาคตพลํ สาวกพลํ, สาวกพลํ ตถาคตพลนฺติ? น เหวํ วตฺตพฺเพ…เป.…ฯ
ตถาคตพลํ สาวกสาธารณนฺติ? อามนฺตาฯ ตญฺเญว ตถาคตพลํ ตํ สาวกพลํ, ตญฺเญว สาวกพลํ ตํ ตถาคตพลนฺติ? น เหวํ วตฺตพฺเพ…เป.…ฯ
ตถาคตพลํ สาวกสาธารณนฺติ? อามนฺตาฯ ยาทิสํ ตถาคตพลํ ตาทิสํ สาวกพลํ, ยาทิสํ สาวกพลํ ตาทิสํ ตถาคตพลนฺติ? น เหวํ วตฺตพฺเพ…เป.…ฯ
ตถาคตพลํ สาวกสาธารณนฺติ? อามนฺตาฯ ยาทิโส ตถาคตสฺส ปุพฺพโยโค ปุพฺพจริยา ธมฺมกฺขานํ ธมฺมเทสนา ตาทิโส สาวกสฺส ปุพฺพโยโค ปุพฺพจริยา ธมฺมกฺขานํ ธมฺมเทสนาติ? น เหวํ วตฺตพฺเพ…เป.…ฯ
ตถาคตพลํ สาวกสาธารณนฺติ? อามนฺตาฯ