2. ทุกํ

[188] สตฺตรส ธาตุโย น เหตูฯ ธมฺมธาตุ สิยา เหตุ, สิยา น เหตุฯ โสฬส ธาตุโย อเหตุกาฯ ทฺเว ธาตุโย สิยา สเหตุกา, สิยา อเหตุกาฯ โสฬส ธาตุโย อเหตุกาฯ ทฺเว ธาตุโย สิยา สเหตุกา, สิยา อเหตุกาฯ โสฬส ธาตุโย เหตุวิปฺปยุตฺตา ฯ ทฺเว ธาตุโย สิยา เหตุสมฺปยุตฺตา, สิยา เหตุวิปฺปยุตฺตาฯ โสฬส ธาตุโย น วตฺตพฺพา – ‘‘เหตุ เจว สเหตุกา จา’’ติปิ, ‘‘สเหตุกา เจว น จ เหตู’’ติปิฯ มโนวิญฺญาณธาตุ น วตฺตพฺพา – ‘‘เหตุ เจว สเหตุกา จา’’ติ, สิยา สเหตุกา เจว น จ เหตุ, สิยา น วตฺตพฺพา – ‘‘สเหตุกา เจว น จ เหตู’’ติฯ ธมฺมธาตุ สิยา เหตุ เจว สเหตุกา จ, สิยา สเหตุกา เจว น จ เหตุ, สิยา น วตฺตพฺพา – ‘‘เหตุ เจว สเหตุกา จา’’ติปิ, ‘‘สเหตุกา เจว น จ เหตู’’ติปิฯ โสฬส ธาตุโย น วตฺตพฺพา – ‘‘เหตู เจว เหตุสมฺปยุตฺตา จา’’ติปิ, ‘‘เหตุสมฺปยุตฺตา เจว น จ เหตู’’ติปิฯ มโนวิญฺญาณธาตุ น วตฺตพฺพา – ‘‘เหตุ เจว เหตุสมฺปยุตฺตา จา’’ติ, สิยา เหตุสมฺปยุตฺตา เจว น จ เหตุ, สิยา น วตฺตพฺพา – ‘‘เหตุสมฺปยุตฺตา เจว น จ เหตู’’ติฯ ธมฺมธาตุ สิยา เหตุ เจว เหตุสมฺปยุตฺตา จ, สิยา เหตุสมฺปยุตฺตา เจว น จ เหตุ, สิยา น วตฺตพฺพา – ‘‘เหตุ เจว เหตุสมฺปยุตฺตา จา’’ติปิ, ‘‘เหตุสมฺปยุตฺตา เจว น จ เหตู’’ติปิฯ โสฬส ธาตุโย น เหตุอเหตุกาฯ มโนวิญฺญาณธาตุ สิยา น เหตุสเหตุกา, สิยา น เหตุอเหตุกาฯ ธมฺมธาตุ สิยา น เหตุสเหตุกา, สิยา น เหตุอเหตุกา, สิยา น วตฺตพฺพา – ‘‘น เหตุสเหตุกา’’ติปิ, ‘‘น เหตุอเหตุกา’’ติปิฯ

สตฺตรส ธาตุโย สปฺปจฺจยาฯ ธมฺมธาตุ สิยา สปฺปจฺจยา, สิยา อปฺปจฺจยาฯ สตฺตรส ธาตุโย สงฺขตาฯ ธมฺมธาตุ สิยา สงฺขตา, สิยา อสงฺขตาฯ รูปธาตุ สนิทสฺสนาฯ สตฺตรส ธาตุโย อนิทสฺสนาฯ ทส ธาตุโย สปฺปฏิฆาฯ อฏฺฐ ธาตุโย อปฺปฏิฆาฯ ทส ธาตุโย รูปาฯ สตฺต ธาตุโย อรูปาฯ ธมฺมธาตุ สิยา รูปา, สิยา อรูปาฯ โสฬส ธาตุโย โลกิยาฯ ทฺเว ธาตุโย สิยา โลกิยา, สิยา โลกุตฺตรา; เกนจิ วิญฺเญยฺยา, เกนจิ น วิญฺเญยฺยาฯ

สตฺตรส ธาตุโย โน อาสวาฯ ธมฺมธาตุ สิยา อาสวา, สิยา โน อาสวาฯ โสฬส ธาตุโย สาสวาฯ ทฺเว ธาตุโย สิยา สาสวา, สิยา อนาสวาฯ โสฬส ธาตุโย อาสววิปฺปยุตฺตาฯ ทฺเว ธาตุโย สิยา อาสวสมฺปยุตฺตา, สิยา อาสววิปฺปยุตฺตาฯ โสฬส ธาตุโย น วตฺตพฺพา – ‘‘อาสวา เจว สาสวา จา’’ติ, ‘‘สาสวา เจว โน จ อาสวา’’ฯ มโนวิญฺญาณธาตุ น วตฺตพฺพา – ‘‘อาสโว เจว สาสวา จา’’ติ, สิยา สาสวา เจว โน จ อาสโว, สิยา น วตฺตพฺพา – ‘‘สาสวา เจว โน จ อาสโว’’ติฯ ธมฺมธาตุ สิยา อาสโว เจว สาสวา จ, สิยา สาสวา เจว โน จ อาสโว, สิยา น วตฺตพฺพา – ‘‘อาสโว เจว สาสวา จา’’ติปิ, ‘‘สาสวา เจว โน จ อาสโว’’ติปิฯ

โสฬส ธาตุโย น วตฺตพฺพา – ‘‘อาสวา เจว อาสวสมฺปยุตฺตา จา’’ติปิ, ‘‘อาสวสมฺปยุตฺตา เจว โน จ อาสวา’’ติปิฯ มโนวิญฺญาณธาตุ น วตฺตพฺพา – ‘‘อาสโว เจว อาสวสมฺปยุตฺตา จา’’ติ, สิยา อาสวสมฺปยุตฺตา เจว โน จ อาสโว, สิยา น วตฺตพฺพา – ‘‘อาสวสมฺปยุตฺตา เจว โน จ อาสโว’’ติฯ ธมฺมธาตุ สิยา อาสโว เจว อาสวสมฺปยุตฺตา จ, สิยา อาสวสมฺปยุตฺตา เจว โน จ อาสโว, สิยา น วตฺตพฺพา – ‘‘อาสโว เจว อาสวสมฺปยุตฺตา จา’’ติปิ, ‘‘อาสวสมฺปยุตฺตา เจว โน จ อาสโว’’ติปิฯ โสฬส ธาตุโย อาสววิปฺปยุตฺตสาสวาฯ

ทฺเว ธาตุโย สิยา อาสววิปฺปยุตฺตสาสวา, สิยา อาสววิปฺปยุตฺตอนาสวา , สิยา น วตฺตพฺพา – ‘‘อาสววิปฺปยุตฺตสาสวา’’ติปิ, ‘‘อาสววิปฺปยุตฺตอนาสวา’’ติปิฯ

สตฺตรส ธาตุโย โน สํโยชนาฯ ธมฺมธาตุ สิยา สํโยชนํ, สิยา โน สํโยชนํฯ โสฬส ธาตุโย สํโยชนิยาฯ ทฺเว ธาตุโย สิยา สํโยชนิยา, สิยา อสํโยชนิยาฯ โสฬส ธาตุโย สํโยชนวิปฺปยุตฺตาฯ ทฺเว ธาตุโย สิยา สํโยชนสมฺปยุตฺตา, สิยา สํโยชนวิปฺปยุตฺตาฯ โสฬส ธาตุโย น วตฺตพฺพา – ‘‘สํโยชนา เจว สํโยชนิยา จา’’ติ, สํโยชนิยา เจว โน จ สํโยชนาฯ มโนวิญฺญาณธาตุ น วตฺตพฺพา – ‘‘สํโยชนญฺเจว สํโยชนิยา จา’’ติ, สิยา สํโยชนิยา เจว โน จ สํโยชนํ, สิยา น วตฺตพฺพา – ‘‘สํโยชนิยา เจว โน จ สํโยชน’’นฺติฯ ธมฺมธาตุ สิยา สํโยชนญฺเจว สํโยชนิยา จ, สิยา สํโยชนิยา เจว โน จ สํโยชนํ, สิยา น วตฺตพฺพา – ‘‘สํโยชนญฺเจว สํโยชนิยา จา’’ติปิ, ‘‘สํโยชนิยา เจว โน จ สํโยชน’’นฺติปิฯ โสฬส ธาตุโย น วตฺตพฺพา – ‘‘สํโยชนา เจว สํโยชนสมฺปยุตฺตา จา’’ติปิ, ‘‘สํโยชนสมฺปยุตฺตา เจว โน จ สํโยชนา’’ติปิฯ มโนวิญฺญาณธาตุ น วตฺตพฺพา – ‘‘สํโยชนญฺเจว สํโยชนสมฺปยุตฺตา จา’’ติ, สิยา สํโยชนสมฺปยุตฺตา เจว โน จ สํโยชนํ, สิยา น วตฺตพฺพา – ‘‘สํโยชนสมฺปยุตฺตา เจว โน จ สํโยชน’’นฺติฯ ธมฺมธาตุ สิยา สํโยชนญฺเจว สํโยชนสมฺปยุตฺตา จ, สิยา สํโยชนสมฺปยุตฺตา เจว โน จ สํโยชนํ, สิยา น วตฺตพฺพา – ‘‘สํโยชนญฺเจว สํโยชนสมฺปยุตฺตา จา’’ติปิ, ‘‘สํโยชนสมฺปยุตฺตา เจว โน จ สํโยชน’’นฺติปิฯ โสฬส ธาตุโย สํโยชนวิปฺปยุตฺตสํโยชนิยาฯ ทฺเว ธาตุโย สิยา สํโยชนวิปฺปยุตฺตสํโยชนิยา, สิยา สํโยชนวิปฺปยุตฺตอสํโยชนิยา, สิยา น วตฺตพฺพา – ‘‘สํโยชนวิปฺปยุตฺตสํโยชนิยา’’ติปิ, ‘‘สํโยชนวิปฺปยุตฺตอสํโยชนิยา’’ติปิฯ

สตฺตรส ธาตุโย โน คนฺถาฯ ธมฺมธาตุ สิยา คนฺโถ, สิยา โน คนฺโถฯ โสฬส ธาตุโย คนฺถนิยาฯ ทฺเว ธาตุโย สิยา คนฺถนิยา, สิยา อคนฺถนิยาฯ โสฬส ธาตุโย คนฺถวิปฺปยุตฺตาฯ ทฺเว ธาตุโย สิยา คนฺถสมฺปยุตฺตา, สิยา คนฺถวิปฺปยุตฺตาฯ

โสฬส ธาตุโย น วตฺตพฺพา – ‘‘คนฺถา เจว คนฺถนิยา จา’’ติ, คนฺถนิยา เจว โน จ คนฺถาฯ มโนวิญฺญาณธาตุ น วตฺตพฺพา – ‘‘คนฺโถ เจว คนฺถนิยา จา’’ติ, สิยา คนฺถนิยา เจว โน จ คนฺโถ, สิยา น วตฺตพฺพา – ‘‘คนฺถนิยา เจว โน จ คนฺโถ’’ติฯ ธมฺมธาตุ สิยา คนฺโถ เจว คนฺถนิยา จ, สิยา คนฺถนิยา เจว โน จ คนฺโถ, สิยา น วตฺตพฺพา – ‘‘คนฺโถ เจว คนฺถนิยา จา’’ติปิ, ‘‘คนฺถนิยา เจว โน จ คนฺโถ’’ติปิฯ โสฬส ธาตุโย น วตฺตพฺพา – ‘‘คนฺถา เจว คนฺถสมฺปยุตฺตา จา’’ติปิ, ‘‘คนฺถสมฺปยุตฺตา เจว โน จ คนฺถา’’ติปิฯ มโนวิญฺญาณธาตุ น วตฺตพฺพา – ‘‘คนฺโถ เจว คนฺถสมฺปยุตฺตา จา’’ติ, สิยา คนฺถสมฺปยุตฺตา เจว โน จ คนฺโถ, สิยา น วตฺตพฺพา – ‘‘คนฺถสมฺปยุตฺตา เจว โน จ คนฺโถ’’ติฯ ธมฺมธาตุ สิยา คนฺโถ เจว คนฺถสมฺปยุตฺตา จ, สิยา คนฺถสมฺปยุตฺตา เจว โน จ คนฺโถ, สิยา น วตฺตพฺพา – ‘‘คนฺโถ เจว คนฺถสมฺปยุตฺตา จา’’ติปิ, ‘‘คนฺถสมฺปยุตฺตา เจว โน จ คนฺโถ’’ติปิฯ โสฬส ธาตุโย คนฺถวิปฺปยุตฺตคนฺถนิยาฯ ทฺเว ธาตุโย สิยา คนฺถวิปฺปยุตฺตคนฺถนิยา, สิยา คนฺถวิปฺปยุตฺตอคนฺถนิยา, สิยา น วตฺตพฺพา – ‘‘คนฺถวิปฺปยุตฺตคนฺถนิยา’’ติปิ, ‘‘คนฺถวิปฺปยุตฺตอคนฺถนิยา’’ติปิฯ

สตฺตรส ธาตุโย โน โอฆา…เป.… โน โยคา…เป.… โน นีวรณาฯ ธมฺมธาตุ สิยา นีวรณํ, สิยา โน นีวรณํฯ โสฬส ธาตุโย นีวรณิยาฯ ทฺเว ธาตุโย สิยา นีวรณิยา, สิยา อนีวรณิยาฯ โสฬส ธาตุโย นีวรณวิปฺปยุตฺตาฯ ทฺเว ธาตุโย สิยา นีวรณสมฺปยุตฺตา, สิยา นีวรณวิปฺปยุตฺตาฯ โสฬส ธาตุโย น วตฺตพฺพา – ‘‘นีวรณา เจว นีวรณิยา จา’’ติ, นีวรณิยา เจว โน จ นีวรณาฯ มโนวิญฺญาณธาตุ น วตฺตพฺพา – ‘‘นีวรณญฺเจว นีวรณิยา จา’’ติ, สิยา นีวรณิยา เจว โน จ นีวรณํ, สิยา น วตฺตพฺพา – ‘‘นีวรณิยา เจว โน จ นีวรณ’’นฺติฯ ธมฺมธาตุ สิยา นีวรณญฺเจว นีวรณิยา จ, สิยา นีวรณิยา เจว โน จ นีวรณํ , สิยา น วตฺตพฺพา – ‘‘นีวรณญฺเจว นีวรณิยา จา’’ติปิ, ‘‘นีวรณิยา เจว โน จ นีวรณ’’นฺติปิฯ โสฬส ธาตุโย น วตฺตพฺพา – ‘‘นีวรณา เจว นีวรณสมฺปยุตฺตา จา’’ติปิ, ‘‘นีวรณสมฺปยุตฺตา เจว โน จ นีวรณา’’ติปิฯ

มโนวิญฺญาณธาตุ น วตฺตพฺพา – ‘‘นีวรณญฺเจว นีวรณสมฺปยุตฺตา จา’’ติ, สิยา นีวรณสมฺปยุตฺตา เจว โน จ นีวรณํ, สิยา น วตฺตพฺพา – ‘‘นีวรณสมฺปยุตฺตา เจว โน จ นีวรณ’’นฺติฯ ธมฺมธาตุ สิยา นีวรณญฺเจว นีวรณสมฺปยุตฺตา จ, สิยา นีวรณสมฺปยุตฺตา เจว โน จ นีวรณํ, สิยา น วตฺตพฺพา – ‘‘นีวรณญฺเจว นีวรณสมฺปยุตฺตา จา’’ติปิ, ‘‘นีวรณสมฺปยุตฺตา เจว โน จ นีวรณ’’นฺติปิฯ โสฬส ธาตุโย นีวรณวิปฺปยุตฺตนีวรณิยาฯ ทฺเว ธาตุโย สิยา นีวรณวิปฺปยุตฺตนีวรณิยา, สิยา นีวรณวิปฺปยุตฺตอนีวรณิยา, สิยา น วตฺตพฺพา – ‘‘นีวรณวิปฺปยุตฺตนีวรณิยา’’ติปิ, ‘‘นีวรณวิปฺปยุตฺตอนีวรณิยา’’ติปิฯ

สตฺตรส ธาตุโย โน ปรามาสาฯ ธมฺมธาตุ สิยา ปรามาโส, สิยา โน ปรามาโสฯ โสฬส ธาตุโย ปรามฏฺฐาฯ ทฺเว ธาตุโย สิยา ปรามฏฺฐา, สิยา อปรามฏฺฐาฯ โสฬส ธาตุโย ปรามาสวิปฺปยุตฺตาฯ มโนวิญฺญาณธาตุ สิยา ปรามาสสมฺปยุตฺตา, สิยา ปรามาสวิปฺปยุตฺตาฯ ธมฺมธาตุ สิยา ปรามาสสมฺปยุตฺตา, สิยา ปรามาสวิปฺปยุตฺตา, สิยา น วตฺตพฺพา – ‘‘ปรามาสสมฺปยุตฺตา’’ติปิ , ‘‘ปรามาสวิปฺปยุตฺตา’’ติปิฯ โสฬส ธาตุโย น วตฺตพฺพา – ‘‘ปรามาสา เจว ปรามฏฺฐา จาติ ปรามฏฺฐา เจว โน จ ปรามาสา’’ฯ มโนวิญฺญาณธาตุ น วตฺตพฺพา – ‘‘ปรามาโส เจว ปรามฏฺฐา จา’’ติ, สิยา ปรามฏฺฐา เจว โน จ ปรามาโส, สิยา น วตฺตพฺพา – ‘‘ปรามฏฺฐา เจว โน จ ปรามาโส’’ติฯ ธมฺมธาตุ สิยา ปรามาโส เจว ปรามฏฺฐา จ, สิยา ปรามฏฺฐา เจว โน จ ปรามาโส, สิยา น วตฺตพฺพา – ‘‘ปรามาโส เจว ปรามฏฺฐา จา’’ติปิ, ‘‘ปรามฏฺฐา เจว โน จ ปรามาโส’’ติปิฯ โสฬส ธาตุโย ปรามาสวิปฺปยุตฺตปรามฏฺฐาฯ ทฺเว ธาตุโย สิยา ปรามาสวิปฺปยุตฺตปรามฏฺฐา, สิยา ปรามาสวิปฺปยุตฺตอปรามฏฺฐา, สิยา น วตฺตพฺพา – ‘‘ปรามาสวิปฺปยุตฺตปรามฏฺฐา’’ติปิ, ‘‘ปรามาสวิปฺปยุตฺตอปรามฏฺฐา’’ติปิฯ

ทส ธาตุโย อนารมฺมณาฯ สตฺต ธาตุโย สารมฺมณาฯ ธมฺมธาตุ สิยา สารมฺมณา, สิยา อนารมฺมณาฯ สตฺต ธาตุโย จิตฺตาฯ เอกาทส ธาตุโย โน จิตฺตาฯ สตฺตรส ธาตุโย อเจตสิกาฯ ธมฺมธาตุ สิยา เจตสิกา, สิยา อเจตสิกาฯ ทส ธาตุโย จิตฺตวิปฺปยุตฺตาฯ ธมฺมธาตุ สิยา จิตฺตสมฺปยุตฺตา, สิยา จิตฺตวิปฺปยุตฺตาฯ สตฺต ธาตุโย น วตฺตพฺพา – ‘‘จิตฺเตน สมฺปยุตฺตา’’ติปิ, ‘‘จิตฺเตน วิปฺปยุตฺตา’’ติปิฯ ทส ธาตุโย จิตฺตวิสํสฏฺฐาฯ

ธมฺมธาตุ สิยา จิตฺตสํสฏฺฐา , สิยา จิตฺตวิสํสฏฺฐาฯ สตฺต ธาตุโย น วตฺตพฺพา – ‘‘จิตฺเตน สํสฏฺฐา’’ติปิ, ‘‘จิตฺเตน วิสํสฏฺฐา’’ติปิฯ

ทฺวาทส ธาตุโย โน จิตฺตสมุฏฺฐานาฯ ฉ ธาตุโย สิยา จิตฺตสมุฏฺฐานา, สิยา โน จิตฺตสมุฏฺฐานาฯ สตฺตรส ธาตุโย โน จิตฺตสหภุโนฯ ธมฺมธาตุ สิยา จิตฺตสหภู, สิยา โน จิตฺตสหภูฯ สตฺตรส ธาตุโย โน จิตฺตานุปริวตฺติโนฯ ธมฺมธาตุ สิยา จิตฺตานุปริวตฺตี, สิยา โน จิตฺตานุปริวตฺตีฯ สตฺตรส ธาตุโย โน จิตฺตสํสฏฺฐสมุฏฺฐานาฯ ธมฺมธาตุ สิยา จิตฺตสํสฏฺฐสมุฏฺฐานา, สิยา โน จิตฺตสํสฏฺฐสมุฏฺฐานาฯ สตฺตรส ธาตุโย โน จิตฺตสํสฏฺฐสมุฏฺฐานสหภุโนฯ ธมฺมธาตุ สิยา จิตฺตสํสฏฺฐสมุฏฺฐานสหภู, สิยา โน จิตฺตสํสฏฺฐสมุฏฺฐานสหภูฯ สตฺตรส ธาตุโย โน จิตฺตสํสฏฺฐสมุฏฺฐานานุปริวตฺติโนฯ ธมฺมธาตุ สิยา จิตฺตสํสฏฺฐสมุฏฺฐานานุปริวตฺตี, สิยา โน จิตฺตสํสฏฺฐสมุฏฺฐานานุปริวตฺตีฯ ทฺวาทส ธาตุโย อชฺฌตฺติกาฯ ฉ ธาตุโย พาหิราฯ

นว ธาตุโย อุปาทาฯ อฏฺฐ ธาตุโย โน อุปาทาฯ ธมฺมธาตุ สิยา อุปาทา, สิยา โน อุปาทาฯ ทส ธาตุโย อุปาทินฺนาฯ สทฺทธาตุ อนุปาทินฺนาฯ สตฺตธาตุโย สิยา อุปาทินฺนา, สิยา อนุปาทินฺนาฯ สตฺตรส ธาตุโย โน อุปาทานาฯ ธมฺมธาตุ สิยา อุปาทานํ, สิยา โน อุปาทานํฯ โสฬส ธาตุโย อุปาทานิยาฯ ทฺเว ธาตุโย สิยา อุปาทานิยา, สิยา อนุปาทานิยาฯ โสฬส ธาตุโย อุปาทานวิปฺปยุตฺตาฯ ทฺเว ธาตุโย สิยา อุปาทานสมฺปยุตฺตา, สิยา อุปาทานวิปฺปยุตฺตาฯ โสฬส ธาตุโย น วตฺตพฺพา – ‘‘อุปาทานา เจว อุปาทานิยา จา’’ติ, ‘‘อุปาทานิยา เจว โน จ อุปาทานา’’ฯ มโนวิญฺญาณธาตุ น วตฺตพฺพา – ‘‘อุปาทานญฺเจว อุปาทานิยา จา’’ติ, สิยา อุปาทานิยา เจว โน จ อุปาทานํ, สิยา น วตฺตพฺพา – ‘‘อุปาทานิยา เจว โน จ อุปาทาน’’นฺติฯ ธมฺมธาตุ สิยา อุปาทานญฺเจว อุปาทานิยา จ, สิยา อุปาทานิยา เจว โน จ อุปาทานํ, สิยา น วตฺตพฺพา – ‘‘อุปาทานญฺเจว อุปาทานิยา จา’’ติปิ, ‘‘อุปาทานิยา เจว โน จ อุปาทาน’’นฺติปิฯ

โสฬส ธาตุโย น วตฺตพฺพา – ‘‘อุปาทานา เจว อุปาทานสมฺปยุตฺตา จา’’ติปิ, ‘‘อุปาทานสมฺปยุตฺตา เจว โน จ อุปาทานา’’ติปิฯ

มโนวิญฺญาณธาตุ น วตฺตพฺพา – ‘‘อุปาทานญฺเจว อุปาทานสมฺปยุตฺตา จา’’ติ, สิยา อุปาทานสมฺปยุตฺตา เจว โน จ อุปาทานํ, สิยา น วตฺตพฺพา – ‘‘อุปาทานสมฺปยุตฺตา เจว โน จ อุปาทาน’’นฺติฯ ธมฺมธาตุ สิยา อุปาทานญฺเจว อุปาทานสมฺปยุตฺตา จ, สิยา อุปาทานสมฺปยุตฺตา เจว โน จ อุปาทานํ, สิยา น วตฺตพฺพา – ‘‘อุปาทานญฺเจว อุปาทานสมฺปยุตฺตา จา’’ติปิ, ‘‘อุปาทานสมฺปยุตฺตา เจว โน จ อุปาทาน’’นฺติปิฯ โสฬส ธาตุโย อุปาทานวิปฺปยุตฺตอุปาทานิยาฯ ทฺเว ธาตุโย สิยา อุปาทานวิปฺปยุตฺตอุปาทานิยา, สิยา อุปาทานวิปฺปยุตฺตอนุปาทานิยา, สิยา น วตฺตพฺพา – ‘‘อุปาทานวิปฺปยุตฺตอุปาทานิยา’’ติปิ, ‘‘อุปาทานวิปฺปยุตฺตอนุปาทานิยา’’ติปิฯ

สตฺตรส ธาตุโย โน กิเลสาฯ ธมฺมธาตุ สิยา กิเลสา, สิยา โน กิเลสาฯ โสฬส ธาตุโย สํกิเลสิกาฯ ทฺเว ธาตุโย สิยา สํกิเลสิกา, สิยา อสํกิเลสิกาฯ โสฬส ธาตุโย อสํกิลิฏฺฐาฯ ทฺเว ธาตุโย สิยา สํกิลิฏฺฐา, สิยา อสํกิลิฏฺฐาฯ โสฬส ธาตุโย กิเลสวิปฺปยุตฺตาฯ ทฺเว ธาตุโย สิยา กิเลสสมฺปยุตฺตา, สิยา กิเลสวิปฺปยุตฺตาฯ โสฬส ธาตุโย น วตฺตพฺพา – ‘‘กิเลสา เจว สํกิเลสิกา จา’’ติ, สํกิเลสิกา เจว โน จ กิเลสาฯ มโนวิญฺญาณธาตุ น วตฺตพฺพา – ‘‘กิเลโส เจว สํกิเลสิกา จา’’ติ, สิยา สํกิเลสิกา เจว โน จ กิเลโส, สิยา น วตฺตพฺพา – ‘‘สํกิเลสิกา เจว โน จ กิเลโส’’ติฯ ธมฺมธาตุ สิยา กิเลโส เจว สํกิเลสิกา จ, สิยา สํกิเลสิกา เจว โน จ กิเลโส, สิยา น วตฺตพฺพา – ‘‘กิเลโส เจว สํกิเลสิกา จา’’ติปิ, ‘‘สํกิเลสิกา เจว โน จ กิเลโส’’ติปิฯ

โสฬส ธาตุโย น วตฺตพฺพา – ‘‘กิเลสา เจว สํกิลิฏฺฐา จา’’ติปิ, ‘‘สํกิลิฏฺฐา เจว โน จ กิเลสา’’ติปิฯ มโนวิญฺญาณธาตุ น วตฺตพฺพา – ‘‘กิเลโส เจว สํกิลิฏฺฐา จา’’ติ, สิยา สํกิลิฏฺฐา เจว โน จ กิเลโส, สิยา น วตฺตพฺพา – ‘‘สํกิลิฏฺฐา เจว โน จ กิเลโส’’ติฯ ธมฺมธาตุ สิยา กิเลโส เจว สํกิลิฏฺฐา จ, สิยา สํกิลิฏฺฐา เจว โน จ กิเลโส, สิยา น วตฺตพฺพา – ‘‘กิเลโส เจว สํกิลิฏฺฐา จา’’ติปิ, ‘‘สํกิลิฏฺฐา เจว โน จ กิเลโส’’ติปิฯ โสฬส ธาตุโย น วตฺตพฺพา – ‘‘กิเลสา เจว กิเลสสมฺปยุตฺตา จา’’ติปิ, ‘‘กิเลสสมฺปยุตฺตา เจว โน จ กิเลสา’’ติปิฯ

มโนวิญฺญาณธาตุ น วตฺตพฺพา – ‘‘กิเลโส เจว กิเลสสมฺปยุตฺตา จา’’ติ, สิยา กิเลสสมฺปยุตฺตา เจว โน จ กิเลโส, สิยา น วตฺตพฺพา – ‘‘กิเลสสมฺปยุตฺตา เจว โน จ กิเลโส’’ติฯ ธมฺมธาตุ สิยา กิเลโส เจว กิเลสสมฺปยุตฺตา จ, สิยา กิเลสสมฺปยุตฺตา เจว โน จ กิเลโส, สิยา น วตฺตพฺพา – ‘‘กิเลโส เจว กิเลสสมฺปยุตฺตา จา’’ติปิ, ‘‘กิเลสสมฺปยุตฺตา เจว โน จ กิเลโส’’ติปิฯ โสฬส ธาตุโย กิเลสวิปฺปยุตฺตสํกิเลสิกาฯ ทฺเว ธาตุโย สิยา กิเลสวิปฺปยุตฺตสํกิเลสิกา, สิยา กิเลสวิปฺปยุตฺตอสํกิเลสิกา, สิยา น วตฺตพฺพา – ‘‘กิเลสวิปฺปยุตฺตสํกิเลสิกา’’ติปิ, ‘‘กิเลสวิปฺปยุตฺตอสํกิเลสิกา’’ติปิฯ

โสฬส ธาตุโย น ทสฺสเนน ปหาตพฺพาฯ ทฺเว ธาตุโย สิยา ทสฺสเนน ปหาตพฺพา, สิยา น ทสฺสเนน ปหาตพฺพาฯ โสฬส ธาตุโย น ภาวนาย ปหาตพฺพาฯ ทฺเว ธาตุโย สิยา ภาวนาย ปหาตพฺพา, สิยา น ภาวนาย ปหาตพฺพาฯ โสฬส ธาตุโย น ทสฺสเนน ปหาตพฺพเหตุกาฯ ทฺเว ธาตุโย สิยา ทสฺสเนน ปหาตพฺพเหตุกา, สิยา น ทสฺสเนน ปหาตพฺพเหตุกาฯ โสฬส ธาตุโย น ภาวนาย ปหาตพฺพเหตุกาฯ ทฺเว ธาตุโย สิยา ภาวนาย ปหาตพฺพเหตุกา, สิยา น ภาวนาย ปหาตพฺพเหตุกาฯ

ปนฺนรส ธาตุโย อวิตกฺกาฯ มโนธาตุ สวิตกฺกาฯ ทฺเว ธาตุโย สิยา สวิตกฺกา, สิยา อวิตกฺกาฯ ปนฺนรส ธาตุโย อวิจาราฯ มโนธาตุ สวิจาราฯ ทฺเว ธาตุโย สิยา สวิจารา, สิยา อวิจาราฯ โสฬส ธาตุโย อปฺปีติกาฯ ทฺเว ธาตุโย สิยา สปฺปีติกา, สิยา อปฺปีติกาฯ โสฬส ธาตุโย น ปีติสหคตาฯ ทฺเว ธาตุโย สิยา ปีติสหคตา, สิยา น ปีติสหคตาฯ ปนฺนรส ธาตุโย น สุขสหคตาฯ ติสฺโส ธาตุโย สิยา สุขสหคตา, สิยา น สุขสหคตาฯ เอกาทส ธาตุโย น อุเปกฺขาสหคตาฯ ปญฺจ ธาตุโย อุเปกฺขาสหคตาฯ ทฺเว ธาตุโย สิยา อุเปกฺขาสหคตา, สิยา น อุเปกฺขาสหคตาฯ

โสฬส ธาตุโย กามาวจราฯ ทฺเว ธาตุโย สิยา กามาวจรา, สิยา น กามาวจราฯ โสฬส ธาตุโย น รูปาวจราฯ ทฺเว ธาตุโย สิยา รูปาวจรา, สิยา น รูปาวจราฯ โสฬส ธาตุโย น อรูปาวจราฯ

ทฺเว ธาตุโย สิยา อรูปาวจรา, สิยา น อรูปาวจราฯ โสฬส ธาตุโย ปริยาปนฺนาฯ ทฺเว ธาตุโย สิยา ปริยาปนฺนา, สิยา อปริยาปนฺนาฯ โสฬส ธาตุโย อนิยฺยานิกาฯ ทฺเว ธาตุโย สิยา นิยฺยานิกา, สิยา อนิยฺยานิกาฯ โสฬส ธาตุโย อนิยตาฯ ทฺเว ธาตุโย สิยา นิยตา, สิยา อนิยตาฯ โสฬส ธาตุโย สอุตฺตราฯ ทฺเว ธาตุโย สิยา สอุตฺตรา, สิยา อนุตฺตราฯ โสฬส ธาตุโย อรณาฯ ทฺเว ธาตุโย สิยา สรณา, สิยา อรณาติฯ

ปญฺหาปุจฺฉกํฯ

ธาตุวิภงฺโค นิฏฺฐิโตฯ

4. สจฺจวิภงฺโค

1. สุตฺตนฺตภาชนียํ