เมนู

[1036] ปญฺจนฺนํ ขนฺธานํ กติ ทิฏฺฐา, กติ สุตา, กติ มุตา, กติ วิญฺญาตา, กติ น ทิฏฺฐา น สุตา น มุตา น วิญฺญาตา…เป.… สตฺตนฺนํ จิตฺตานํ กติ ทิฏฺฐา, กติ สุตา, กติ มุตา, กติ วิญฺญาตา, กติ น ทิฏฺฐา น สุตา น มุตา น วิญฺญาตา?

[1037] รูปกฺขนฺโธ สิยา ทิฏฺโฐ, สิยา สุโต, สิยา มุโต, สิยา วิญฺญาโต, สิยา น ทิฏฺโฐ น สุโต น มุโต, วิญฺญาโตฯ จตฺตาโร ขนฺธา น ทิฏฺฐา น สุตา น มุตา, วิญฺญาตาฯ

รูปายตนํ ทิฏฺฐํ, น สุตํ น มุตํ, วิญฺญาตํฯ สทฺทายตนํ น ทิฏฺฐํ, สุตํ, น มุตํ, วิญฺญาตํฯ คนฺธายตนํ… รสายตนํ… โผฏฺฐพฺพายตนํ น ทิฏฺฐํ น สุตํ, มุตํ, วิญฺญาตํฯ สตฺตายตนา น ทิฏฺฐา น สุตา น มุตา, วิญฺญาตาฯ

รูปธาตุ ทิฏฺฐา, น สุตา น มุตา, วิญฺญาตาฯ สทฺทธาตุ น ทิฏฺฐา, สุตา, น มุตา, วิญฺญาตาฯ คนฺธธาตุ… รสธาตุ… โผฏฺฐพฺพธาตุ น ทิฏฺฐา น สุตา, มุตา, วิญฺญาตาฯ เตรส ธาตุโย น ทิฏฺฐา น สุตา น มุตา, วิญฺญาตาฯ

ตีณิ สจฺจานิ น ทิฏฺฐา น สุตา น มุตา, วิญฺญาตาฯ ทุกฺขสจฺจํ สิยา ทิฏฺฐํ, สิยา สุตํ, สิยา มุตํ, สิยา วิญฺญาตํ, สิยา น ทิฏฺฐํ น สุตํ น มุตํ, วิญฺญาตํฯ

พาวีสตินฺทฺริยา น ทิฏฺฐา น สุตา น มุตา, วิญฺญาตาฯ นว เหตู น ทิฏฺฐา น สุตา น มุตา, วิญฺญาตาฯ จตฺตาโร อาหารา น ทิฏฺฐา น สุตา น มุตา, วิญฺญาตาฯ สตฺต ผสฺสา น ทิฏฺฐา น สุตา น มุตา, วิญฺญาตาฯ สตฺต เวทนา… สตฺต สญฺญา… สตฺต เจตนา… สตฺต จิตฺตา น ทิฏฺฐา น สุตา น มุตา, วิญฺญาตาฯ

10. ติกาทิทสฺสนวาโร

1. กุสลตฺติกํ

[1038] ปญฺจนฺนํ ขนฺธานํ กติ กุสลา, กติ อกุสลา, กติ อพฺยากตา…เป.… สตฺตนฺนํ จิตฺตานํ กติ กุสลา, กติ อกุสลา, กติ อพฺยากตา?

รูปกฺขนฺโธ อพฺยากโตฯ จตฺตาโร ขนฺธา สิยา กุสลา, สิยา อกุสลา, สิยา อพฺยากตาฯ ทสายตนา อพฺยากตาฯ ทฺวายตนา สิยา กุสลา, สิยา อกุสลา, สิยา อพฺยากตาฯ

โสฬส ธาตุโย อพฺยากตาฯ ทฺเว ธาตุโย สิยา กุสลา, สิยา อกุสลา, สิยา อพฺยากตาฯ สมุทยสจฺจํ อกุสลํฯ มคฺคสจฺจํ กุสลํฯ นิโรธสจฺจํ อพฺยากตํฯ ทุกฺขสจฺจํ สิยา กุสลํ, สิยา อกุสลํ, สิยา อพฺยากตํฯ

ทสินฺทฺริยา อพฺยากตาฯ โทมนสฺสินฺทฺริยํ อกุสลํฯ อนญฺญาตญฺญสฺสามีตินฺทฺริยํ กุสลํฯ จตฺตารินฺทฺริยา สิยา กุสลา, สิยา อพฺยากตาฯ ฉ อินฺทฺริยา สิยา กุสลา, สิยา อกุสลา, สิยา อพฺยากตาฯ

ตโย กุสลเหตู กุสลาฯ ตโย อกุสลเหตู อกุสลาฯ ตโย อพฺยากตเหตู อพฺยากตาฯ กพฬีกาโร อาหาโร อพฺยากโตฯ ตโย อาหารา สิยา กุสลา, สิยา อกุสลา, สิยา อพฺยากตาฯ ฉ ผสฺสา อพฺยากตาฯ มโนวิญฺญาณธาตุสมฺผสฺโส สิยา กุสโล, สิยา อกุสโล, สิยา อพฺยากโตฯ ฉ เวทนา… ฉ สญฺญา… ฉ เจตนา… ฉ จิตฺตา อพฺยากตาฯ มโนวิญฺญาณธาตุ สิยา กุสลา, สิยา อกุสลา, สิยา อพฺยากตาฯ

2. เวทนาติกํ

[1039] ปญฺจนฺนํ ขนฺธานํ กติ สุขาย เวทนาย สมฺปยุตฺตา, กติ ทุกฺขาย เวทนาย สมฺปยุตฺตา, กติ อทุกฺขมสุขาย เวทนาย สมฺปยุตฺตา…เป.… สตฺตนฺนํ จิตฺตานํ กติ สุขาย เวทนาย สมฺปยุตฺตา, กติ ทุกฺขาย เวทนาย สมฺปยุตฺตา, กติ อทุกฺขมสุขาย เวทนาย สมฺปยุตฺตา?

ทฺเว ขนฺธา น วตฺตพฺพา สุขาย เวทนาย สมฺปยุตฺตาติปิ, ทุกฺขาย เวทนาย สมฺปยุตฺตาติปิ, อทุกฺขมสุขาย เวทนาย สมฺปยุตฺตาติปิฯ ตโย ขนฺธา สิยา สุขาย เวทนาย สมฺปยุตฺตา, สิยา ทุกฺขาย เวทนาย สมฺปยุตฺตา, สิยา อทุกฺขมสุขาย เวทนาย สมฺปยุตฺตาฯ

ทสายตนา น วตฺตพฺพา สุขาย เวทนาย สมฺปยุตฺตาติปิ, ทุกฺขาย เวทนาย สมฺปยุตฺตาติปิ, อทุกฺขมสุขาย เวทนาย สมฺปยุตฺตาติปิฯ มนายตนํ สิยา สุขาย เวทนาย สมฺปยุตฺตํ, สิยา ทุกฺขาย เวทนาย สมฺปยุตฺตํ, สิยา อทุกฺขมสุขาย เวทนาย สมฺปยุตฺตํฯ