เมนู

ตีณินฺทฺริยา น วตฺตพฺพา – ‘‘อตีตารมฺมณา’’ติปิ, ‘‘อนาคตารมฺมณา’’ติปิ , ‘‘ปจฺจุปฺปนฺนารมฺมณา’’ติปิฯ ทสินฺทฺริยา สิยา อตีตารมฺมณา, สิยา อนาคตารมฺมณา, สิยา ปจฺจุปฺปนฺนารมฺมณา, สิยา น วตฺตพฺพา – ‘‘อตีตารมฺมณา’’ติปิ, ‘‘อนาคตารมฺมณา’’ติปิ, ‘‘ปจฺจุปฺปนฺนารมฺมณา’’ติปิ; สิยา อชฺฌตฺตา, สิยา พหิทฺธา, สิยา อชฺฌตฺตพหิทฺธาฯ สตฺตินฺทฺริยา อนารมฺมณาฯ ตีณินฺทฺริยา พหิทฺธารมฺมณาฯ จตฺตารินฺทฺริยา สิยา อชฺฌตฺตารมฺมณา, สิยา พหิทฺธารมฺมณา, สิยา อชฺฌตฺตพหิทฺธารมฺมณา, อฏฺฐินฺทฺริยา สิยา อชฺฌตฺตารมฺมณา, สิยา พหิทฺธารมฺมณา, สิยา อชฺฌตฺตพหิทฺธารมฺมณา, สิยา น วตฺตพฺพา – ‘‘อชฺฌตฺตารมฺมณา’’ติปิ, ‘‘พหิทฺธารมฺมณา’’ติปิ, ‘‘อชฺฌตฺตพหิทฺธารมฺมณา’’ติปิฯ ปญฺจินฺทฺริยา อนิทสฺสนสปฺปฏิฆาฯ สตฺตรสินฺทฺริยา อนิทสฺสนอปฺปฏิฆาฯ

2. ทุกํ

[224] จตฺตารินฺทฺริยา เหตูฯ อฏฺฐารสินฺทฺริยา น เหตูฯ สตฺตินฺทฺริยา สเหตุกาฯ นวินฺทฺริยา อเหตุกาฯ ฉ อินฺทฺริยา สิยา สเหตุกา, สิยา อเหตุกาฯ สตฺตินฺทฺริยา เหตุสมฺปยุตฺตาฯ นวินฺทฺริยา เหตุวิปฺปยุตฺตาฯ ฉ อินฺทฺริยา สิยา เหตุสมฺปยุตฺตา, สิยา เหตุวิปฺปยุตฺตาฯ จตฺตารินฺทฺริยา เหตู เจว สเหตุกา จฯ นวินฺทฺริยา น วตฺตพฺพา – ‘‘เหตู เจว สเหตุกา จา’’ติปิ, ‘‘สเหตุกา เจว น จ เหตู’’ติปิฯ ตีณินฺทฺริยา น วตฺตพฺพา – ‘‘เหตู เจว สเหตุกา จา’’ติฯ สเหตุกา เจว น จ เหตูฯ ฉ อินฺทฺริยา น วตฺตพฺพา – ‘‘เหตู เจว สเหตุกา จา’’ติ, สิยา สเหตุกา เจว น จ เหตู, สิยา น วตฺตพฺพา – ‘‘สเหตุกา เจว น จ เหตู’’ติฯ

จตฺตารินฺทฺริยา เหตู เจว เหตุสมฺปยุตฺตา จ ฯ นวินฺทฺริยา น วตฺตพฺพา – ‘‘เหตู เจว เหตุสมฺปยุตฺตา จา’’ติปิ, ‘‘เหตุสมฺปยุตฺตา เจว น จ เหตู’’ติปิฯ ตีณินฺทฺริยา น วตฺตพฺพา – ‘‘เหตู เจว เหตุสมฺปยุตฺตา จา’’ติ, ‘‘เหตุสมฺปยุตฺตา เจว น จ เหตู’’ฯ ฉ อินฺทฺริยา น วตฺตพฺพา – ‘‘เหตู เจว เหตุสมฺปยุตฺตา จา’’ติ, สิยา เหตุสมฺปยุตฺตา เจว น จ เหตู, สิยา น วตฺตพฺพา – ‘‘เหตุสมฺปยุตฺตา เจว น จ เหตู’’ติฯ

นวินฺทฺริยา น เหตู อเหตุกาฯ ตีณินฺทฺริยา น เหตู สเหตุกาฯ

จตฺตารินฺทฺริยา น วตฺตพฺพา – ‘‘น เหตู สเหตุกา’’ติปิ, ‘‘น เหตู อเหตุกา’’ติปิ ฯ ฉ อินฺทฺริยา สิยา น เหตู สเหตุกา, สิยา น เหตู อเหตุกาฯ

สปฺปจฺจยาฯ สงฺขตาฯ อนิทสฺสนาฯ ปญฺจินฺทฺริยา สปฺปฏิฆาฯ สตฺตรสินฺทฺริยา อปฺปฏิฆาฯ สตฺตินฺทฺริยา รูปาฯ จุทฺทสินฺทฺริยา อรูปาฯ ชีวิตินฺทฺริยํ สิยา รูปํ, สิยา อรูปํฯ ทสินฺทฺริยา โลกิยาฯ ตีณินฺทฺริยา โลกุตฺตราฯ นวินฺทฺริยา สิยา โลกิยา, สิยา โลกุตฺตรา; เกนจิ วิญฺเญยฺยา, เกนจิ น วิญฺเญยฺยาฯ

โน อาสวาฯ ทสินฺทฺริยา สาสวาฯ ตีณินฺทฺริยา อนาสวาฯ นวินฺทฺริยา สิยา สาสวา, สิยา อนาสวาฯ ปนฺนรสินฺทฺริยา อาสววิปฺปยุตฺตาฯ โทมนสฺสินฺทฺริยํ อาสวสมฺปยุตฺตํฯ ฉ อินฺทฺริยา สิยา อาสวสมฺปยุตฺตา, สิยา อาสววิปฺปยุตฺตาฯ ทสินฺทฺริยา น วตฺตพฺพา – ‘‘อาสวา เจว สาสวา จา’’ติ, ‘‘สาสวา เจว โน จ อาสวา’’ฯ ตีณินฺทฺริยา น วตฺตพฺพา – ‘‘อาสวา เจว สาสวา จา’’ติปิ, ‘‘สาสวา เจว โน จ อาสวา’’ติปิฯ นวินฺทฺริยา น วตฺตพฺพา – ‘‘อาสวา เจว สาสวา จา’’ติ, สิยา สาสวา เจว โน จ อาสวา, สิยา น วตฺตพฺพา – ‘‘สาสวา เจว โน จ อาสวา’’ติฯ

ปนฺนรสินฺทฺริยา น วตฺตพฺพา – ‘‘อาสวา เจว อาสวสมฺปยุตฺตา จา’’ติปิ, ‘‘อาสวสมฺปยุตฺตา เจว โน จ อาสวา’’ติปิฯ โทมนสฺสินฺทฺริยํ น วตฺตพฺพํ – ‘‘อาสโว เจว อาสวสมฺปยุตฺตญฺจา’’ติ, ‘‘อาสวสมฺปยุตฺตญฺเจว โน จ อาสโว’’ฯ ฉ อินฺทฺริยา น วตฺตพฺพา – ‘‘อาสวา เจว อาสวสมฺปยุตฺตา จา’’ติ, สิยา อาสวสมฺปยุตฺตา เจว โน จ อาสวา, สิยา น วตฺตพฺพา – ‘‘อาสวสมฺปยุตฺตา เจว โน จ อาสวา’’ติฯ นวินฺทฺริยา อาสววิปฺปยุตฺตสาสวาฯ ตีณินฺทฺริยา อาสววิปฺปยุตฺตอนาสวาฯ โทมนสฺสินฺทฺริยํ น วตฺตพฺพํ – ‘‘อาสววิปฺปยุตฺตสาสว’’นฺติปิ, ‘‘อาสววิปฺปยุตฺตอนาสว’’นฺติปิฯ ตีณินฺทฺริยา สิยา อาสววิปฺปยุตฺตสาสวา, สิยา อาสววิปฺปยุตฺตอนาสวาฯ ฉ อินฺทฺริยา สิยา อาสววิปฺปยุตฺตสาสวา, สิยา อาสววิปฺปยุตฺตอนาสวา, สิยา น วตฺตพฺพา – ‘‘อาสววิปฺปยุตฺตสาสวา’’ติปิ, ‘‘อาสววิปฺปยุตฺตอนาสวา’’ติปิฯ

โน สํโยชนาฯ ทสินฺทฺริยา สํโยชนิยาฯ ตีณินฺทฺริยา อสํโยชนิยาฯ นวินฺทฺริยา สิยา สํโยชนิยา, สิยา อสํโยชนิยาฯ ปนฺนรสินฺทฺริยา สํโยชนวิปฺปยุตฺตาฯ โทมนสฺสินฺทฺริยํ สํโยชนสมฺปยุตฺตํ

อินฺทฺริยา สิยา สํโยชนสมฺปยุตฺตา , สิยา สํโยชนวิปฺปยุตฺตาฯ ทสินฺทฺริยา น วตฺตพฺพา – ‘‘สํโยชนา เจว สํโยชนิยา จา’’ติ, สํโยชนิยา เจว โน จ สํโยชนาฯ ตีณินฺทฺริยา น วตฺตพฺพา – ‘‘สํโยชนา เจว สํโยชนิยา จา’’ติปิ, ‘‘สํโยชนิยา เจว โน จ สํโยชนา’’ติปิฯ นวินฺทฺริยา น วตฺตพฺพา – ‘‘สํโยชนา เจว สํโยชนิยา จา’’ติ, สิยา สํโยชนิยา เจว โน จ สํโยชนา, สิยา น วตฺตพฺพา – ‘‘สํโยชนิยา เจว โน จ สํโยชนา’’ติฯ

ปนฺนรสินฺทฺริยา น วตฺตพฺพา – ‘‘สํโยชนา เจว สํโยชนสมฺปยุตฺตา จา’’ติปิ, ‘‘สํโยชนสมฺปยุตฺตา เจว โน จ สํโยชนา’’ติปิฯ โทมนสฺสินฺทฺริยํ น วตฺตพฺพํ – ‘‘สํโยชนญฺเจว สํโยชนสมฺปยุตฺตญฺจา’’ติ, สํโยชนสมฺปยุตฺตญฺเจว โน จ สํโยชนํฯ ฉ อินฺทฺริยา น วตฺตพฺพา – ‘‘สํโยชนา เจว สํโยชนสมฺปยุตฺตา จา’’ติ, สิยา สํโยชนสมฺปยุตฺตา เจว โน จ สํโยชนา, สิยา น วตฺตพฺพา – ‘‘สํโยชนสมฺปยุตฺตา เจว โน จ สํโยชนา’’ติฯ

นวินฺทฺริยา สํโยชนวิปฺปยุตฺตสํโยชนิยาฯ ตีณินฺทฺริยา สํโยชนวิปฺปยุตฺตอสํโยชนิยาฯ โทมนสฺสินฺทฺริยํ น วตฺตพฺพํ – ‘‘สํโยชนวิปฺปยุตฺตสํโยชนิย’’นฺติปิ, ‘‘สํโยชนวิปฺปยุตฺตอสํโยชนิย’’นฺติปิฯ ตีณินฺทฺริยา สิยา สํโยชนวิปฺปยุตฺตสํโยชนิยา, สิยา สํโยชนวิปฺปยุตฺตอสํโยชนิยาฯ ฉ อินฺทฺริยา สิยา สํโยชนวิปฺปยุตฺตสํโยชนิยา, สิยา สํโยชนวิปฺปยุตฺตอสํโยชนิยา, สิยา น วตฺตพฺพา – ‘‘สํโยชนวิปฺปยุตฺตสํโยชนิยา’’ติปิ, ‘‘สํโยชนวิปฺปยุตฺตอสํโยชนิยา’’ติปิ

โน คนฺถาฯ ทสินฺทฺริยา คนฺถนิยาฯ ตีณินฺทฺริยา อคนฺถนิยาฯ นวินฺทฺริยา สิยา คนฺถนิยา, สิยา อคนฺถนิยาฯ ปนฺนรสินฺทฺริยา คนฺถวิปฺปยุตฺตาฯ โทมนสฺสินฺทฺริยํ คนฺถสมฺปยุตฺตํฯ ฉ อินฺทฺริยา สิยา คนฺถสมฺปยุตฺตา, สิยา คนฺถวิปฺปยุตฺตาฯ ทสินฺทฺริยา น วตฺตพฺพา – ‘‘คนฺถา เจว คนฺถนิยา จา’’ติ, คนฺถนิยา เจว โน จ คนฺถาฯ ตีณินฺทฺริยา น วตฺตพฺพา – ‘‘คนฺถา เจว คนฺถนิยา จา’’ติปิ, ‘‘คนฺถนิยา เจว โน จ คนฺถา’’ติปิฯ นวินฺทฺริยา น วตฺตพฺพา – ‘‘คนฺถา เจว คนฺถนิยา จา’’ติ, สิยา คนฺถนิยา เจว โน จ คนฺถา, สิยา น วตฺตพฺพา – ‘‘คนฺถนิยา เจว โน จ คนฺถา’’ติฯ

ปนฺนรสินฺทฺริยา น วตฺตพฺพา – ‘‘คนฺถา เจว คนฺถสมฺปยุตฺตา จา’’ติปิ, ‘‘คนฺถสมฺปยุตฺตา เจว โน จ คนฺถา’’ติปิฯ โทมนสฺสินฺทฺริยํ น วตฺตพฺพํ – ‘‘คนฺโถ เจว คนฺถสมฺปยุตฺต’’ญฺจาติ, คนฺถสมฺปยุตฺตญฺเจว โน จ คนฺโถฯ ฉ อินฺทฺริยา น วตฺตพฺพา – ‘‘คนฺถา เจว คนฺถสมฺปยุตฺตา จา’’ติ, สิยา คนฺถสมฺปยุตฺตา เจว โน จ คนฺถา, สิยา น วตฺตพฺพา – ‘‘คนฺถสมฺปยุตฺตา เจว โน จ คนฺถา’’ติฯ

นวินฺทฺริยา คนฺถวิปฺปยุตฺตคนฺถนิยาฯ ตีณินฺทฺริยา คนฺถวิปฺปยุตฺตอคนฺถนิยา ฯ โทมนสฺสินฺทฺริยํ น วตฺตพฺพํ – ‘‘คนฺถวิปฺปยุตฺตคนฺถนิย’’นฺติปิ, ‘‘คนฺถวิปฺปยุตฺตอคนฺถนิย’’นฺติปิฯ ตีณินฺทฺริยา สิยา คนฺถวิปฺปยุตฺตคนฺถนิยา, สิยา คนฺถวิปฺปยุตฺตอคนฺถนิยาฯ ฉ อินฺทฺริยา สิยา คนฺถวิปฺปยุตฺตคนฺถนิยา, สิยา คนฺถวิปฺปยุตฺตอคนฺถนิยา, สิยา น วตฺตพฺพา – ‘‘คนฺถวิปฺปยุตฺตคนฺถนิยา’’ติปิ, ‘‘คนฺถวิปฺปยุตฺตอคนฺถนิยา’’ติปิฯ

โน โอฆา…เป.… โน โยคา…เป.… โน นีวรณาฯ ทสินฺทฺริยา นีวรณิยาฯ ตีณินฺทฺริยา อนีวรณิยาฯ นวินฺทฺริยา สิยา นีวรณิยา, สิยา อนีวรณิยาฯ ปนฺนรสินฺทฺริยา นีวรณวิปฺปยุตฺตาฯ โทมนสฺสินฺทฺริยํ นีวรณสมฺปยุตฺตํฯ ฉ อินฺทฺริยา สิยา นีวรณสมฺปยุตฺตา, สิยา นีวรณวิปฺปยุตฺตาฯ ทสินฺทฺริยา น วตฺตพฺพา – ‘‘นีวรณา เจว นีวรณิยา จา’’ติ, นีวรณิยา เจว โน จ นีวรณาฯ ตีณินฺทฺริยา น วตฺตพฺพา – ‘‘นีวรณา เจว นีวรณิยา จา’’ติปิ, ‘‘นีวรณิยา เจว โน จ นีวรณา’’ติปิฯ นวินฺทฺริยา น วตฺตพฺพา – ‘‘นีวรณา เจว นีวรณิยา จา’’ติ, สิยา นีวรณิยา เจว โน จ นีวรณา, สิยา น วตฺตพฺพา – ‘‘นีวรณิยา เจว โน จ นีวรณา’’ติฯ

ปนฺนรสินฺทฺริยา น วตฺตพฺพา – ‘‘นีวรณา เจว นีวรณสมฺปยุตฺตา จา’’ติปิ, ‘‘นีวรณสมฺปยุตฺตา เจว โน จ นีวรณา’’ติปิฯ โทมนสฺสินฺทฺริยํ น วตฺตพฺพํ – ‘‘นีวรณญฺเจว นีวรณสมฺปยุตฺตญฺจา’’ติ, นีวรณสมฺปยุตฺตญฺเจว โน จ นีวรณํฯ ฉ อินฺทฺริยา น วตฺตพฺพา – ‘‘นีวรณา เจว นีวรณสมฺปยุตฺตา จา’’ติ, สิยา นีวรณสมฺปยุตฺตา เจว โน จ นีวรณา, สิยา น วตฺตพฺพา – ‘‘นีวรณสมฺปยุตฺตา เจว โน จ นีวรณา’’ติฯ

นวินฺทฺริยา นีวรณวิปฺปยุตฺตนีวรณิยาฯ ตีณินฺทฺริยา นีวรณวิปฺปยุตฺตอนีวรณิยาฯ โทมนสฺสินฺทฺริยํ น วตฺตพฺพํ – ‘‘นีวรณวิปฺปยุตฺตนีวรณิย’’นฺติปิ, ‘‘นีวรณวิปฺปยุตฺตอนีวรณิย’’นฺติปิฯ ตีณินฺทฺริยา สิยา นีวรณวิปฺปยุตฺตนีวรณิยา, สิยา นีวรณวิปฺปยุตฺตอนีวรณิยา

ฉ อินฺทฺริยา สิยา นีวรณวิปฺปยุตฺตนีวรณิยา , สิยา นีวรณวิปฺปยุตฺตอนีวรณิยา, สิยา น วตฺตพฺพา – ‘‘นีวรณวิปฺปยุตฺตนีวรณิยา’’ติปิ, ‘‘นีวรณวิปฺปยุตฺตอนีวรณิยา’’ติปิฯ

โน ปรามาสาฯ ทสินฺทฺริยา ปรามฏฺฐาฯ ตีณินฺทฺริยา อปรามฏฺฐาฯ นวินฺทฺริยา สิยา ปรามฏฺฐา, สิยา อปรามฏฺฐาฯ โสฬสินฺทฺริยา ปรามาสวิปฺปยุตฺตาฯ ฉ อินฺทฺริยา สิยา ปรามาสสมฺปยุตฺตา, สิยา ปรามาสวิปฺปยุตฺตาฯ ทสินฺทฺริยา น วตฺตพฺพา – ‘‘ปรามาสา เจว ปรามฏฺฐา จา’’ติ, ปรามฏฺฐา เจว โน จ ปรามาสาฯ ตีณินฺทฺริยา น วตฺตพฺพา – ‘‘ปรามาสา เจว ปรามฏฺฐา จา’’ติปิ, ‘‘ปรามฏฺฐา เจว โน จ ปรามาสา’’ติปิฯ นวินฺทฺริยา น วตฺตพฺพา – ‘‘ปรามาสา เจว ปรามฏฺฐา จา’’ติ, สิยา ปรามฏฺฐา เจว โน จ ปรามาสา, สิยา น วตฺตพฺพา – ‘‘ปรามฏฺฐา เจว โน จ ปรามาสา’’ติฯ ทสินฺทฺริยา ปรามาสวิปฺปยุตฺตปรามฏฺฐาฯ ตีณินฺทฺริยา ปรามาสวิปฺปยุตฺตอปรามฏฺฐาฯ ตีณินฺทฺริยา สิยา ปรามาสวิปฺปยุตฺตปรามฏฺฐา, สิยา ปรามาสวิปฺปยุตฺตอปรามฏฺฐาฯ ฉ อินฺทฺริยา สิยา ปรามาสวิปฺปยุตฺตปรามฏฺฐา, สิยา ปรามาสวิปฺปยุตฺตอปรามฏฺฐา, สิยา น วตฺตพฺพา – ‘‘ปรามาสวิปฺปยุตฺตปรามฏฺฐา’’ติปิ, ‘‘ปรามาสวิปฺปยุตฺตอปรามฏฺฐา’’ติปิฯ

สตฺตินฺทฺริยา อนารมฺมณาฯ จุทฺทสินฺทฺริยา สารมฺมณาฯ ชีวิตินฺทฺริยํ สิยา สารมฺมณํ, สิยา อนารมฺมณํฯ เอกวีสตินฺทฺริยา โน จิตฺตาฯ มนินฺทฺริยํ จิตฺตํฯ เตรสินฺทฺริยา เจตสิกาฯ อฏฺฐินฺทฺริยา อเจตสิกาฯ ชีวิตินฺทฺริยํ สิยา เจตสิกํ, สิยา อเจตสิกํฯ เตรสินฺทฺริยา จิตฺตสมฺปยุตฺตาฯ สตฺตินฺทฺริยา จิตฺตวิปฺปยุตฺตาฯ ชีวิตินฺทฺริยํ สิยา จิตฺตสมฺปยุตฺตํ, สิยา จิตฺตวิปฺปยุตฺตํฯ มนินฺทฺริยํ น วตฺตพฺพํ – ‘‘จิตฺเตน สมฺปยุตฺต’’นฺติปิ, ‘‘จิตฺเตน วิปฺปยุตฺต’’นฺติปิฯ

เตรสินฺทฺริยา จิตฺตสํสฏฺฐาฯ สตฺตินฺทฺริยา จิตฺตวิสํสฏฺฐาฯ ชีวิตินฺทฺริยํ สิยา จิตฺตสํสฏฺฐํ, สิยา จิตฺตวิสํสฏฺฐํฯ มนินฺทฺริยํ น วตฺตพฺพํ – ‘‘จิตฺเตน สํสฏฺฐ’’นฺติปิ, ‘‘จิตฺเตน วิสํสฏฺฐ’’นฺติปิฯ เตรสินฺทฺริยา จิตฺตสมุฏฺฐานาฯ อฏฺฐินฺทฺริยา โน จิตฺตสมุฏฺฐานาฯ ชีวิตินฺทฺริยํ สิยา จิตฺตสมุฏฺฐานํ, สิยา โน จิตฺตสมุฏฺฐานํฯ

เตรสินฺทฺริยา จิตฺตสหภุโนฯ อฏฺฐินฺทฺริยา โน จิตฺตสหภุโนฯ ชีวิตินฺทฺริยํ สิยา จิตฺตสหภู, สิยา โน จิตฺตสหภูฯ เตรสินฺทฺริยา จิตฺตานุปริวตฺติโนฯ อฏฺฐินฺทฺริยา โน จิตฺตานุปริวตฺติโนฯ ชีวิตินฺทฺริยํ สิยา จิตฺตานุปริวตฺติ, สิยา โน จิตฺตานุปริวตฺติฯ

เตรสินฺทฺริยา จิตฺตสํสฏฺฐสมุฏฺฐานาฯ อฏฺฐินฺทฺริยา โน จิตฺตสํสฏฺฐสมุฏฺฐานาฯ ชีวิตินฺทฺริยํ สิยา จิตฺตสํสฏฺฐสมุฏฺฐานํ, สิยา โน จิตฺตสํสฏฺฐสมุฏฺฐานํฯ

เตรสินฺทฺริยา จิตฺตสํสฏฺฐสมุฏฺฐานสหภุโนฯ อฏฺฐินฺทฺริยา โน จิตฺตสํสฏฺฐสมุฏฺฐานสหภุโนฯ ชีวิตินฺทฺริยํ สิยา จิตฺตสํสฏฺฐสมุฏฺฐานสหภู, สิยา โน จิตฺตสํสฏฺฐสมุฏฺฐานสหภูฯ เตรสินฺทฺริยา จิตฺตสํสฏฺฐสมุฏฺฐานานุปริวตฺติโนฯ อฏฺฐินฺทฺริยา โน จิตฺตสํสฏฺฐสมุฏฺฐานานุปริวตฺติโนฯ ชีวิตินฺทฺริยํ สิยา จิตฺตสํสฏฺฐสมุฏฺฐานานุปริวตฺติ , สิยา โน จิตฺตสํสฏฺฐสมุฏฺฐานานุปริวตฺติฯ ฉ อินฺทฺริยา อชฺฌตฺติกาฯ โสฬสินฺทฺริยา พาหิราฯ

สตฺตินฺทฺริยา อุปาทาฯ จุทฺทสินฺทฺริยา โน อุปาทาฯ ชีวิตินฺทฺริยํ สิยา อุปาทา, สิยา โน อุปาทาฯ นวินฺทฺริยา อุปาทินฺนาฯ จตฺตารินฺทฺริยา อนุปาทินฺนาฯ นวินฺทฺริยา สิยา อุปาทินฺนา, สิยา อนุปาทินฺนาฯ โน อุปาทานาฯ ทสินฺทฺริยา อุปาทานิยาฯ ตีณินฺทฺริยา อนุปาทานิยาฯ นวินฺทฺริยา สิยา อุปาทานิยา, สิยา อนุปาทานิยาฯ โสฬสินฺทฺริยา อุปาทานวิปฺปยุตฺตาฯ ฉ อินฺทฺริยา สิยา อุปาทานสมฺปยุตฺตา, สิยา อุปาทานวิปฺปยุตฺตาฯ ทสินฺทฺริยา น วตฺตพฺพา – ‘‘อุปาทานา เจว อุปาทานิยา จา’’ติ, อุปาทานิยา เจว โน จ อุปาทานาฯ ตีณินฺทฺริยา น วตฺตพฺพา – ‘‘อุปาทานา เจว อุปาทานิยา จา’’ติปิ, ‘‘อุปาทานิยา เจว โน จ อุปาทานา’’ติปิฯ นวินฺทฺริยา น วตฺตพฺพา – ‘‘อุปาทานา เจว อุปาทานิยา จา’’ติ, สิยา อุปาทานิยา เจว โน จ อุปาทานาฯ ทสินฺทฺริยา สิยา อุปาทานิยา เจว โน จ อุปาทานา, สิยา น วตฺตพฺพา – ‘‘อุปาทานิยา เจว โน จ อุปาทานา’’ติฯ

โสฬสินฺทฺริยา น วตฺตพฺพา – ‘‘อุปาทานา เจว อุปาทานสมฺปยุตฺตา จา’’ติปิ, ‘‘อุปาทานสมฺปยุตฺตา เจว โน จ อุปาทานา’’ติปิฯ ฉ อินฺทฺริยา น วตฺตพฺพา – ‘‘อุปาทานา เจว อุปาทานสมฺปยุตฺตา จา’’ติ, สิยา อุปาทานสมฺปยุตฺตา เจว โน จ อุปาทานา, สิยา น วตฺตพฺพา – ‘‘อุปาทานสมฺปยุตฺตา เจว โน จ อุปาทานา’’ติฯ ทสินฺทฺริยา อุปาทานวิปฺปยุตฺตอุปาทานิยาฯ ตีณินฺทฺริยา อุปาทานวิปฺปยุตฺตอนุปาทานิยาฯ ตีณินฺทฺริยา สิยา อุปาทานวิปฺปยุตฺตอุปาทานิยา, สิยา อุปาทานวิปฺปยุตฺตอนุปาทานิยาฯ ฉ อินฺทฺริยา สิยา อุปาทานวิปฺปยุตฺตอุปาทานิยา, สิยา อุปาทานวิปฺปยุตฺตอนุปาทานิยา, สิยา น วตฺตพฺพา – ‘‘อุปาทานวิปฺปยุตฺตอุปาทานิยา’’ติปิ, ‘‘อุปาทานวิปฺปยุตฺตอนุปาทานิยา’’ติปิฯ

โน กิเลสาฯ ทสินฺทฺริยา สํกิเลสิกาฯ ตีณินฺทฺริยา อสํกิเลสิกาฯ นวินฺทฺริยา สิยา สํกิเลสิกา, สิยา อสํกิเลสิกาฯ ปนฺนรสินฺทฺริยา อสํกิลิฏฺฐาฯ โทมนสฺสินฺทฺริยํ สํกิลิฏฺฐํฯ ฉ อินฺทฺริยา สิยา สํกิลิฏฺฐา, สิยา อสํกิลิฏฺฐาฯ ปนฺนรสินฺทฺริยา กิเลสวิปฺปยุตฺตาฯ โทมนสฺสินฺทฺริยํ กิเลสสมฺปยุตฺตํฯ ฉ อินฺทฺริยา สิยา กิเลสสมฺปยุตฺตา, สิยา กิเลสวิปฺปยุตฺตาฯ ทสินฺทฺริยา น วตฺตพฺพา – ‘‘กิเลสา เจว สํกิเลสิกา จา’’ติ, สํกิเลสิกา เจว โน จ กิเลสาฯ ตีณินฺทฺริยา น วตฺตพฺพา – ‘‘กิเลสา เจว สํกิเลสิกา จา’’ติปิ, ‘‘สํกิเลสิกา เจว โน จ กิเลสา’’ติปิฯ นวินฺทฺริยา น วตฺตพฺพา – ‘‘กิเลสา เจว สํกิเลสิกา จา’’ติ, สิยา สํกิเลสิกา เจว โน จ กิเลสา, สิยา น วตฺตพฺพา – ‘‘สํกิเลสิกา เจว โน จ กิเลสา’’ติฯ

ปนฺนรสินฺทฺริยา น วตฺตพฺพา – ‘‘กิเลสา เจว สํกิลิฏฺฐา จา’’ติปิ, ‘‘สํกิลิฏฺฐา เจว โน จ กิเลสา’’ติปิฯ โทมนสฺสินฺทฺริยํ น วตฺตพฺพํ – ‘‘กิเลโส เจว สํกิลิฏฺฐญฺจา’’ติ, สํกิลิฏฺฐญฺเจว โน จ กิเลโสฯ ฉ อินฺทฺริยา น วตฺตพฺพา – ‘‘กิเลสา เจว สํกิลิฏฺฐา จา’’ติ, สิยา สํกิลิฏฺฐา เจว โน จ กิเลสา, สิยา น วตฺตพฺพา – ‘‘สํกิลิฏฺฐา เจว โน จ กิเลสา’’ติฯ

ปนฺนรสินฺทฺริยา น วตฺตพฺพา – ‘‘กิเลสา เจว กิเลสสมฺปยุตฺตา จา’’ติปิ, ‘‘กิเลสสมฺปยุตฺตา เจว โน จ กิเลสา’’ติปิฯ โทมนสฺสินฺทฺริยํ น วตฺตพฺพํ – ‘‘กิเลโส เจว กิเลสสมฺปยุตฺตญฺจา’’ติ, กิเลสสมฺปยุตฺตญฺเจว โน จ กิเลโสฯ ฉ อินฺทฺริยา น วตฺตพฺพา – ‘‘กิเลสา เจว กิเลสสมฺปยุตฺตา จา’’ติ, สิยา กิเลสสมฺปยุตฺตา เจว โน จ กิเลสา, สิยา น วตฺตพฺพา – ‘‘กิเลสสมฺปยุตฺตา เจว โน จ กิเลสา’’ติฯ นวินฺทฺริยา กิเลสวิปฺปยุตฺตสํกิเลสิกาฯ ตีณินฺทฺริยา กิเลสวิปฺปยุตฺตอสํกิเลสิกาฯ โทมนสฺสินฺทฺริยํ น วตฺตพฺพํ – ‘‘กิเลสวิปฺปยุตฺตสํกิเลสิก’’นฺติปิ, ‘‘กิเลสวิปฺปยุตฺตอสํกิเลสิก’’นฺติปิฯ ตีณินฺทฺริยา สิยา กิเลสวิปฺปยุตฺตสํกิเลสิกา, สิยา กิเลสวิปฺปยุตฺตอสํกิเลสิกาฯ ฉ อินฺทฺริยา สิยา กิเลสวิปฺปยุตฺตสํกิเลสิกา, สิยา กิเลสวิปฺปยุตฺตอสํกิเลสิกา, สิยา น วตฺตพฺพา – ‘‘กิเลสวิปฺปยุตฺตสํกิเลสิกา’’ติปิ, ‘‘กิเลสวิปฺปยุตฺตอสํกิเลสิกา’’ติปิฯ

ปนฺนรสินฺทฺริยา น ทสฺสเนน ปหาตพฺพาฯ สตฺตินฺทฺริยา สิยา ทสฺสเนน ปหาตพฺพา, สิยา น ทสฺสเนน ปหาตพฺพาฯ ปนฺนรสินฺทฺริยา น ภาวนาย ปหาตพฺพาฯ สตฺตินฺทฺริยา สิยา ภาวนาย ปหาตพฺพา, สิยา น ภาวนาย ปหาตพฺพาฯ ปนฺนรสินฺทฺริยา น ทสฺสเนน ปหาตพฺพเหตุกาฯ สตฺตินฺทฺริยา สิยา ทสฺสเนน ปหาตพฺพเหตุกา, สิยา น ทสฺสเนน ปหาตพฺพเหตุกาฯ ปนฺนรสินฺทฺริยา น ภาวนาย ปหาตพฺพเหตุกาฯ สตฺตินฺทฺริยา สิยา ภาวนาย ปหาตพฺพเหตุกา , สิยา น ภาวนาย ปหาตพฺพเหตุกาฯ

นวินฺทฺริยา อวิตกฺกาฯ โทมนสฺสินฺทฺริยํ สวิตกฺกํฯ ทฺวาทสินฺทฺริยา สิยา สวิตกฺกา, สิยา อวิตกฺกาฯ นวินฺทฺริยา อวิจาราฯ โทมนสฺสินฺทฺริยํ สวิจารํฯ ทฺวาทสินฺทฺริยา สิยา สวิจารา, สิยา อวิจาราฯ เอกาทสินฺทฺริยา อปฺปีติกาฯ เอกาทสินฺทฺริยา สิยา สปฺปีติกา, สิยา อปฺปีติกาฯ เอกาทสินฺทฺริยา น ปีติสหคตาฯ เอกาทสินฺทฺริยา สิยา ปีติสหคตา, สิยา น ปีติสหคตาฯ ทฺวาทสินฺทฺริยา น สุขสหคตาฯ ทสินฺทฺริยา สิยา สุขสหคตา, สิยา น สุขสหคตาฯ ทฺวาทสินฺทฺริยา น อุเปกฺขาสหคตาฯ ทสินฺทฺริยา สิยา อุเปกฺขาสหคตา, สิยา น อุเปกฺขาสหคตาฯ

ทสินฺทฺริยา กามาวจราฯ ตีณินฺทฺริยา น กามาวจราฯ นวินฺทฺริยา สิยา กามาวจรา, สิยา น กามาวจราฯ เตรสินฺทฺริยา น รูปาวจราฯ นวินฺทฺริยา สิยา รูปาวจรา, สิยา น รูปาวจราฯ จุทฺทสินฺทฺริยา น อรูปาวจราฯ อฏฺฐินฺทฺริยา สิยา อรูปาวจรา, สิยา น อรูปาวจราฯ ทสินฺทฺริยา ปริยาปนฺนาฯ ตีณินฺทฺริยา อปริยาปนฺนาฯ นวินฺทฺริยา สิยา ปริยาปนฺนา, สิยา อปริยาปนฺนาฯ เอกาทสินฺทฺริยา อนิยฺยานิกาฯ อนญฺญาตญฺญสฺสามีตินฺทฺริยํ นิยฺยานิกํฯ ทสินฺทฺริยา สิยา นิยฺยานิกา, สิยา อนิยฺยานิกาฯ ทสินฺทฺริยา อนิยตาฯ อนญฺญาตญฺญสฺสามีตินฺทฺริยํ นิยตํฯ เอกาทสินฺทฺริยา สิยา นิยตา, สิยา อนิยตาฯ ทสินฺทฺริยา สอุตฺตราฯ ตีณินฺทฺริยา อนุตฺตราฯ นวินฺทฺริยา สิยา สอุตฺตรา, สิยา อนุตฺตราฯ ปนฺนรสินฺทฺริยา อรณาฯ โทมนสฺสินฺทฺริยํ สรณํฯ ฉ อินฺทฺริยา สิยา สรณา, สิยา อรณาติฯ

ปญฺหาปุจฺฉกํฯ

อินฺทฺริยวิภงฺโค นิฏฺฐิโตฯ

6. ปฏิจฺจสมุปฺปาทวิภงฺโค

1. สุตฺตนฺตภาชนียํ