2. ปาราชิกาทิปญฺหา

[480]

อิตฺถี จ อพฺภนฺตเร สิยา,

ภิกฺขุ จ พหิทฺธา สิยา;

ฉิทฺทํ ตสฺมิํ ฆเร นตฺถิ;

เมถุนธมฺมปจฺจยา;

กถํ ปาราชิโก สิยา;

ปญฺหา เมสา กุสเลหิ จินฺติตาฯ

เตลํ มธุํ ผาณิตญฺจาปิ สปฺปิํ;

สามํ คเหตฺวาน นิกฺขิเปยฺย;

อวีติวตฺเต สตฺตาเห;

สติ ปจฺจเย ปริภุญฺชนฺตสฺส อาปตฺติ;

ปญฺหา เมสา กุสเลหิ จินฺติตาฯ

นิสฺสคฺคิเยน อาปตฺติ;

สุทฺธเกน ปาจิตฺติยํ;

อาปชฺชนฺตสฺส เอกโต;

ปญฺหา เมสา กุสเลหิ จินฺติตาฯ

ภิกฺขู สิยา วีสติยา สมาคตา;

กมฺมํ กเรยฺยุํ สมคฺคสญฺญิโน;

ภิกฺขุ สิยา ทฺวาทสโยชเน ฐิโต;

กมฺมญฺจ ตํ กุปฺเปยฺย วคฺคปจฺจยา;

ปญฺหา เมสา กุสเลหิ จินฺติตาฯ

ปทวีติหารมตฺเตน วาจาย ภณิเตน จ;

สพฺพานิ ครุกานิ สปฺปฏิกมฺมานิ;

จตุสฏฺฐิ อาปตฺติโย อาปชฺเชยฺย เอกโต;

ปญฺหา เมสา กุสเลหิ จินฺติตาฯ

นิวตฺโถ อนฺตรวาสเกน;

ทิคุณํ สงฺฆาฏิํ ปารุโต;

สพฺพานิ ตานิ นิสฺสคฺคิยานิ โหนฺติ;

ปญฺหา เมสา กุสเลหิ จินฺติตาฯ

น จาปิ ญตฺติ น จ ปน กมฺมวาจา;

น เจหิ ภิกฺขูติ ชิโน อโวจ;

สรณคมนมฺปิ น ตสฺส อตฺถิ;

อุปสมฺปทา จสฺส อกุปฺปา;

ปญฺหา เมสา กุสเลหิ จินฺติตาฯ

อิตฺถิํ หเน น มาตรํ, ปุริสญฺจ น ปิตรํ หเน;

หเนยฺย อนริยํ มนฺโท, เตน จานนฺตรํ ผุเส;

ปญฺหา เมสา กุสเลหิ จินฺติตาฯ

อิตฺถิํ หเน จ มาตรํ, ปุริสญฺจ ปิตรํ หเน;

มาตรํ ปิตรํ หนฺตฺวา, น เตนานนฺตรํ ผุเส;

ปญฺหา เมสา กุสเลหิ จินฺติตาฯ

อโจทยิตฺวา อสฺสารยิตฺวา;

อสมฺมุขีภูตสฺส กเรยฺย กมฺมํ;

กตญฺจ กมฺมํ สุกตํ ภเวยฺย;

การโก จ สงฺโฆ อนาปตฺติโก สิยา;

ปญฺหา เมสา กุสเลหิ จินฺติตาฯ

โจทยิตฺวา สารยิตฺวา;

สมฺมุขีภูตสฺส กเรยฺย กมฺมํ;

กตญฺจ กมฺมํ อกตํ ภเวยฺย;

การโก จ สงฺโฆ สาปตฺติโก สิยา;

ปญฺหา เมสา กุสเลหิ จินฺติตาฯ

ฉินฺทนฺตสฺส อาปตฺติ, ฉินฺทนฺตสฺส อนาปตฺติ;

ฉาเทนฺตสฺส อาปตฺติ, ฉาเทนฺตสฺส อนาปตฺติ;

ปญฺหา เมสา กุสเลหิ จินฺติตาฯ

สจฺจํ ภณนฺโต ครุกํ, มุสา จ ลหุ ภาสโต;

มุสา ภณนฺโต ครุกํ, สจฺจญฺจ ลหุ ภาสโต;

ปญฺหา เมสา กุสเลหิ จินฺติตาฯ

3. ปาจิตฺติยาทิปญฺหา

[481]

อธิฏฺฐิตํ รชนาย รตฺตํ;

กปฺปกตมฺปิ สนฺตํ;

ปริภุญฺชนฺตสฺส อาปตฺติ;

ปญฺหา เมสา กุสเลหิ จินฺติตาฯ

อตฺถงฺคเต สูริเย ภิกฺขุ มํสานิ ขาทติ;

น อุมฺมตฺตโก น จ ปน ขิตฺตจิตฺโต;

น จาปิ โส เวทนาฏฺโฏ ภเวยฺย;

น จสฺส โหติ อาปตฺติ;

โส จ ธมฺโม สุคเตน เทสิโต;

ปญฺหา เมสา กุสเลหิ จินฺติตาฯ

น รตฺตจิตฺโต น จ ปน เถยฺยจิตฺโต;

น จาปิ โส ปรํ มรณาย เจตยิ;

สลากํ เทนฺตสฺส โหติ เฉชฺชํ;

ปฏิคฺคณฺหนฺตสฺส ถุลฺลจฺจยํ;

ปญฺหา เมสา กุสเลหิ จินฺติตาฯ

น จาปิ อารญฺญกํ สาสงฺกสมฺมตํ;

น จาปิ สงฺเฆน สมฺมุติ ทินฺนา;

น จสฺส กถินํ อตฺถตํ ตตฺเถว;

จีวรํ นิกฺขิปิตฺวา คจฺเฉยฺย อฑฺฒโยชนํ;

ตตฺเถว อรุณํ อุคฺคจฺฉนฺตสฺส อนาปตฺติ;

ปญฺหา เมสา กุสเลหิ จินฺติตาฯ

กายิกานิ น วาจสิกานิ;

สพฺพานิ นานาวตฺถุกานิ;

อปุพฺพํ อจริมํ อาปชฺเชยฺย เอกโต;

ปญฺหา เมสา กุสเลหิ จินฺติตาฯ

วาจสิกานิ น กายิกานิ;

สพฺพานิ นานาวตฺถุกานิ;

อปุพฺพํ อจริมํ อาปชฺเชยฺย เอกโต;

ปญฺหา เมสา กุสเลหิ จินฺติตาฯ