กติ อนิยตา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เตฯ

ทฺเว อนิยตา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เมฯ

กติ นิสฺสคฺคิยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เตฯ

ทฺเวจตฺตาลีส นิสฺสคฺคิยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เมฯ

กติ ปาจิตฺติยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เตฯ

อฏฺฐาสีติสตํ ปาจิตฺติยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เมฯ

กติ ปาฏิเทสนียา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เตฯ

ทฺวาทส ปาฏิเทสนียา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เมฯ

กติ เสขิยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เตฯ

ปญฺจสตฺตติ เสขิยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เมฯ

ยาว สุปุจฺฉิตํ ตยา, ยาว สุวิสฺสชฺชิตํ มยา;

ปุจฺฉาวิสฺสชฺชนาย วา, นตฺถิ กิญฺจิ อสุตฺตกนฺติฯ

ทุติยคาถาสงฺคณิกํ นิฏฺฐิตํฯ

เสทโมจนคาถา

1. อวิปฺปวาสปญฺหา

[479]

อสํวาโส ภิกฺขูหิ จ ภิกฺขุนีหิ จ;

สมฺโภโค เอกจฺโจ ตหิํ น ลพฺภติ;

อวิปฺปวาเสน อนาปตฺติ;

ปญฺหา เมสา กุสเลหิ จินฺติตาฯ

อวิสฺสชฺชิยํ อเวภงฺคิยํ;

ปญฺจ วุตฺตา มเหสินา;

วิสฺสชฺชนฺตสฺส ปริภุญฺชนฺตสฺส อนาปตฺติ;

ปญฺหา เมสา กุสเลหิ จินฺติตาฯ

ทส ปุคฺคเล น วทามิ, เอกาทส วิวชฺชิย;

วุฑฺฒํ วนฺทนฺตสฺส อาปตฺติ, ปญฺหา เมสา กุสเลหิ จินฺติตาฯ

น อุกฺขิตฺตโก น จ ปน ปาริวาสิโก;

น สงฺฆภินฺโน น จ ปน ปกฺขสงฺกนฺโต;

สมานสํวาสกภูมิยา ฐิโต;

กถํ นุ สิกฺขาย อสาธารโณ สิยา;

ปญฺหา เมสา กุสเลหิ จินฺติตาฯ

อุเปติ ธมฺมํ ปริปุจฺฉมาโน, กุสลํ อตฺถูปสญฺหิตํ;

น ชีวติ น มโต น นิพฺพุโต, ตํ ปุคฺคลํ กตมํ วทนฺติ พุทฺธา;

ปญฺหา เมสา กุสเลหิ จินฺติตาฯ

อุพฺภกฺขเก น วทามิ, อโธ นาภิํ วิวชฺชิย;

เมถุนธมฺมปจฺจยา, กถํ ปาราชิโก สิยา;

ปญฺหา เมสา กุสเลหิ จินฺติตาฯ

ภิกฺขุ สญฺญาจิกาย กุฏิํ กโรติ;

อเทสิตวตฺถุกํ ปมาณาติกฺกนฺตํ;

สารมฺภํ อปริกฺกมนํ อนาปตฺติ;

ปญฺหา เมสา กุสเลหิ จินฺติตาฯ