ภิกฺขุโนวาทกวคฺคสฺมิํ , ปาจิตฺติเยน ทุกฺกฏา;

กเตตฺถ นวกา วุตฺตา, กตินํ จีวเรน จฯ

ภิกฺขุโนวาทกวคฺคสฺมิํ , ปาจิตฺติเยน ทุกฺกฏา กตา;

จตุเรตฺถ นวกา วุตฺตา, ทฺวินฺนํ จีวเรน จฯ

ภิกฺขุนีนญฺจ อกฺขาตา, ปาฏิเทสนิยา กติ;

ภุญฺชนฺตามกธญฺเญน, ปาจิตฺติเยน ทุกฺกฏา กติฯ

ภิกฺขุนีนญฺจ อกฺขาตา, อฏฺฐ ปาฏิเทสนียา กตา;

ภุญฺชนฺตามกธญฺเญน, ปาจิตฺติเยน ทุกฺกฏา กตาฯ

คจฺฉนฺตสฺส กติ อาปตฺติโย, ฐิตสฺส จาปิ กิตฺตกา;

นิสินฺนสฺส กติ อาปตฺติโย, นิปนฺนสฺสาปิ กิตฺตกาฯ

คจฺฉนฺตสฺส จตสฺโส อาปตฺติโย, ฐิตสฺส จาปิ ตตฺตกา;

นิสินฺนสฺส จตสฺโส อาปตฺติโย, นิปนฺนสฺสาปิ ตตฺตกาฯ

3. ปาจิตฺติยํ

[476]

กติ ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโตฯ

ปญฺจ ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโตฯ

กติ ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโตฯ

น ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโตฯ

กติ ปาจิตฺติยานิ, สพฺพานิ นานาวตฺถุกานิ;

กติ วาจาย เทเสยฺย, วุตฺตา อาทิจฺจพนฺธุนาฯ

ปญฺจ ปาจิตฺติยานิ, สพฺพานิ นานาวตฺถุกานิ;

เอกวาจาย เทเสยฺย, วุตฺตา อาทิจฺจพนฺธุนาฯ

กติ ปาจิตฺติยานิ, สพฺพานิ นานาวตฺถุกานิ;

กติ วาจาย เทเสยฺย, วุตฺตา อาทิจฺจพนฺธุนาฯ

นว ปาจิตฺติยานิ, สพฺพานิ นานาวตฺถุกานิ;

เอกวาจาย เทเสยฺย, วุตฺตา อาทิจฺจพนฺธุนาฯ

กติ ปาจิตฺติยานิ, สพฺพานิ นานาวตฺถุกานิ;

กิญฺจ กิตฺเตตฺวา เทเสยฺย, วุตฺตา อาทิจฺจพนฺธุนาฯ

ปญฺจ ปาจิตฺติยานิ, สพฺพานิ นานาวตฺถุกานิ;

วตฺถุํ กิตฺเตตฺวา เทเสยฺย, วุตฺตา อาทิจฺจพนฺธุนาฯ

กติ ปาจิตฺติยานิ, สพฺพานิ นานาวตฺถุกานิ;

กิญฺจ กิตฺเตตฺวา เทเสยฺย, วุตฺตา อาทิจฺจพนฺธุนาฯ

นว ปาจิตฺติยานิ, สพฺพานิ นานาวตฺถุกานิ;

วตฺถุํ กิตฺเตตฺวา เทเสยฺย, วุตฺตา อาทิจฺจพนฺธุนาฯ

ยาวตติยเก กติ อาปตฺติโย, กติ โวหารปจฺจยา;

ขาทนฺตสฺส กติ อาปตฺติโย, กติ โภชนปจฺจยาฯ

ยาวตติยเก ติสฺโส อาปตฺติโย, ฉ โวหารปจฺจยา;

ขาทนฺตสฺส ติสฺโส อาปตฺติโย, ปญฺจ โภชนปจฺจยาฯ

สพฺพา ยาวตติยกา, กติ ฐานานิ คจฺฉนฺติ;

กตินญฺเจว อาปตฺติ, กตินํ อธิกรเณน จฯ

สพฺพา ยาวตติยกา, ปญฺจ ฐานานิ คจฺฉนฺติ;

ปญฺจนฺนญฺเจว อาปตฺติ, ปญฺจนฺนํ อธิกรเณน จฯ

กตินํ วินิจฺฉโย โหติ, กตินํ วูปสเมน จ;

กตินญฺเจว อนาปตฺติ, กติหิ ฐาเนหิ โสภติฯ

ปญฺจนฺนํ วินิจฺฉโย โหติ, ปญฺจนฺนํ วูปสเมน จ;

ปญฺจนฺนญฺเจว อนาปตฺติ, ตีหิ ฐาเนหิ โสภติฯ

กติ กายิกา รตฺติํ, กติ กายิกา ทิวา;

นิชฺฌายนฺตสฺส กติ อาปตฺติ, กติ ปิณฺฑปาตปจฺจยาฯ

ทฺเว กายิกา รตฺติํ, ทฺเว กายิกา ทิวา;

นิชฺฌายนฺตสฺส เอกา อาปตฺติ, เอกา ปิณฺฑปาตปจฺจยาฯ

กตานิสํเส สมฺปสฺสํ, ปเรสํ สทฺธาย เทสเย;

อุกฺขิตฺตกา กติ วุตฺตา, กติ สมฺมาวตฺตนาฯ

อฏฺฐานิสํเส สมฺปสฺสํ, ปเรสํ สทฺธาย เทสเย;

อุกฺขิตฺตกา ตโย วุตฺตา, เตจตฺตาลีส สมฺมาวตฺตนาฯ

กติ ฐาเน มุสาวาโท, กติ ปรมนฺติ วุจฺจติ;

กติ ปาฏิเทสนียา, กตินํ เทสนาย จฯ

ปญฺจ ฐาเน มุสาวาโท, จุทฺทส ปรมนฺติ วุจฺจติ;

ทฺวาทส ปาฏิเทสนียา, จตุนฺนํ เทสนาย จฯ

กตงฺคิโก มุสาวาโท, กติ อุโปสถงฺคานิ;

กติ ทูเตยฺยงฺคานิ, กติ ติตฺถิยวตฺตนาฯ

อฏฺฐงฺคิโก มุสาวาโท, อฏฺฐ อุโปสถงฺคานิ;

อฏฺฐ ทูเตยฺยงฺคานิ, อฏฺฐ ติตฺถิยวตฺตนาฯ

กติวาจิกา อุปสมฺปทา, กตินํ ปจฺจุฏฺฐาตพฺพํ;

กตินํ อาสนํ ทาตพฺพํ, ภิกฺขุโนวาทโก กติหิฯ

อฏฺฐวาจิกา อุปสมฺปทา, อฏฺฐนฺนํ ปจฺจุฏฺฐาตพฺพํ;

อฏฺฐนฺนํ อาสนํ ทาตพฺพํ, ภิกฺขุโนวาทโก อฏฺฐหิฯ

กตินํ เฉชฺชํ โหติ, กตินํ ถุลฺลจฺจยํ;

กตินญฺเจว อนาปตฺติ, สพฺเพสํ เอกวตฺถุกาฯ

เอกสฺส เฉชฺชํ โหติ, จตุนฺนํ ถุลฺลจฺจยํ;

จตุนฺนญฺเจว อนาปตฺติ, สพฺเพสํ เอกวตฺถุกาฯ

กติ อาฆาตวตฺถูนิ, กติหิ สงฺโฆ ภิชฺชติ;

กเตตฺถ ปฐมาปตฺติกา, ญตฺติยา กรณา กติฯ

นว อาฆาตวตฺถูนิ, นวหิ สงฺโฆ ภิชฺชติ;

นเวตฺถ ปฐมาปตฺติกา, ญตฺติยา กรณา นวฯ

4. อวนฺทนียปุคฺคลาทิ

[477]

กติ ปุคฺคลา นาภิวาเทตพฺพา, อญฺชลิสามิเจน จ;

กตินํ ทุกฺกฏํ โหติ, กติ จีวรธารณาฯ