เมนู

ฉนฺทา โทสา ภยา โมหา, เถเร จ ปริภาสติ;

กายสฺส เภทา ทุปฺปญฺโญ, ขโต อุปหตินฺทฺริโย;

นิรยํ คจฺฉติ ทุมฺเมโธ, น จ สิกฺขาย คารโวฯ

น จ อามิสํ นิสฺสาย;

น จ นิสฺสาย ปุคฺคลํ;

อุโภ เอเต วิวชฺเชตฺวา;

ยถาธมฺโม ตถา กเรฯ

3. โจทกสฺสอตฺตฌาปนํ

โกธโน อุปนาหี จ;

จณฺโฑ จ ปริภาสโก;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

อุปกณฺณกํ ชปฺปติ ชิมฺหํ เปกฺขติ;

วีติหรติ กุมฺมคฺคํ ปฏิเสวติ;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

อกาเลน โจเทติ อภูเตน;

ผรุเสน อนตฺถสํหิเตน;

โทสนฺตโร โจเทติ โน เมตฺตาจิตฺโต;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

ธมฺมาธมฺมํ น ชานาติ;

ธมฺมาธมฺมสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

วินยาวินยํ น ชานาติ;

วินยาวินยสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

ภาสิตาภาสิตํ น ชานาติ;

ภาสิตาภาสิตสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

อาจิณฺณานาจิณฺณํ น ชานาติ;

อาจิณฺณานาจิณฺณสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

ปญฺญตฺตาปญฺญตฺตํ น ชานาติ;

ปญฺญตฺตาปญฺญตฺตสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

อาปตฺตานาปตฺติํ น ชานาติ;

อาปตฺตานาปตฺติยา อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

ลหุกครุกํ น ชานาติ;

ลหุกครุกสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

สาวเสสานวเสสํ น ชานาติ;

สาวเสสานวเสสสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

ทุฏฺฐุลฺลาทุฏฺฐุลฺลํ น ชานาติ;

ทุฏฺฐุลฺลาทุฏฺฐุลฺลสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

ปุพฺพาปรํ น ชานาติ;

ปุพฺพาปรสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํฯ

อนุสนฺธิวจนปถํ น ชานาติ;

อนุสนฺธิวจนปถสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานนฺติฯ

โจทนากณฺฑํ นิฏฺฐิตํฯ

ตสฺสุทฺทานํ –

โจทนา อนุวิชฺชา จ, อาทิ มูเลนุโปสโถ;

คติ โจทนกณฺฑมฺหิ, สาสนํ ปติฏฺฐาปยนฺติฯ

จูฬสงฺคาโม

1. อนุวิชฺชกสฺสปฏิปตฺติ

[365] [ปริ. 421] สงฺคามาวจเร ภิกฺขุนา สงฺฆํ อุปสงฺกมนฺเตน นีจจิตฺเตน สงฺโฆ อุปสงฺกมิตพฺโพ รโชหรณสเมน จิตฺเตน; อาสนกุสเลน ภวิตพฺพํ นิสชฺชกุสเลน; เถเร ภิกฺขู อนุปขชฺชนฺเตน, นเว ภิกฺขู อาสเนน อปฺปฏิพาหนฺเตน, ยถาปติรูเป อาสเน นิสีทิตพฺพํ; อนานากถิเกน ภวิตพฺพํ อติรจฺฉานกถิเกน; สามํ วา ธมฺโม ภาสิตพฺโพ ปโร วา อชฺเฌสิตพฺโพ อริโย วา ตุณฺหีภาโว นาติมญฺญิตพฺโพฯ

สงฺเฆน อนุมเตน ปุคฺคเลน อนุวิชฺชเกน อนุวิชฺชิตุกาเมน น อุปชฺฌาโย ปุจฺฉิตพฺโพ, น อาจริโย ปุจฺฉิตพฺโพ, น สทฺธิวิหาริโก ปุจฺฉิตพฺโพ, น อนฺเตวาสิโก ปุจฺฉิตพฺโพ, น สมานุปชฺฌายโก ปุจฺฉิตพฺโพ, น สมานาจริยโก ปุจฺฉิตพฺโพ, น ชาติ ปุจฺฉิตพฺพา, น นามํ ปุจฺฉิตพฺพํ, น โคตฺตํ ปุจฺฉิตพฺพํ, น อาคโม ปุจฺฉิตพฺโพ, น กุลปเทโส ปุจฺฉิตพฺโพ, น ชาติภูมิ ปุจฺฉิตพฺพาฯ ตํ กิํ การณา? อตฺรสฺส เปมํ วา โทโส วาฯ เปเม วา สติ โทเส วา, ฉนฺทาปิ คจฺเฉยฺย โทสาปิ คจฺเฉยฺย โมหาปิ คจฺเฉยฺย ภยาปิ คจฺเฉยฺยฯ

สงฺเฆน อนุมเตน ปุคฺคเลน อนุวิชฺชเกน อนุวิชฺชิตุกาเมน สงฺฆครุเกน ภวิตพฺพํ โน ปุคฺคลครุเกน, สทฺธมฺมครุเกน ภวิตพฺพํ โน อามิสครุเกน, อตฺถวสิเกน ภวิตพฺพํ โน ปริสกปฺปิเกน, กาเลน อนุวิชฺชิตพฺพํ โน อกาเลน, ภูเตน อนุวิชฺชิตพฺพํ โน อภูเตน, สณฺเหน อนุวิชฺชิตพฺพํ โน ผรุเสน, อตฺถสํหิเตน อนุวิชฺชิตพฺพํ โน อนตฺถสํหิเตน, เมตฺตาจิตฺเตน อนุวิชฺชิตพฺพํ โน โทสนฺตเรน, น อุปกณฺณกชปฺปินา ภวิตพฺพํ, น ชิมฺหํ เปกฺขิตพฺพํ, น อกฺขิ นิขณิตพฺพํ, น ภมุกํ อุกฺขิปิตพฺพํ, น สีสํ อุกฺขิปิตพฺพํ, น หตฺถวิกาโร กาตพฺโพ, น หตฺถมุทฺทา ทสฺเสตพฺพาฯ