4. อสาธารณาทิ
[338]
วีสํ ทฺเว สตานิ ภิกฺขูนํ สิกฺขาปทานิ;
อุทฺเทสํ อาคจฺฉนฺติ อุโปสเถสุ;
ตีณิ สตานิ จตฺตาริ ภิกฺขุนีนํ สิกฺขาปทานิ;
อุทฺเทสํ อาคจฺฉนฺติ อุโปสเถสุฯ
ฉจตฺตารีสา ภิกฺขูนํ, ภิกฺขุนีหิ อสาธารณา;
สตํ ติํสา จ ภิกฺขุนีนํ, ภิกฺขูหิ อสาธารณาฯ
สตํ สตฺตติ ฉจฺเจว, อุภินฺนํ อสาธารณา;
สตํ สตฺตติ จตฺตาริ, อุภินฺนํ สมสิกฺขตาฯ
วีสํ ทฺเว สตานิ ภิกฺขูนํ สิกฺขาปทานิ;
อุทฺเทสํ อาคจฺฉนฺติ อุโปสเถสุ;
เต สุโณหิ ยถาตถํฯ
ปาราชิกานิ จตฺตาริ, สงฺฆาทิเสสานิ ภวนฺติ เตรส;
อนิยตา ทฺเว โหนฺติฯ
นิสฺสคฺคิยานิ ติํเสว, ทฺเวนวุติ จ ขุทฺทกา;
จตฺตาโร ปาฏิเทสนียา, ปญฺจสตฺตติ เสขิยาฯ
วีสํ ทฺเว สตานิ จิเม โหนฺติ ภิกฺขูนํ สิกฺขาปทานิ;
อุทฺเทสํ อาคจฺฉนฺติ อุโปสเถสุฯ
ตีณิ สตานิ จตฺตาริ, ภิกฺขุนีนํ สิกฺขาปทานิ;
อุทฺเทสํ อาคจฺฉนฺติ อุโปสเถสุ, เต สุโณหิ ยถาตถํฯ
ปาราชิกานิ อฏฺฐ, สงฺฆาทิเสสานิ ภวนฺติ สตฺตรส;
นิสฺสคฺคิยานิ ติํเสว, สตํ สฏฺฐิ ฉ เจว ขุทฺทกานิ ปวุจฺจนฺติฯ
อฏฺฐ ปาฏิเทสนียา, ปญฺจสตฺตติ เสขิยา;
ตีณิ สตานิ จตฺตาริ จิเม โหนฺติ ภิกฺขุนีนํ สิกฺขาปทานิ;
อุทฺเทสํ อาคจฺฉนฺติ อุโปสเถสุฯ
ฉจตฺตารีสา ภิกฺขูนํ, ภิกฺขุนีหิ อสาธารณา;
เต สุโณหิ ยถาตถํฯ
สงฺฆาทิเสสา, ทฺเว อนิยเตหิ อฏฺฐ;
นิสฺสคฺคิยานิ ทฺวาทส, เตหิ เต โหนฺติ วีสติฯ
ทฺเววีสติ ขุทฺทกา, จตุโร ปาฏิเทสนียา;
ฉจตฺตารีสา จิเม โหนฺติ, ภิกฺขูนํ ภิกฺขุนีหิ อสาธารณาฯ
สตํ ติํสา จ ภิกฺขุนีนํ, ภิกฺขูหิ อสาธารณา;
เต สุโณหิ ยถาตถํฯ
ปาราชิกานิ จตฺตาริ, สงฺฆมฺหา ทส นิสฺสเร;
นิสฺสคฺคิยานิ ทฺวาทส, ฉนฺนวุติ จ ขุทฺทกา;
อฏฺฐ ปาฏิเทสนียาฯ
สตํ ติํสา จิเม โหนฺติ ภิกฺขุนีนํ, ภิกฺขูหิ อสาธารณา;
สตํ สตฺตติ ฉจฺเจว, อุภินฺนํ อสาธารณา;
เต สุโณหิ ยถาตถํฯ
ปาราชิกานิ จตฺตาริ, สงฺฆาทิเสสานิ ภวนฺติ โสฬส;
อนิยตา ทฺเว โหนฺติ, นิสฺสคฺคิยานิ จตุวีสติ;
สตํ อฏฺฐารสา เจว, ขุทฺทกานิ ปวุจฺจนฺติ;
ทฺวาทส ปาฏิเทสนียาฯ
สตํ สตฺตติ ฉจฺเจวิเม โหนฺติ, อุภินฺนํ อสาธารณา;
สตํ สตฺตติ จตฺตาริ, อุภินฺนํ สมสิกฺขตา;
เต สุโณหิ ยถาตถํฯ
ปาราชิกานิ จตฺตาริ, สงฺฆาทิเสสานิ ภวนฺติ สตฺต;
นิสฺสคฺคิยานิ อฏฺฐารส, สมสตฺตติ ขุทฺทกา;
ปญฺจสตฺตติ เสขิยานิฯ
สตํ สตฺตติ จตฺตาริ จิเม โหนฺติ, อุภินฺนํ สมสิกฺขตา;
อฏฺเฐ ปาราชิกา เย ทุราสทา, ตาลวตฺถุสมูปมาฯ
ปณฺฑุปลาโส ปุถุสิลา, สีสจฺฉินฺโนว โส นโร;
ตาโลว มตฺถกจฺฉินฺโน, อวิรุฬฺหี ภวนฺติ เตฯ
เตวีสติ สงฺฆาทิเสสา, ทฺเว อนิยตา;
ทฺเว จตฺตารีส นิสฺสคฺคิยา;
อฏฺฐาสีติสตํ ปาจิตฺติยา, ทฺวาทส ปาฏิเทสนียาฯ
ปญฺจสตฺตติ เสขิยา, ตีหิ สมเถหิ สมฺมนฺติ;
สมฺมุขา จ ปฏิญฺญาย, ติณวตฺถารเกน จฯ
ทฺเว อุโปสถา ทฺเว ปวารณา;
จตฺตาริ กมฺมานิ ชิเนน เทสิตา;
ปญฺเจว อุทฺเทสา จตุโร ภวนฺติ;
อนญฺญถา อาปตฺติกฺขนฺธา จ ภวนฺติ สตฺตฯ
อธิกรณานิ จตฺตาริ สตฺตหิ สมเถหิ สมฺมนฺติ;
ทฺวีหิ จตูหิ ตีหิ กิจฺจํ เอเกน สมฺมติฯ
5. ปาราชิกาทิอาปตฺติ
[339]
‘ปาราชิก’นฺติ ยํ วุตฺตํ, ตํ สุโณหิ ยถาตถํ;
จุโต ปรทฺโธ ภฏฺโฐ จ, สทฺธมฺมา หิ นิรงฺกโต;
สํวาโสปิ ตหิํ นตฺถิ, เตเนตํ อิติ วุจฺจติฯ
‘สงฺฆาทิเสโส’ติ ยํ วุตฺตํ, ตํ สุโณหิ ยถาตถํ;
สงฺโฆว เทติ ปริวาสํ, มูลาย ปฏิกสฺสติ;
มานตฺตํ เทติ อพฺเภติ, เตเนตํ อิติ วุจฺจติฯ
‘อนิยโต’ติ ยํ วุตฺตํ, ตํ สุโณหิ ยถาตถํ;
อนิยโต น นิยโต, อเนกํสิกตํ ปทํ;
ติณฺณมญฺญตรํ ฐานํ, ‘อนิยโต’ติ ปวุจฺจติฯ
‘ถุลฺลจฺจย’นฺติ ยํ วุตฺตํ, ตํ สุโณหิ ยถาตถํ;
เอกสฺส มูเล โย เทเสติ, โย จ ตํ ปฏิคณฺหติ;
อจฺจโย เตน สโม นตฺถิ, เตเนตํ อิติ วุจฺจติฯ
‘นิสฺสคฺคิย’นฺติ ยํ วุตฺตํ, ตํ สุโณหิ ยถาตถํ;
สงฺฆมชฺเฌ คณมชฺเฌ, เอกสฺเสว จ เอกโต;
นิสฺสชฺชิตฺวาน เทเสติ, เตเนตํ อิติ วุจฺจติฯ