เมนู

ยํ ทุมฺมงฺกูนํ ปุคฺคลานํ นิคฺคหาย…เป.… ยํ เปสลานํ ภิกฺขูนํ ผาสุวิหาราย… ยํ ทิฏฺฐธมฺมิกานํ อาสวานํ สํวราย… ยํ สมฺปรายิกานํ อาสวานํ ปฏิฆาตาย… ยํ อปฺปสนฺนานํ ปสาทาย… ยํ ปสนฺนานํ ภิยฺโยภาวาย… ยํ สทฺธมฺมฏฺฐิติยา… ยํ วินยานุคฺคหาย ตํ สงฺฆสุฏฺฐุฯ ยํ วินยานุคฺคหาย ตํ สงฺฆผาสุฯ ยํ วินยานุคฺคหาย ตํ ทุมฺมงฺกูนํ ปุคฺคลานํ นิคฺคหายฯ ยํ วินยานุคฺคหาย ตํ เปสลานํ ภิกฺขูนํ ผาสุวิหารายฯ ยํ วินยานุคฺคหาย ตํ ทิฏฺฐธมฺมิกานํ อาสวานํ สํวรายฯ ยํ วินยานุคฺคหาย ตํ สมฺปรายิกานํ อาสวานํ ปฏิฆาตายฯ ยํ วินยานุคฺคหาย ตํ อปฺปสนฺนานํ ปสาทายฯ ยํ วินยานุคฺคหาย ตํ ปสนฺนานํ ภิยฺโยภาวายฯ ยํ วินยานุคฺคหาย ตํ สทฺธมฺมฏฺฐิติยาติฯ

อตฺถสตํ ธมฺมสตํ, ทฺเว จ นิรุตฺติสตานิ;

จตฺตาริ ญาณสตานิ, อตฺถวเส ปกรเณติฯ

อตฺถวสปกรณํ นิฏฺฐิตํฯ

มหาวคฺโค นิฏฺฐิโตฯ

ตสฺสุทฺทานํ –

ปฐมํ อฏฺฐปุจฺฉายํ, ปจฺจเยสุ ปุนฏฺฐ จ;

ภิกฺขูนํ โสฬส เอเต, ภิกฺขุนีนญฺจ โสฬสฯ

เปยฺยาลอนฺตรา เภทา, เอกุตฺตริกเมว จ;

ปวารณตฺถวสิกา, มหาวคฺคสฺส สงฺคโหติฯ

อตฺถวสปกรณํ นิฏฺฐิตํฯ

คาถาสงฺคณิกํ

1. สตฺตนคเรสุ ปญฺญตฺตสิกฺขาปทํ

[335]

เอกํสํ จีวรํ กตฺวา, ปคฺคณฺหิตฺวาน อญฺชลิํ;

อาสีสมานรูโปว [อาสิํสมานรูโปว (สี. สฺยา.)], กิสฺส ตฺวํ อิธ มาคโตฯ

ทฺวีสุ วินเยสุ เย ปญฺญตฺตา;

อุทฺเทสํ อาคจฺฉนฺติ อุโปสเถสุ;

กติ เต สิกฺขาปทา โหนฺติ;

กติสุ นคเรสุ ปญฺญตฺตาฯ

ภทฺทโก เต อุมฺมงฺโค, โยนิโส ปริปุจฺฉสิ;

ตคฺฆ เต อหมกฺขิสฺสํ, ยถาสิ กุสโล ตถาฯ

ทฺวีสุ วินเยสุ เย ปญฺญตฺตา;

อุทฺเทสํ อาคจฺฉนฺติ อุโปสเถสุ;

อฑฺฒุฑฺฒสตานิ เต โหนฺติ;

สตฺตสุ นคเรสุ ปญฺญตฺตาฯ

กตเมสุ สตฺตสุ นคเรสุ ปญฺญตฺตา;

อิงฺฆ เม ตฺวํ พฺยากร นํ [อิงฺฆ เม ตํ พฺยากร (ก.)];

ตํ วจนปถํ [ตว วจนปถํ (สฺยา.)] นิสามยิตฺวา;

ปฏิปชฺเชม หิตาย โน สิยาฯ

เวสาลิยํ ราชคเห, สาวตฺถิยญฺจ อาฬวิยํ;

โกสมฺพิยญฺจ สกฺเกสุ, ภคฺเคสุ เจว ปญฺญตฺตาฯ

กติ เวสาลิยํ ปญฺญตฺตา, กติ ราชคเห กตา;

สาวตฺถิยํ กติ โหนฺติ, กติ อาฬวิยํ กตาฯ

กติ โกสมฺพิยํ ปญฺญตฺตา, กติ สกฺเกสุ วุจฺจนฺติ;

กติ ภคฺเคสุ ปญฺญตฺตา, ตํ เม อกฺขาหิ ปุจฺฉิโตฯ