9. นวกวาโร

[329] นว อาฆาตวตฺถูนิฯ นว อาฆาตปฏิวินยาฯ นว วินีตวตฺถูนิฯ นว ปฐมาปตฺติกาฯ นวหิ สงฺโฆ ภิชฺชติฯ นว ปณีตโภชนานิ ฯ นวมํเสหิ ทุกฺกฏํฯ นว ปาติโมกฺขุทฺเทสาฯ นว ปรมานิฯ นว ตณฺหามูลกา ธมฺมาฯ นว วิธมานาฯ นว จีวรานิ อธิฏฺฐาตพฺพานิฯ นว จีวรานิ น วิกปฺเปตพฺพานิฯ ทีฆโส นว วิทตฺถิโย สุคตวิทตฺถิยาฯ นว อธมฺมิกานิ ทานานิฯ นว อธมฺมิกา ปฏิคฺคหาฯ นว อธมฺมิกา ปริโภคา – ตีณิ ธมฺมิกานิ ทานานิ, ตโย ธมฺมิกา ปฏิคฺคหา, ตโย ธมฺมิกา ปริโภคาฯ นว อธมฺมิกา สญฺญตฺติโย [ปญฺญตฺติโย (สพฺพตฺถ) อฏฺฐกถา จ สมถกฺขนฺธเก กณฺหปกฺขนวกญฺจ โอโลเกตพฺพํ]ฯ นว ธมฺมิกา สญฺญตฺติโยฯ อธมฺมกมฺเม ทฺเว นวกานิฯ ธมฺมกมฺเม ทฺเว นวกานิฯ นว อธมฺมิกานิ ปาติโมกฺขฏฺฐปนานิฯ นว ธมฺมิกานิ ปาติโมกฺขฏฺฐปนานีติฯ

นวกํ นิฏฺฐิตํฯ

ตสฺสุทฺทานํ –

อาฆาตวตฺถุวินยา, วินีตา ปฐเมน จ;

ภิชฺชติ จ ปณีตญฺจ, มํสุทฺเทสปรมานิ จฯ

ตณฺหา มานา อธิฏฺฐานา, วิกปฺเป จ วิทตฺถิโย;

ทานา ปฏิคฺคหา โภคา, ติวิธา ปุน ธมฺมิกาฯ

อธมฺมธมฺมสญฺญตฺติ, ทุเว ทฺเว นวกานิ จ;

ปาติโมกฺขฏฺฐปนานิ, อธมฺมธมฺมิกานิ จาติฯ

10. ทสกวาโร

[330] ทส อาฆาตวตฺถูนิฯ ทส อาฆาตปฏิวินยาฯ ทส วินีตวตฺถูนิฯ ทสวตฺถุกา มิจฺฉาทิฏฺฐิฯ ทสวตฺถุกา สมฺมาทิฏฺฐิฯ ทส อนฺตคฺคาหิกา ทิฏฺฐิฯ ทส มิจฺฉตฺตาฯ ทส สมฺมตฺตาฯ ทส อกุสลกมฺมปถาฯ ทส กุสลกมฺมปถาฯ ทส อธมฺมิกา สลากคฺคาหาฯ ทส ธมฺมิกา สลากคฺคาหาฯ สามเณรานํ ทส สิกฺขาปทานิฯ ทสหงฺเคหิ สมนฺนาคโต สามเณโร นาเสตพฺโพฯ

ทสหงฺเคหิ สมนฺนาคโต วินยธโร พาโล ตฺเวว สงฺขํ คจฺฉติ – อตฺตโน ภาสปริยนฺตํ น อุคฺคณฺหาติ, ปรสฺส ภาสปริยนฺตํ น อุคฺคณฺหาติ , อตฺตโน ภาสปริยนฺตํ อนุคฺคเหตฺวา ปรสฺส ภาสปริยนฺตํ อนุคฺคเหตฺวา อธมฺเมน กาเรติ, อปฺปฏิญฺญาย อาปตฺติํ น ชานาติ, อาปตฺติยา มูลํ น ชานาติ, อาปตฺติสมุทยํ น ชานาติ, อาปตฺตินิโรธํ น ชานาติ, อาปตฺตินิโรธคามินิํ ปฏิปทํ น ชานาติฯ

ทสหงฺเคหิ สมนฺนาคโต วินยธโร ปณฺฑิโต ตฺเวว สงฺขํ คจฺฉติ – อตฺตโน ภาสปริยนฺตํ อุคฺคณฺหาติ, ปรสฺส ภาสปริยนฺตํ อุคฺคณฺหาติ, อตฺตโน ภาสปริยนฺตํ อุคฺคเหตฺวา ปรสฺส ภาสปริยนฺตํ อุคฺคเหตฺวา ธมฺเมน กาเรติ, ปฏิญฺญาย อาปตฺติํ ชานาติ, อาปตฺติยา มูลํ ชานาติ, อาปตฺติสมุทยํ ชานาติ, อาปตฺตินิโรธํ ชานาติ, อาปตฺตินิโรธคามินิํ ปฏิปทํ ชานาติฯ

อปเรหิปิ ทสหงฺเคหิ สมนฺนาคโต วินยธโร พาโล ตฺเวว สงฺขํ คจฺฉติ – อธิกรณํ น ชานาติ, อธิกรณสฺส มูลํ น ชานาติ, อธิกรณสมุทยํ น ชานาติ, อธิกรณนิโรธํ น ชานาติ, อธิกรณนิโรธคามินิํ ปฏิปทํ น ชานาติ, วตฺถุํ น ชานาติ, นิทานํ [อุทฺทานํ (ก.)] น ชานาติ, ปญฺญตฺติํ น ชานาติ, อนุปญฺญตฺติํ น ชานาติ , อนุสนฺธิวจนปถํ น ชานาติฯ

ทสหงฺเคหิ สมนฺนาคโต วินยธโร ปณฺฑิโต ตฺเวว สงฺขํ คจฺฉติ – อธิกรณํ ชานาติ, อธิกรณสฺส มูลํ ชานาติ, อธิกรณสมุทยํ ชานาติ, อธิกรณนิโรธํ ชานาติ, อธิกรณนิโรธคามินิํ ปฏิปทํ ชานาติ, วตฺถุํ ชานาติ, นิทานํ ชานาติ, ปญฺญตฺติํ ชานาติ, อนุปญฺญตฺติํ ชานาติ, อนุสนฺธิวจนปถํ ชานาติฯ

อปเรหิปิ ทสหงฺเคหิ สมนฺนาคโต วินยธโร พาโล ตฺเวว สงฺขํ คจฺฉติ – ญตฺติํ น ชานาติ, ญตฺติยา กรณํ น ชานาติ, น ปุพฺพกุสโล โหติ, น อปรกุสโล โหติ, อกาลญฺญู จ โหติ, อาปตฺตานาปตฺติํ น ชานาติ, ลหุกครุกํ อาปตฺติํ น ชานาติ, สาวเสสานวเสสํ อาปตฺติํ น ชานาติ, ทุฏฺฐุลฺลาทุฏฺฐุลฺลํ อาปตฺติํ น ชานาติ, อาจริยปรมฺปรา โข ปนสฺส น สุคฺคหิตา โหติ น สุมนสิกตา น สูปธาริตาฯ

ทสหงฺเคหิ สมนฺนาคโต วินยธโร ปณฺฑิโต ตฺเวว สงฺขํ คจฺฉติ – ญตฺติํ ชานาติ, ญตฺติยา กรณํ ชานาติ, ปุพฺพกุสโล โหติ, อปรกุสโล โหติ, กาลญฺญู จ โหติ, อาปตฺตานาปตฺติํ ชานาติ, ลหุกครุกํ อาปตฺติํ ชานาติ, สาวเสสานวเสสํ อาปตฺติํ ชานาติ, ทุฏฺฐุลฺลาทุฏฺฐุลฺลํ อาปตฺติํ ชานาติ, อาจริยปรมฺปรา โข ปนสฺส สุคฺคหิตา โหติ สุมนสิกตา สูปธาริตาฯ

อปเรหิปิ ทสหงฺเคหิ สมนฺนาคโต วินยธโร พาโล ตฺเวว สงฺขํ คจฺฉติ – อาปตฺตานาปตฺติํ น ชานาติ, ลหุกครุกํ อาปตฺติํ น ชานาติ, สาวเสสานวเสสํ อาปตฺติํ น ชานาติ, ทุฏฺฐุลฺลาทุฏฺฐุลฺลํ อาปตฺติํ น ชานาติ, อุภยานิ โข ปนสฺส ปาติโมกฺขานิ วิตฺถาเรน น สฺวาคตานิ โหนฺติ น สุวิภตฺตานิ น สุปฺปวตฺตีนิ น สุวินิจฺฉิตานิ สุตฺตโส อนุพฺยญฺชนโส , อาปตฺตานาปตฺติํ น ชานาติ, ลหุกครุกํ อาปตฺติํ น ชานาติ, สาวเสสานวเสสํ อาปตฺติํ น ชานาติ, ทุฏฺฐุลฺลาทุฏฺฐุลฺลํ อาปตฺติํ น ชานาติ, อธิกรเณ จ น วินิจฺฉยกุสโล โหติฯ

ทสหงฺเคหิ สมนฺนาคโต วินยธโร ปณฺฑิโต ตฺเวว สงฺขํ คจฺฉติ – อาปตฺตานาปตฺติํ ชานาติ, ลหุกครุกํ อาปตฺติํ ชานาติ, สาวเสสานวเสสํ อาปตฺติํ ชานาติ, ทุฏฺฐุลฺลาทุฏฺฐุลฺลํ อาปตฺติํ ชานาติ, อุภยานิ โข ปนสฺส ปาติโมกฺขานิ วิตฺถาเรน สฺวาคตานิ โหนฺติ สุวิภตฺตานิ สุปฺปวตฺตีนิ สุวินิจฺฉิตานิ สุตฺตโส อนุพฺยญฺชนโส, อาปตฺตานาปตฺติํ ชานาติ, ลหุกครุกํ อาปตฺติํ ชานาติ, สาวเสสานวเสสํ อาปตฺติํ ชานาติ, ทุฏฺฐุลฺลาทุฏฺฐุลฺลํ อาปตฺติํ ชานาติ, อธิกรเณ จ วินิจฺฉยกุสโล โหติฯ

[อ. นิ. 10.33] ทสหงฺเคหิ สมนฺนาคโต ภิกฺขุ อุพฺพาหิกาย สมฺมนฺนิตพฺโพฯ ทส อตฺถวเส ปฏิจฺจ ตถาคเตน สาวกานํ สิกฺขาปทํ ปญฺญตฺตํฯ ทส อาทีนวา ราชนฺเตปุรปฺปเวสเนฯ ทส ทานวตฺถูนิฯ ทส รตนานิฯ ทสวคฺโค ภิกฺขุสงฺโฆฯ ทสวคฺเคน คเณน อุปสมฺปาเทตพฺพํฯ ทส ปํสุกูลานิฯ ทส จีวรธารณา [จีวรธารณานิ (สฺยา.)]ฯ

ทสาหปรมํ อติเรกจีวรํ ธาเรตพฺพํ ฯ ทส สุกฺกานิฯ ทส อิตฺถิโยฯ ทส ภริยาโยฯ เวสาลิยา ทส วตฺถูนิ ทีเปนฺติฯ ทส ปุคฺคลา อวนฺทิยาฯ ทส อกฺโกสวตฺถูนิฯ ทสหากาเรหิ เปสุญฺญํ อุปสํหรติฯ ทส เสนาสนานิฯ ทส วรานิ ยาจิํสุฯ ทส อธมฺมิกานิ ปาติโมกฺขฏฺฐปนานิฯ ทส ธมฺมิกานิ ปาติโมกฺขฏฺฐปนานิฯ ทสานิสํสา ยาคุยาฯ ทส มํสา อกปฺปิยาฯ ทส ปรมานิฯ ทสวสฺเสน ภิกฺขุนา พฺยตฺเตน ปฏิพเลน ปพฺพาเชตพฺพํ อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพฯ ทสวสฺสาย ภิกฺขุนิยา พฺยตฺตาย ปฏิพลาย ปพฺพาเชตพฺพํ อุปสมฺปาเทตพฺพํ นิสฺสโย ทาตพฺโพ สามเณรี อุปฏฺฐาเปตพฺพาฯ ทสวสฺสาย ภิกฺขุนิยา พฺยตฺตาย ปฏิพลาย วุฏฺฐาปนสมฺมุติ สาทิตพฺพาฯ ทสวสฺสาย คิหิคตาย สิกฺขา ทาตพฺพาติฯ

ทสกํ นิฏฺฐิตํฯ

ตสฺสุทฺทานํ –

อาฆาตํ วินยํ วตฺถุ, มิจฺฉา สมฺมา จ อนฺตคา;

มิจฺฉตฺตา เจว สมฺมตฺตา, อกุสลา กุสลาปิ จฯ

สลากา อธมฺมา ธมฺมา, สามเณรา จ นาสนา;

ภาสาธิกรณญฺเจว, ญตฺติลหุกเมว จฯ

ลหุกา ครุกา เอเต, กณฺหสุกฺกา วิชานถ;

อุพฺพาหิกา จ สิกฺขา จ, อนฺเตปุเร จ วตฺถูนิฯ

รตนํ ทสวคฺโค จ, ตเถว อุปสมฺปทา;

ปํสุกูลธารณา จ, ทสาหสุกฺกอิตฺถิโยฯ

ภริยา ทส วตฺถูนิ, อวนฺทิยกฺโกเสน จ;

เปสุญฺญญฺเจว เสนานิ, วรานิ จ อธมฺมิกาฯ

ธมฺมิกา ยาคุมํสา จ, ปรมา ภิกฺขุ ภิกฺขุนี;

วุฏฺฐาปนา คิหิคตา, ทสกา สุปฺปกาสิตาติฯ

11. เอกาทสกวาโร

[331] เอกาท ปุคฺคลา อนุปสมฺปนฺนา น อุปสมฺปาเทตพฺพา, อุปสมฺปนฺนา นาเสตพฺพาฯ เอกาทส ปาทุกา อกปฺปิยาฯ เอกาทส ปตฺตา อกปฺปิยาฯ เอกาทส จีวรานิ อกปฺปิยานิฯ เอกาทส ยาวตติยกาฯ ภิกฺขุนีนํ เอกาทส อนฺตรายิกา ธมฺมา ปุจฺฉิตพฺพาฯ เอกาทส จีวรานิ อธิฏฺฐาตพฺพานิฯ เอกาทส จีวรานิ น วิกปฺเปตพฺพานิฯ เอกาทเส อรุณุคฺคมเน นิสฺสคฺคิยํ โหติฯ เอกาทส คณฺฐิกา กปฺปิยาฯ เอกาทส วิธา [วีถา (สฺยา.)] กปฺปิยาฯ เอกาทส ปถวี อกปฺปิยาฯ เอกาทส ปถวี กปฺปิยาฯ เอกาทส นิสฺสยปฏิปฺปสฺสทฺธิโยฯ เอกาทส ปุคฺคลา อวนฺทิยาฯ เอกาทส ปรมานิฯ เอกาทส วรานิ ยาจิํสุฯ เอกาทส สีมาโทสาฯ อกฺโกสกปริภาสเก ปุคฺคเล เอกาทสาทีนวา ปาฏิกงฺขาฯ [อ. นิ. 11.15; มิ. ป. 4.4.6] เมตฺตาย เจโตวิมุตฺติยา อาเสวิตาย ภาวิตาย พหุลีกตาย ยานีกตาย วตฺถุกตาย อนุฏฺฐิตาย ปริจิตาย สุสมารทฺธาย เอกาทสานิสํสา ปาฏิกงฺขา ฯ สุขํ สุปติ, สุขํ ปฏิพุชฺฌติ, น ปาปกํ สุปินํ ปสฺสติ, มนุสฺสานํ ปิโย โหติ, อมนุสฺสานํ ปิโย โหติ, เทวตา รกฺขนฺติ, นาสฺส อคฺคิ วา วิสํ วา สตฺถํ วา กมติ, ตุวฏฺฏํ จิตฺตํ สมาธิยติ, มุขวณฺโณ วิปฺปสีทติ, อสมฺมูฬฺโห กาลงฺกโรติ, อุตฺตริ อปฺปฏิวิชฺฌนฺโต พฺรหฺมโลกูปโค โหติ – เมตฺตาย เจโตวิมุตฺติยา อาเสวิตาย ภาวิตาย พหุลีกตาย ยานีกตาย วตฺถุกตาย อนุฏฺฐิตาย ปริจิตาย สุสมารทฺธาย อิเม เอกาทสานิสํสา ปาฏิกงฺขาติฯ

เอกาทสกํ นิฏฺฐิตํฯ

ตสฺสุทฺทานํ –

นาเสตพฺพา ปาทุกา จ, ปตฺตา จ จีวรานิ จ;

ตติยา ปุจฺฉิตพฺพา จ, อธิฏฺฐานวิกปฺปนาฯ

อรุณา คณฺฐิกา วิธา, อกปฺปิยา จ กปฺปิยํ;

นิสฺสยาวนฺทิยา เจว, ปรมานิ วรานิ จ;

สีมาโทสา จ อกฺโกสา, เมตฺตาเยกาทสา กตาติฯ

เอกุตฺตริกนโยฯ

ตสฺสุทฺทานํ –