เอกุตฺตริกนโย

1. เอกกวาโร

[321] อาปตฺติกรา ธมฺมา ชานิตพฺพาฯ อนาปตฺติกรา ธมฺมา ชานิตพฺพาฯ อาปตฺติ ชานิตพฺพาฯ อนาปตฺติ ชานิตพฺพาฯ ลหุกา อาปตฺติ ชานิตพฺพาฯ ครุกา อาปตฺติ ชานิตพฺพาฯ สาวเสสา อาปตฺติ ชานิตพฺพาฯ อนวเสสา อาปตฺติ ชานิตพฺพาฯ ทุฏฺฐุลฺลา อาปตฺติ ชานิตพฺพาฯ อทุฏฺฐุลฺลา อาปตฺติ ชานิตพฺพาฯ สปฺปฏิกมฺมา อาปตฺติ ชานิตพฺพาฯ อปฺปฏิกมฺมา อาปตฺติ ชานิตพฺพาฯ เทสนาคามินี อาปตฺติ ชานิตพฺพาฯ อเทสนาคามินี อาปตฺติ ชานิตพฺพาฯ อนฺตรายิกา อาปตฺติ ชานิตพฺพาฯ อนนฺตรายิกา อาปตฺติ ชานิตพฺพาฯ สาวชฺชปญฺญตฺติ อาปตฺติ ชานิตพฺพาฯ อนวชฺชปญฺญตฺติ อาปตฺติ ชานิตพฺพาฯ กิริยโต สมุฏฺฐิตา อาปตฺติ ชานิตพฺพาฯ อกิริยโต สมุฏฺฐิตา อาปตฺติ ชานิตพฺพาฯ กิริยากิริยโต สมุฏฺฐิตา อาปตฺติ ชานิตพฺพาฯ ปุพฺพาปตฺติ ชานิตพฺพาฯ อปราปตฺติ ชานิตพฺพาฯ ปุพฺพาปตฺตีนํ อนฺตราปตฺติ ชานิตพฺพาฯ อปราปตฺตีนํ อนฺตราปตฺติ ชานิตพฺพาฯ เทสิตา คณนูปคา อาปตฺติ ชานิตพฺพาฯ เทสิตา น คณนูปคา อาปตฺติ ชานิตพฺพาฯ ปญฺญตฺติ ชานิตพฺพาฯ อนุปญฺญตฺติ ชานิตพฺพาฯ อนุปฺปนฺนปญฺญตฺติ ชานิตพฺพาฯ สพฺพตฺถปญฺญตฺติ ชานิตพฺพาฯ ปเทสปญฺญตฺติ ชานิตพฺพาฯ สาธารณปญฺญตฺติ ชานิตพฺพา ฯ อสาธารณปญฺญตฺติ ชานิตพฺพาฯ เอกโตปญฺญตฺติ ชานิตพฺพาฯ อุภโตปญฺญตฺติ ชานิตพฺพาฯ ถุลฺลวชฺชา อาปตฺติ ชานิตพฺพาฯ อถุลฺลวชฺชา อาปตฺติ ชานิตพฺพาฯ คิหิปฏิสํยุตฺตา อาปตฺติ ชานิตพฺพาฯ น คิหิปฏิสํยุตฺตา อาปตฺติ ชานิตพฺพาฯ นิยตา อาปตฺติ ชานิตพฺพาฯ อนิยตา อาปตฺติ ชานิตพฺพาฯ อาทิกโร ปุคฺคโล ชานิตพฺโพฯ อนาทิกโร ปุคฺคโล ชานิตพฺโพฯ อธิจฺจาปตฺติโก ปุคฺคโล ชานิตพฺโพฯ อภิณฺหาปตฺติโก ปุคฺคโล ชานิตพฺโพฯ โจทโก ปุคฺคโล ชานิตพฺโพฯ จุทิตโก ปุคฺคโล ชานิตพฺโพฯ อธมฺมโจทโก ปุคฺคโล ชานิตพฺโพฯ อธมฺมจุทิตโก ปุคฺคโล ชานิตพฺโพฯ ธมฺมโจทโก ปุคฺคโล ชานิตพฺโพฯ ธมฺมจุทิตโก ปุคฺคโล ชานิตพฺโพ ฯ นิยโต ปุคฺคโล ชานิตพฺโพฯ อนิยโต ปุคฺคโล ชานิตพฺโพฯ อภพฺพาปตฺติโก ปุคฺคโล ชานิตพฺโพฯ ภพฺพาปตฺติโก ปุคฺคโล ชานิตพฺโพฯ อุกฺขิตฺตโก ปุคฺคโล ชานิตพฺโพฯ อนุกฺขิตฺตโก ปุคฺคโล ชานิตพฺโพฯ นาสิตโก ปุคฺคโล ชานิตพฺโพฯ อนาสิตโก ปุคฺคโล ชานิตพฺโพฯ สมานสํวาสโก ปุคฺคโล ชานิตพฺโพฯ อสมานสํวาสโก ปุคฺคโล ชานิตพฺโพฯ ฐปนํ ชานิตพฺพนฺติฯ

เอกกํ นิฏฺฐิตํฯ

ตสฺสุทฺทานํ –

กรา อาปตฺติ ลหุกา, สาวเสสา จ ทุฏฺฐุลฺลา;

ปฏิกมฺมเทสนา จ, อนฺตรา วชฺชกิริยํฯ

กิริยากิริยํ ปุพฺพา, อนฺตรา คณนูปคา;

ปญฺญตฺติ อนานุปฺปนฺน, สพฺพสาธารณา จ เอกโต [ปญฺญตฺตานุปฺปนฺนา สพฺพา, สาธารณา จ เอกโต (สฺยา.)]ฯ

ถุลฺลคิหินิยตา จ, อาทิ อธิจฺจโจทโก;

อธมฺมธมฺมนิยโต, อภพฺโพกฺขิตฺตนาสิตา;

สมานํ ฐปนญฺเจว, อุทฺทานํ เอกเก อิทนฺติฯ