11. ภูตาโรจนสมุฏฺฐานํ
[268]
ภูตํ กาเยน ชายติ, น วาจา น จ จิตฺตโต;
วาจโต จ สมุฏฺฐาติ, น กายา น จ จิตฺตโตฯ
กายวาจาย ชายติ, น ตุ ชายติ จิตฺตโต;
ภูตาโรจนกา นาม, ตีหิ ฐาเนหิ ชายติฯ
ภูตาโรจนสมุฏฺฐานํ นิฏฺฐิตํฯ
12. โจริวุฏฺฐาปนสมุฏฺฐานํ
[269]
โจรี วาจาย จิตฺเตน, น ตํ ชายติ กายโต;
ชายติ ตีหิ ทฺวาเรหิ, โจริวุฏฺฐาปนํ อิทํ;
อกตํ ทฺวิสมุฏฺฐานํ, ธมฺมราเชน ภาสิตํ [ฐปิตํ (สฺยา.)]ฯ
โจริวุฏฺฐาปนสมุฏฺฐานํ นิฏฺฐิตํฯ
13. อนนุญฺญาตสมุฏฺฐานํ
[270]
อนนุญฺญาตํ วาจาย, น กายา น จ จิตฺตโต;
ชายติ กายวาจาย, น ตํ ชายติ จิตฺตโตฯ
ชายติ วาจาจิตฺเตน, น ตํ ชายติ กายโต;
ชายติ ตีหิ ทฺวาเรหิ, อกตํ จตุฐานิกํฯ
อนนุญฺญาตสมุฏฺฐานํ นิฏฺฐิตํฯ
สมุฏฺฐานญฺหิ สงฺเขปํ, ทส ตีณิ สุเทสิตํ;
อสมฺโมหกรํ ฐานํ, เนตฺติธมฺมานุโลมิกํ;
ธารยนฺโต อิมํ วิญฺญู, สมุฏฺฐาเน น มุยฺหตีติฯ
สมุฏฺฐานสีสสงฺเขโป นิฏฺฐิโตฯ