ทฺเววสฺสํ สิกฺขา สงฺเฆน, ตโย เจว คิหีคตา;

กุมาริภูตา ติสฺโส จ, อูนทฺวาทสสมฺมตาฯ

อลํ ตาว โสกาวาสํ, ฉนฺทา อนุวสฺสา จ ทฺเว;

สิกฺขาปทา สตฺตติเม, สมุฏฺฐานา ติกา กตาฯ

กายจิตฺเตน น วาจา, วาจาจิตฺตํ น กายิกํ;

ตีหิ ทฺวาเรหิ ชายนฺติ, ปาราชิกํ ทุติยํ ยถาฯ

ทุติยปาราชิกสมุฏฺฐานํ นิฏฺฐิตํฯ

3. สญฺจริตฺตสมุฏฺฐานํ

[260]

สญฺจรี กุฏิ วิหาโร, โธวนญฺจ ปฏิคฺคโห;

วิญฺญตฺตุตฺตริ อภิหฏฺฐุํ, อุภินฺนํ ทูตเกน จฯ

โกสิยา สุทฺธทฺเวภาคา, ฉพฺพสฺสานิ นิสีทนํ;

ริญฺจนฺติ รูปิกา เจว, อุโภ นานปฺปการกาฯ

อูนพนฺธนวสฺสิกา, สุตฺตํ วิกปฺปเนน จ;

ทฺวารทานสิพฺพานิ [ทฺวารทานสิพฺพินี (สี. สฺยา.)] จ, ปูวปจฺจยโชติ จฯ

รตนํ สูจิ มญฺโจ จ, ตูลํ นิสีทนกณฺฑุ จ;

วสฺสิกา จ สุคเตน, วิญฺญตฺติ อญฺญํ เจตาปนาฯ

ทฺเว สงฺฆิกา มหาชนิกา, ทฺเว ปุคฺคลลหุกา ครุ;

ทฺเว วิฆาสา สาฏิกา จ, สมณจีวเรน จฯ

สมปญฺญาสิเม ธมฺมา, ฉหิ ฐาเนหิ ชายเร;

กายโต น วาจาจิตฺตา, วาจโต น กายมนาฯ

กายวาจา น จ จิตฺตา [น จิตฺตโต (สี. สฺยา.)], กายจิตฺตา น วาจิกา [น วาจโต (สี. สฺยา.)];

วาจาจิตฺตา น กาเยน, ตีหิ ทฺวาเรหิ [ตีหิ ฐาเนหิ (สฺยา.)] ชายเรฯ

ฉสมุฏฺฐานิกา เอเต, สญฺจริตฺเตน สาทิสาฯ

สญฺจริตฺตสมุฏฺฐานํ นิฏฺฐิตํฯ

4. สมนุภาสนาสมุฏฺฐานํ

[261]

เภทานุวตฺตทุพฺพจ , ทูสทุฏฺฐุลฺลทิฏฺฐิ จ;

ฉนฺทํ อุชฺชคฺฆิกา ทฺเว จ, ทฺเว จ สทฺทา น พฺยาหเรฯ

ฉมา นีจาสเน ฐานํ, ปจฺฉโต อุปฺปเถน จ;

วชฺชานุวตฺติคหณา, โอสาเร ปจฺจาจิกฺขนาฯ

กิสฺมิํ สํสฏฺฐา ทฺเว วธิ, วิสิพฺเพ ทุกฺขิตาย จ;

ปุน สํสฏฺฐา น วูปสเม, อารามญฺจ ปวารณาฯ

อนฺวทฺธํ [อนฺวทฺธมาสํ (สี. สฺยา.)] สห ชีวินิํ, ทฺเว จีวรํ อนุพนฺธนา;

สตฺตติํส อิเม ธมฺมา, กายวาจาย จิตฺตโตฯ

สพฺเพ เอกสมุฏฺฐานา, สมนุภาสนา ยถาฯ

สมนุภาสนาสมุฏฺฐานํ นิฏฺฐิตํฯ

5. กถินสมุฏฺฐานํ

[262]

อุพฺภตํ กถินํ ตีณิ, ปฐมํ ปตฺตเภสชฺชํ;

อจฺเจกํ จาปิ สาสงฺกํ, ปกฺกมนฺเตน วา ทุเวฯ

อุปสฺสยํ ปรมฺปรา, อนติริตฺตํ นิมนฺตนา;

วิกปฺปํ รญฺโญ วิกาเล, โวสาสารญฺญเกน จฯ

อุสฺสยาสนฺนิจยญฺจ, ปุเร ปจฺฉา วิกาเล จ;

ปญฺจาหิกา สงฺกมนี, ทฺเวปิ อาวสเถน จฯ

ปสาเข อาสเน เจว, ติํส เอกูนกา อิเม;

กายวาจา น จ จิตฺตา [น จิตฺตโต (สฺยา.)], ตีหิ ทฺวาเรหิ ชายเรฯ

ทฺวิสมุฏฺฐานิกา สพฺเพ, กถิเนน สหาสมาฯ

กถินสมุฏฺฐานํ นิฏฺฐิตํฯ