1. ปฐมปาราชิกสมุฏฺฐานํ

[258]

เมถุนํ สุกฺกสํสคฺโค, อนิยตา ปฐมิกา;

ปุพฺพูปปริปาจิตา, รโห ภิกฺขุนิยา สหฯ

สโภชเน รโห ทฺเว จ, องฺคุลิ อุทเก หสํ;

ปหาเร อุคฺคิเร เจว, เตปญฺญาสา จ เสขิยาฯ

อธกฺขคามาวสฺสุตา, ตลมฏฺฐญฺจ สุทฺธิกา;

วสฺสํวุฏฺฐา จ โอวาทํ, นานุพนฺเธ ปวตฺตินิํฯ

ฉสตฺตติ อิเม สิกฺขา, กายมานสิกา กตา;

สพฺเพ เอกสมุฏฺฐานา, ปฐมํ ปาราชิกํ ยถาฯ

ปฐมปาราชิกสมุฏฺฐานํ นิฏฺฐิตํฯ

2. ทุติยปาราชิกสมุฏฺฐานํ

[259]

อทินฺนํ วิคฺคหุตฺตริ, ทุฏฺฐุลฺลา อตฺตกามินํ;

อมูลา อญฺญภาคิยา, อนิยตา ทุติยิกาฯ

อจฺฉินฺเท ปริณามเน, มุสา โอมสเปสุณา;

ทุฏฺฐุลฺลา ปถวีขเณ, ภูตํ อญฺญาย อุชฺฌาเปฯ

นิกฺกฑฺฒนํ สิญฺจนญฺจ, อามิสเหตุ ภุตฺตาวี;

เอหิ อนาทริ ภิํสา, อปนิเธ จ ชีวิตํฯ

ชานํ สปฺปาณกํ กมฺมํ, อูนสํวาสนาสนา;

สหธมฺมิกวิเลขา, โมโห อมูลเกน จฯ

กุกฺกุจฺจํ ธมฺมิกํ จีวรํ, ทตฺวา [กุกฺกุจฺจํ ธมฺมิกํ จีวรํ (สี.), กุกฺกุจฺจํ ธมฺมิกํ ทตฺวา (สฺยา.)] ปริณาเมยฺย ปุคฺคเล;

กิํ เต อกาลํ อจฺฉินฺเท, ทุคฺคหี นิรเยน จฯ

คณํ วิภงฺคํ ทุพฺพลํ, กถินาผาสุปสฺสยํ;

อกฺโกสจณฺฑี มจฺฉรี, คพฺภินี จ ปายนฺติยาฯ

ทฺเววสฺสํ สิกฺขา สงฺเฆน, ตโย เจว คิหีคตา;

กุมาริภูตา ติสฺโส จ, อูนทฺวาทสสมฺมตาฯ

อลํ ตาว โสกาวาสํ, ฉนฺทา อนุวสฺสา จ ทฺเว;

สิกฺขาปทา สตฺตติเม, สมุฏฺฐานา ติกา กตาฯ

กายจิตฺเตน น วาจา, วาจาจิตฺตํ น กายิกํ;

ตีหิ ทฺวาเรหิ ชายนฺติ, ปาราชิกํ ทุติยํ ยถาฯ

ทุติยปาราชิกสมุฏฺฐานํ นิฏฺฐิตํฯ

3. สญฺจริตฺตสมุฏฺฐานํ

[260]

สญฺจรี กุฏิ วิหาโร, โธวนญฺจ ปฏิคฺคโห;

วิญฺญตฺตุตฺตริ อภิหฏฺฐุํ, อุภินฺนํ ทูตเกน จฯ

โกสิยา สุทฺธทฺเวภาคา, ฉพฺพสฺสานิ นิสีทนํ;

ริญฺจนฺติ รูปิกา เจว, อุโภ นานปฺปการกาฯ

อูนพนฺธนวสฺสิกา, สุตฺตํ วิกปฺปเนน จ;

ทฺวารทานสิพฺพานิ [ทฺวารทานสิพฺพินี (สี. สฺยา.)] จ, ปูวปจฺจยโชติ จฯ

รตนํ สูจิ มญฺโจ จ, ตูลํ นิสีทนกณฺฑุ จ;

วสฺสิกา จ สุคเตน, วิญฺญตฺติ อญฺญํ เจตาปนาฯ

ทฺเว สงฺฆิกา มหาชนิกา, ทฺเว ปุคฺคลลหุกา ครุ;

ทฺเว วิฆาสา สาฏิกา จ, สมณจีวเรน จฯ

สมปญฺญาสิเม ธมฺมา, ฉหิ ฐาเนหิ ชายเร;

กายโต น วาจาจิตฺตา, วาจโต น กายมนาฯ

กายวาจา น จ จิตฺตา [น จิตฺตโต (สี. สฺยา.)], กายจิตฺตา น วาจิกา [น วาจโต (สี. สฺยา.)];

วาจาจิตฺตา น กาเยน, ตีหิ ทฺวาเรหิ [ตีหิ ฐาเนหิ (สฺยา.)] ชายเรฯ

ฉสมุฏฺฐานิกา เอเต, สญฺจริตฺเตน สาทิสาฯ

สญฺจริตฺตสมุฏฺฐานํ นิฏฺฐิตํฯ