เมนู

สมุฏฺฐานสฺสุทฺทานํ

[257]

อนิจฺจา สพฺเพ สงฺขารา, ทุกฺขานตฺตา จ สงฺขตา;

นิพฺพานญฺเจว ปญฺญตฺติ, อนตฺตา อิติ นิจฺฉยาฯ

พุทฺธจนฺเท อนุปฺปนฺเน, พุทฺธาทิจฺเจ อนุคฺคเต;

เตสํ สภาคธมฺมานํ, นามมตฺตํ น นายติฯ

ทุกฺกรํ วิวิธํ กตฺวา, ปูรยิตฺวาน ปารมี;

อุปฺปชฺชนฺติ มหาวีรา, จกฺขุภูตา สพฺรหฺมเกฯ

เต เทสยนฺติ สทฺธมฺมํ, ทุกฺขหานิํ สุขาวหํ;

องฺคีรโส สกฺยมุนิ, สพฺพภูตานุกมฺปโกฯ

สพฺพสตฺตุตฺตโม สีโห, ปิฏเก ตีณิ เทสยิ;

สุตฺตนฺตมภิธมฺมญฺจ, วินยญฺจ มหาคุณํฯ

เอวํ นียติ สทฺธมฺโม, วินโย ยทิ ติฏฺฐติ;

อุภโต จ วิภงฺคานิ, ขนฺธกา ยา จ มาติกาฯ

มาลา สุตฺตคุเณเนว, ปริวาเรน คนฺถิตา;

ตสฺเสว ปริวารสฺส, สมุฏฺฐานํ นิยโต กตํฯ

สมฺเภทํ นิทานํ จญฺญํ, สุตฺเต ทิสฺสนฺติ อุปริ;

ตสฺมา สิกฺเข ปริวารํ, ธมฺมกาโม สุเปสโลติฯ

เตรสสมุฏฺฐานํ

วิภงฺเค ทฺวีสุ ปญฺญตฺตํ, อุทฺทิสนฺติ อุโปสเถ;

ปวกฺขามิ สมุฏฺฐานํ, ยถาญายํ สุณาถ เมฯ

ปาราชิกํ ยํ ปฐมํ, ทุติยญฺจ ตโต ปรํ;

สญฺจริตฺตานุภาสนญฺจ, อติเรกญฺจ จีวรํฯ

โลมานิ ปทโสธมฺโม, ภูตํ สํวิธาเนน จ;

เถยฺยเทสนโจรี จ, อนนุญฺญาตาย เตรสฯ

เตรเสเต สมุฏฺฐาน นยา, วิญฺญูหิ จินฺติตาฯ

เอเกกสฺมิํ สมุฏฺฐาเน, สทิสา อิธ ทิสฺสเรฯ

1. ปฐมปาราชิกสมุฏฺฐานํ

[258]

เมถุนํ สุกฺกสํสคฺโค, อนิยตา ปฐมิกา;

ปุพฺพูปปริปาจิตา, รโห ภิกฺขุนิยา สหฯ

สโภชเน รโห ทฺเว จ, องฺคุลิ อุทเก หสํ;

ปหาเร อุคฺคิเร เจว, เตปญฺญาสา จ เสขิยาฯ

อธกฺขคามาวสฺสุตา, ตลมฏฺฐญฺจ สุทฺธิกา;

วสฺสํวุฏฺฐา จ โอวาทํ, นานุพนฺเธ ปวตฺตินิํฯ

ฉสตฺตติ อิเม สิกฺขา, กายมานสิกา กตา;

สพฺเพ เอกสมุฏฺฐานา, ปฐมํ ปาราชิกํ ยถาฯ

ปฐมปาราชิกสมุฏฺฐานํ นิฏฺฐิตํฯ

2. ทุติยปาราชิกสมุฏฺฐานํ

[259]

อทินฺนํ วิคฺคหุตฺตริ, ทุฏฺฐุลฺลา อตฺตกามินํ;

อมูลา อญฺญภาคิยา, อนิยตา ทุติยิกาฯ

อจฺฉินฺเท ปริณามเน, มุสา โอมสเปสุณา;

ทุฏฺฐุลฺลา ปถวีขเณ, ภูตํ อญฺญาย อุชฺฌาเปฯ

นิกฺกฑฺฒนํ สิญฺจนญฺจ, อามิสเหตุ ภุตฺตาวี;

เอหิ อนาทริ ภิํสา, อปนิเธ จ ชีวิตํฯ

ชานํ สปฺปาณกํ กมฺมํ, อูนสํวาสนาสนา;

สหธมฺมิกวิเลขา, โมโห อมูลเกน จฯ

กุกฺกุจฺจํ ธมฺมิกํ จีวรํ, ทตฺวา [กุกฺกุจฺจํ ธมฺมิกํ จีวรํ (สี.), กุกฺกุจฺจํ ธมฺมิกํ ทตฺวา (สฺยา.)] ปริณาเมยฺย ปุคฺคเล;

กิํ เต อกาลํ อจฺฉินฺเท, ทุคฺคหี นิรเยน จฯ

คณํ วิภงฺคํ ทุพฺพลํ, กถินาผาสุปสฺสยํ;

อกฺโกสจณฺฑี มจฺฉรี, คพฺภินี จ ปายนฺติยาฯ