เมนู

[161] ‘‘อิธ ปน, ภิกฺขเว, ภิกฺขุ มูลายปฏิกสฺสนารโห วิพฺภมติฯ วิพฺภนฺตกสฺส, ภิกฺขเว, มูลายปฏิกสฺสนา น รุหติฯ โส เจ ปุน อุปสมฺปชฺชติ, ตสฺส ตเทว ปุริมํ ปริวาสทานํฯ โย ปริวาโส ทินฺโน สุทินฺโน, โย ปริวุตฺโถ สุปริวุตฺโถฯ โส ภิกฺขุ มูลาย ปฏิกสฺสิตพฺโพฯ

‘‘อิธ ปน, ภิกฺขเว, ภิกฺขุ มูลายปฏิกสฺสนารโห สามเณโร โหติ…เป.… อุมฺมตฺตโก โหติ…เป.… ขิตฺตจิตฺโต โหติ…เป.… เวทนาฏฺโฏ โหติ…เป.… อาปตฺติยา อทสฺสเน อุกฺขิปิยฺยติ…เป.… อาปตฺติยา อปฺปฏิกมฺเม อุกฺขิปิยฺยติ…เป.… ปาปิกาย ทิฏฺฐิยา, อปฺปฏินิสฺสคฺเค, อุกฺขิปิยฺยติฯ อุกฺขิตฺตกสฺส, ภิกฺขเว, มูลายปฏิกสฺสนา น รุหติฯ โส เจ ปุน โอสาริยฺยติ, ตสฺส ตเทว ปุริมํ ปริวาสทานํฯ โย ปริวาโส ทินฺโน สุทินฺโน, โย ปริวุตฺโถ สุปริวุตฺโถฯ โส ภิกฺขุ มูลาย ปฏิกสฺสิตพฺโพฯ

[162] ‘‘อิธ ปน, ภิกฺขเว, ภิกฺขุ มานตฺตารโห วิพฺภมติฯ วิพฺภนฺตกสฺส, ภิกฺขเว, มานตฺตทานํ น รุหติฯ โส เจ ปุน อุปสมฺปชฺชติ, ตสฺส ตเทว ปุริมํ ปริวาสทานํฯ โย ปริวาโส ทินฺโน สุทินฺโน, โย ปริวุตฺโถ สุปริวุตฺโถฯ ตสฺส ภิกฺขุโน มานตฺตํ ทาตพฺพํฯ

‘‘อิธ ปน, ภิกฺขเว, ภิกฺขุ มานตฺตารโห สามเณโร โหติ…เป.… อุมฺมตฺตโก โหติ…เป.… ขิตฺตจิตฺโต โหติ…เป.… เวทนาฏฺโฏ โหติ…เป.… อาปตฺติยา อทสฺสเน, อุกฺขิปิยฺยติ…เป.… อาปตฺติยา อปฺปฏิกมฺเม, อุกฺขิปิยฺยติ…เป.… ปาปิกาย ทิฏฺฐิยา, อปฺปฏินิสฺสคฺเค , อุกฺขิปิยฺยติฯ อุกฺขิตฺตกสฺส, ภิกฺขเว, มานตฺตทานํ น รุหติฯ โส เจ ปุน โอสาริยฺยติ, ตสฺส ตเทว ปุริมํ ปริวาสทานํฯ โย ปริวาโส ทินฺโน สุทินฺโน, โย ปริวุตฺโถ สุปริวุตฺโถฯ ตสฺส ภิกฺขุโน มานตฺตํ ทาตพฺพํฯ

[163] ‘‘อิธ ปน, ภิกฺขเว, ภิกฺขุ มานตฺตํ จรนฺโต วิพฺภมติฯ วิพฺภนฺตกสฺส, ภิกฺขเว , มานตฺตจริยา น รุหติฯ โส เจ ปุน อุปสมฺปชฺชติ ตสฺส ตเทว ปุริมํ ปริวาสทานํฯ โย ปริวาโส ทินฺโน สุทินฺโน, โย ปริวุตฺโถ สุปริวุตฺโถ; ยํ มานตฺตํ ทินฺนํ สุทินฺนํ, ยํ มานตฺตํ จิณฺณํ สุจิณฺณํ, อวเสสํ จริตพฺพํฯ

‘‘อิธ ปน, ภิกฺขเว, ภิกฺขุ มานตฺตํ จรนฺโต สามเณโร โหติ…เป.… อุมฺมตฺตโก โหติ…เป.… ขิตฺตจิตฺโต โหติ…เป.… เวทนาฏฺโฏ โหติ…เป.… อาปตฺติยา อทสฺสเน, อุกฺขิปิยฺยติ…เป.… อาปตฺติยา อปฺปฏิกมฺเม, อุกฺขิปิยฺยติ…เป.… ปาปิกาย ทิฏฺฐิยา, อปฺปฏินิสฺสคฺเค, อุกฺขิปิยฺยติฯ อุกฺขิตฺตกสฺส, ภิกฺขเว, มานตฺตจริยา น รุหติฯ โส เจ ปุน โอสาริยฺยติ, ตสฺส ตเทว ปุริมํ ปริวาสทานํฯ โย ปริวาโส ทินฺโน สุทินฺโน, โย ปุริวุตฺโถ สุปริวุตฺโถ; ยํ มานตฺตํ ทินฺนํ สุทินฺนํ, ยํ มานตฺตํ จิณฺณํ สุจิณฺณํ, อวเสสํ จริตพฺพํฯ

[164] ‘‘อิธ ปน, ภิกฺขเว, ภิกฺขุ อพฺภานารโห วิพฺภมติฯ วิพฺภนฺตกสฺส, ภิกฺขเว, อพฺภานํ น รุหติฯ โส เจ ปุน อุปสมฺปชฺชติ , ตสฺส ตเทว ปุริมํ ปริวาสทานํฯ โย ปริวาโส ทินฺโน สุทินฺโน, โย ปริวุตฺโถ สุปริวุตฺโถ; ยํ มานตฺตํ ทินฺนํ สุทินฺนํ, ยํ มานตฺตํ จิณฺณํ สุจิณฺณํฯ โส ภิกฺขุ อพฺเภตพฺโพฯ

‘‘อิธ ปน, ภิกฺขเว, ภิกฺขุ อพฺภานารโห สามเณโร โหติ…เป.… อุมฺมตฺตโก โหติ…เป.…

ขิตฺตจิตฺโต โหติ…เป.… เวทนาฏฺโฏ โหติ…เป.… อาปตฺติยา อทสฺสเน, อุกฺขิปิยฺยติ…เป.… อาปตฺติยา อปฺปฏิกมฺเม, อุกฺขิปิยฺยติ…เป.… ปาปิกาย ทิฏฺฐิยา, อปฺปฏินิสฺสคฺเค, อุกฺขิปิยฺยติฯ อุกฺขิตฺตกสฺส, ภิกฺขเว, อพฺภานํ น รุหติฯ โส เจ ปุน โอสาริยฺยติ, ตสฺส ตเทว ปุริมํ ปริวาสทานํฯ โย ปริวาโส ทินฺโน สุทินฺโน, โย ปริวุตฺโถ สุปริวุตฺโถ; ยํ มานตฺตํ ทินฺนํ สุทินฺนํ, ยํ มานตฺตํ จิณฺณํ สุจิณฺณํฯ โส ภิกฺขุ อพฺเภตพฺโพฯ

จตฺตาลีสกํ สมตฺตํฯ

4. ฉตฺติํสกํ

[165] ‘‘อิธ ปน, ภิกฺขเว, ภิกฺขุ ปริวสนฺโต อนฺตรา สมฺพหุลา สงฺฆาทิเสสา อาปตฺติโย อาปชฺชติ ปริมาณา [ปริมาณาโย (สี. สฺยา.)] อปฺปฏิจฺฉนฺนาโยฯ โส ภิกฺขุ มูลาย ปฏิกสฺสิตพฺโพฯ

‘‘อิธ ปน, ภิกฺขเว, ภิกฺขุ ปริวสนฺโต อนฺตรา สมฺพหุลา สงฺฆาทิเสสา อาปตฺติโย อาปชฺชติ ปริมาณา ปฏิจฺฉนฺนาโยฯ โส ภิกฺขุ มูลาย ปฏิกสฺสิตพฺโพฯ ยถาปฏิจฺฉนฺนานญฺจสฺส อาปตฺตีนํ ปุริมาย อาปตฺติยา สโมธานปริวาโส ทาตพฺโพฯ

‘‘อิธ ปน, ภิกฺขเว, ภิกฺขุ ปริวสนฺโต อนฺตรา สมฺพหุลา สงฺฆาทิเสสา อาปตฺติโย อาปชฺชติ ปริมาณา ปฏิจฺฉนฺนาโยปิ อปฺปฏิจฺฉนฺนาโยปิฯ โส ภิกฺขุ มูลาย ปฏิกสฺสิตพฺโพฯ ยถาปฏิจฺฉนฺนานญฺจสฺส อาปตฺตีนํ ปุริมาย อาปตฺติยา สโมธานปริวาโส ทาตพฺโพฯ

‘‘อิธ ปน, ภิกฺขเว, ภิกฺขุ ปริวสนฺโต อนฺตรา สมฺพหุลา สงฺฆาทิเสสา อาปตฺติโย อาปชฺชติ อปริมาณา [อปริมาณาโย (สี. สฺยา.)] อปฺปฏิจฺฉนฺนาโย…เป.… อปริมาณา ปฏิจฺฉนฺนาโย…เป.… อปริมาณา ปฏิจฺฉนฺนาโยปิ อปฺปฏิจฺฉนฺนาโยปิ…เป.… ปริมาณาโยปิ อปริมาณาโยปิ อปฺปฏิจฺฉนฺนาโย…เป.… ปริมาณาโยปิ อปริมาณาโยปิ ปฏิจฺฉนฺนาโย…เป.… ปริมาณาโยปิ อปริมาณาโยปิ ปฏิจฺฉนฺนาโยปิ อปฺปฏิจฺฉนฺนาโยปิฯ โส ภิกฺขุ มูลาย ปฏิกสฺสิตพฺโพฯ ยถาปฏิจฺฉนฺนานญฺจสฺส อาปตฺตีนํ ปุริมาย อาปตฺติยา สโมธานปริวาโส ทาตพฺโพฯ

‘‘อิธ ปน, ภิกฺขเว, ภิกฺขุ มานตฺตารโห…เป.… มานตฺตํ จรนฺโต…เป.… (ยถาปริวาสํ ตถา วิตฺถาเรตพฺพํ) อพฺภานารโห อนฺตรา สมฺพหุลา สงฺฆาทิเสสา อาปตฺติโย อาปชฺชติ ปริมาณา อปฺปฏิจฺฉนฺนาโย…เป.… ปริมาณา ปฏิจฺฉนฺนาโย…เป.… ปริมาณา ปฏิจฺฉนฺนาโยปิ อปฺปฏิจฺฉนฺนาโยปิ…เป.… อปริมาณา อปฺปฏิจฺฉนฺนาโย…เป.… อปริมาณา ปฏิจฺฉนฺนาโย…เป.… อปริมาณา ปฏิจฺฉนฺนาโยปิ อปฺปฏิจฺฉนฺนาโยปิ…เป.… ปริมาณาโยปิ อปริมาณาโยปิ อปฺปฏิจฺฉนฺนาโย…เป.… ปริมาณาโยปิ อปริมาณาโยปิ ปฏิจฺฉนฺนาโย…เป.… ปริมาณาโยปิ อปริมาณาโยปิ ปฏิจฺฉนฺนาโยปิ อปฺปฏิจฺฉนฺนาโยปิฯ โส ภิกฺขุ มูลาย ปฏิกสฺสิตพฺโพฯ ยถาปฏิจฺฉนฺนานญฺจสฺส อาปตฺตีนํ ปุริมาย อาปตฺติยา สโมธานปริวาโส ทาตพฺโพฯ

ฉตฺติํสกํ สมตฺตํฯ